ಯಾರ ಬಿಟ್ಟಿಹವಿಲ್ಲಿ
ಜರೆ ಮರಣ ರೋಗಗಳು !
ಯಾರ ವಶವಿಹವು ಪೇಳ್
ತನು ಮನಾದಿಗಳು !
ನಿನ್ನ ಕಣ್ ನಿನ್ನ ಬಾಯ್
ನಿನ್ನ ಹಿಡಿತದೊಳಿರವು !
ಒಡೆತನದ ಹುಚ್ಚೇಕೊ ?
ಜಾಣಮೂರ್ಖ//
ನಮ್ಮ ಸುತ್ತಲಿನ ಜನರ ಬದುಕು ನಮಗೊಂದು ಅರ್ಥಪೂರ್ಣ ಪಾಠ. ಹಾಗೇ ತದೇಕಚಿತ್ತತೆಯಿಂದ ಒಮ್ಮೆ ಗಮನಿಸಿ ! ಮುಪ್ಪು , ಮರಣ ,ಖಾಯಿಲೆಗಳಿಂದ ಯಾರು ಮುಕ್ತರಾಗಿದ್ದಾರೆ ಇಲ್ಲಿ ? ಅದು ಹೋಗಲಿ ಬಿಡಿ. ನಮ್ಮದೇ ಶರೀರ ಇದು. ನಮ್ಮದೇ ಮನಸ್ಸು ಕೂಡ. ಈ ಶರೀರವಾಗಲಿ, ಮನಸ್ಸಾಗಲಿ ನಮ್ಮ ನಿಯಂತ್ರಣಕ್ಕೆ ಒಳಪಟ್ಟಿವೆಯೇ ? ಮಾತು ಕೇಳುತ್ತವೆಯೇ !? ಅದೂ ಇಲ್ಲ. ನಮ್ಮ ಶರೀರದ ಅವಯವಗಳು ! ಕಣ್ಣು , ಬಾಯಿ ಇತ್ಯಾದಿಗಳಾವುವೂ ನಮ್ಮ ಮಾತನ್ನೇ ಕೇಳಲೊಲ್ಲವು ! ನಮ್ಮ ಹಿಡಿತಕ್ಕೆ ಬಾರವು ! ನಮ್ಮ ತನು ಮನಗಳನ್ನೇ ಸಂಬಾಳಿಸೋದಕ್ಕೆ ನಮ್ಮಿಂದ ಸಾಧ್ಯವಾಗದೇ ಇರುವಾಗ ಈ ಭೌತಿಕ ಜಗತ್ತಿನ ಒಡೆತನಕ್ಕೆ ಹಾರಾಡುವ , ಹೋರಾಡುವ ಈ ಹುಚ್ಚಾಟಕ್ಕೆ ಏನೆನ್ನಬೇಕು ? ಅಲ್ಲವೇ ಗೆಳೆಯರೇ !?
ಶ್ರೀ ಮುರಳೀಧರ ಹೆಚ್ ಆರ್ ಮೂಲತಃ ಚಿತ್ರದುರ್ಗ ಜಿಲ್ಲೆಯ ಹೊಸದುರ್ಗ ತಾಲ್ಲೂಕಿನ ಹೆಗ್ಗೆರೆ ಗ್ರಾಮದವರು ಪ್ರಸ್ತುತ ತಿಪಟೂರಿನ ಬಾಲಕಿಯರ ಸರ್ಕಾರೀ ಪದವಿ ಪೂರ್ವ ಕಾಲೇಜಿನ ಪ್ರಾಢಶಾಲಾ ವಿಭಾಗದಲ್ಲಿ ಕನ್ನಡ ಭಾಷಾ ಉಪದಾಧ್ಯಾಯರಾಗಿ ಕರ್ತವ್ಯ ನಿರ್ವಹಿಸುತ್ತಿದ್ದಾರೆ. ಸಾಹಿತ್ಯ, ಕಲೆ, ಸಂಗೀತ ಮೊದಲಾದವುಗಳಲ್ಲಿ ಸಕ್ರಿಯವಾಗಿ ತೊಡಗಿಸಿಕೊಂಡಿರುವ ಇವರು ಶಿಕ್ಷಣ ಇಲಾಖೆಯಲ್ಲಿ ರಾಜ್ಯಮಟ್ಟದ ಸಂಪನ್ನೂಲ ವ್ಯಕ್ತಿಯಾಗಿ ತಮ್ಮನ್ನು ತೊಡಗಿಸಿಕೊಂಡವರು. "ಹೊರಬೀಡು" ಇವರ ಕಥಾ ಸಂಕಲನವಾಗಿದೆ. ಇದಾಗಲೇ ಎಂಟುನೂರಕ್ಕೂ ಅಧಿಕ ಮುಕ್ತಕಗಳನ್ನು ಅರ್ಥ ಸಹಿತ ಬರೆದು ಸಾಮಾಜಿಕ ಜಾಲತಾಣಗಳಲ್ಲೂ ಪ್ರಸಿದ್ಧರಾಗಿದ್ದಾರೆ.
Latest posts by ಶ್ರೀ ಮುರಳೀಧರ ಹೆಚ್ ಆರ್ (see all)
- ಭವ ಕಳೆವ ಶಿವ ಸತ್ಯ - September 6, 2021
- ಬಾಳಿನಾಹವ - September 4, 2021
- ಪಿಡಿದರಿವಿನೊಳ್ಮಾಗು - September 3, 2021
