ತನುವ ದೇಗುಲದಲ್ಲಿ
ಮನವ ಹೂವಾಗಿಸಲು
ದೇವ ಬಹ ದಿಟದಿ ಕೇಳ್
ಸಂದಯಮದೇಕೆ ?
ಕಲ್ಮನದಿ ಕಲ್ಲಾಗ
ಲೆಂತು ಬಹನವ ಕೆಳೆಯ
ಅದಕೆ ಕಲ್ಲಾದನವ
ಜಾಣಮೂರ್ಖ//
ಓ, ಗೆಳೆಯ ನಮ್ಮ ಈ ಶರೀರವು ಒಂದು ಸುಂದರವಾದ ದೇವಾಲಯ. ನಿನ್ನ ಮನವನ್ನು ಹೂವಾಗಿಸು. ಸಂದೇಹವೇ ಬೇಡ. ಅಲ್ಲಿ ಭಗವಂತನು ಸ್ವಯಂ ಬರುತ್ತಾನೆ. ಆದರೆ ನಾವೇನು ಮಾಡಿದೆವು !? ಸ್ವಲ್ಪ ಯೋಚಿಸಿ. ಮನವ ಬರಿದಾಗಿಸಿದೆವು ! ಕಲ್ಲಾಗಿಸಿದೆವು ! ಕಲ್ಲಿನ ನಾಕು ಗೋಡೆಯ ಗುಡಿಯೊಳಗೆ ಅವನನ್ನೂ ಬಂಧಿಸಿ , ಅಬಂಧಿತನನ್ನು ಬಂಧಿತನನ್ನಾಗಿಸಿದೆವು. ನಮ್ಮದೇ ವಿಕೃತಿಗಳಿಂದ ನಾವೂ ಕಲ್ಲಾದೆವು. ಪ್ರೇಮಮಯನೂ , ಬಯಲೊಳಗೆ ಬಯಲಾದವನೂ , ಪ್ರೇಮಕೊಲಿಯುವವನೂ ಆದ ಭಗವಂತನು ಕಲ್ಮನದ ನಮ್ಮ ಬಳಿ ಎಂತು ಸುಳಿವನಯ್ಯಾ ಗೆಳೆಯ !? ಅದಕ್ಕೇ ಅವನೂ ಕಲ್ಲಾಗಿಬಿಟ್ಟ ! ಕೆಲವರು ಮಹಾನುಭಾವರು ಹೃದಯ ಹೂವಾಗಿಸಿ , ತಮ್ಮಂತರಂಗದೊಳು ಆರಾಧಿಸಿ ತಾವೂ ದೈವಸ್ವರೂಪರೇ ಆಗಿಬಿಟ್ಟರು ! ಆದರೆ ನಾವು ! ಸ್ವಲ್ಪ ಯೋಚಿಸಯ್ಯಾ ಗೆಳೆಯ.
ಶ್ರೀ ಮುರಳೀಧರ ಹೆಚ್ ಆರ್ ಮೂಲತಃ ಚಿತ್ರದುರ್ಗ ಜಿಲ್ಲೆಯ ಹೊಸದುರ್ಗ ತಾಲ್ಲೂಕಿನ ಹೆಗ್ಗೆರೆ ಗ್ರಾಮದವರು ಪ್ರಸ್ತುತ ತಿಪಟೂರಿನ ಬಾಲಕಿಯರ ಸರ್ಕಾರೀ ಪದವಿ ಪೂರ್ವ ಕಾಲೇಜಿನ ಪ್ರಾಢಶಾಲಾ ವಿಭಾಗದಲ್ಲಿ ಕನ್ನಡ ಭಾಷಾ ಉಪದಾಧ್ಯಾಯರಾಗಿ ಕರ್ತವ್ಯ ನಿರ್ವಹಿಸುತ್ತಿದ್ದಾರೆ. ಸಾಹಿತ್ಯ, ಕಲೆ, ಸಂಗೀತ ಮೊದಲಾದವುಗಳಲ್ಲಿ ಸಕ್ರಿಯವಾಗಿ ತೊಡಗಿಸಿಕೊಂಡಿರುವ ಇವರು ಶಿಕ್ಷಣ ಇಲಾಖೆಯಲ್ಲಿ ರಾಜ್ಯಮಟ್ಟದ ಸಂಪನ್ನೂಲ ವ್ಯಕ್ತಿಯಾಗಿ ತಮ್ಮನ್ನು ತೊಡಗಿಸಿಕೊಂಡವರು. "ಹೊರಬೀಡು" ಇವರ ಕಥಾ ಸಂಕಲನವಾಗಿದೆ. ಇದಾಗಲೇ ಎಂಟುನೂರಕ್ಕೂ ಅಧಿಕ ಮುಕ್ತಕಗಳನ್ನು ಅರ್ಥ ಸಹಿತ ಬರೆದು ಸಾಮಾಜಿಕ ಜಾಲತಾಣಗಳಲ್ಲೂ ಪ್ರಸಿದ್ಧರಾಗಿದ್ದಾರೆ.
Latest posts by ಶ್ರೀ ಮುರಳೀಧರ ಹೆಚ್ ಆರ್ (see all)
- ಭವ ಕಳೆವ ಶಿವ ಸತ್ಯ - September 6, 2021
- ಬಾಳಿನಾಹವ - September 4, 2021
- ಪಿಡಿದರಿವಿನೊಳ್ಮಾಗು - September 3, 2021
