ಹಾಸುವೆಳೆ ನಾರ್ಪಿಡಿದು
ಹೊಸೆದು ಹೆಣೆವುದು ಹಿಸಿದು
ಹಂಸತೂಲಿಕೆಯೇಕೆ
ಈಸೆ ನಿದಿರೆಯನು !
ನಾಕದೊಳು ನಾಕವೈ
ಮೂಕಹಕ್ಕಿಯ ಗೂಡು
ಸಾಕು ಬಾ ಸಗ್ಗವಿದೆ
ಜಾಣಮೂರ್ಖ //
ಎಳೆಯ ಬಿಗಿಯಾದ ನಾರನ್ನು ಆರಿಸಿ , ಎಳೆದು , ಹಿಸಿದು , ಹೊಸೆದು ಗೂಡುಕಟ್ಟಿ ನಲಿವ ಗೀಜುಗನ ಗೂಡಿನ ಮುಂದೆ ಹಂಸತೂಲಿಕಾ ತಲ್ಪವಾದರೂ ಏಕೆ ? ಅದರಲ್ಲಿ ಮಲಗುವವರು ನಿಜವಾಗಿ ಸುಖನಿದಿರೆ ಮಾಡುವರೇನು ? ಆದರೆ ಈ ಮೂಕ ಹಕ್ಕಿಯು ಸದ್ದು ಗದ್ದಲವಿಲ್ಲದೆ ಕಟ್ಟುವ ಈ ಗೂಡು ಹಂಸ ತೂಲಿಕೆಗಿಂತಲೂ ಮಿಗಿಲು. ಮೂಕ ಹಕ್ಕಿ ಅಂತ ಏಕೆ ಬಳಸಿದೆ ಎಂದರೆ ಯಾರ ಗೊಡವೆಗೂ ಹೋಗದೇ ಮೌನವಾಗಿ ಕಾರ್ಯ ನಿರ್ವಹಿಸುತ್ತದೆಯಲ್ಲಾ ! ಅದಕ್ಕೆ. ಈ ಭುವಿಯೇ ಒಂದು ಸ್ವರ್ಗ, ಸ್ವರ್ಗದಲ್ಲಿ ಮತ್ತೊಂದು ಸ್ವರ್ಗ ! ಸಗ್ಗದೊಳಗೊಂದು ಸಗ್ಗ ! ಬದುಕಿನ ಜಂಜಾಟಗಳು ಇದ್ದದ್ದೇ ಬನ್ನಿರಿ ಗೆಳೆಯರೇ ! ಈ ಅಪರ ಸ್ವರ್ಗವನ್ನು ನೋಡಿ ನಲಿಯೋಣ. ನಮ್ಮ ನೆಲವನ್ನು ಸಗ್ಗವಾಗಿಸೋಣ !
ಶ್ರೀ ಮುರಳೀಧರ ಹೆಚ್ ಆರ್ ಮೂಲತಃ ಚಿತ್ರದುರ್ಗ ಜಿಲ್ಲೆಯ ಹೊಸದುರ್ಗ ತಾಲ್ಲೂಕಿನ ಹೆಗ್ಗೆರೆ ಗ್ರಾಮದವರು ಪ್ರಸ್ತುತ ತಿಪಟೂರಿನ ಬಾಲಕಿಯರ ಸರ್ಕಾರೀ ಪದವಿ ಪೂರ್ವ ಕಾಲೇಜಿನ ಪ್ರಾಢಶಾಲಾ ವಿಭಾಗದಲ್ಲಿ ಕನ್ನಡ ಭಾಷಾ ಉಪದಾಧ್ಯಾಯರಾಗಿ ಕರ್ತವ್ಯ ನಿರ್ವಹಿಸುತ್ತಿದ್ದಾರೆ. ಸಾಹಿತ್ಯ, ಕಲೆ, ಸಂಗೀತ ಮೊದಲಾದವುಗಳಲ್ಲಿ ಸಕ್ರಿಯವಾಗಿ ತೊಡಗಿಸಿಕೊಂಡಿರುವ ಇವರು ಶಿಕ್ಷಣ ಇಲಾಖೆಯಲ್ಲಿ ರಾಜ್ಯಮಟ್ಟದ ಸಂಪನ್ನೂಲ ವ್ಯಕ್ತಿಯಾಗಿ ತಮ್ಮನ್ನು ತೊಡಗಿಸಿಕೊಂಡವರು. "ಹೊರಬೀಡು" ಇವರ ಕಥಾ ಸಂಕಲನವಾಗಿದೆ. ಇದಾಗಲೇ ಎಂಟುನೂರಕ್ಕೂ ಅಧಿಕ ಮುಕ್ತಕಗಳನ್ನು ಅರ್ಥ ಸಹಿತ ಬರೆದು ಸಾಮಾಜಿಕ ಜಾಲತಾಣಗಳಲ್ಲೂ ಪ್ರಸಿದ್ಧರಾಗಿದ್ದಾರೆ.
Latest posts by ಶ್ರೀ ಮುರಳೀಧರ ಹೆಚ್ ಆರ್ (see all)
- ಭವ ಕಳೆವ ಶಿವ ಸತ್ಯ - September 6, 2021
- ಬಾಳಿನಾಹವ - September 4, 2021
- ಪಿಡಿದರಿವಿನೊಳ್ಮಾಗು - September 3, 2021
