ನೇಕಾರನರ್ತಿಯಿಂ
ನೂಲಿನೆಳೆಗಳ ಪಿಡಿದು
ಅಡ್ಡದೆಳೆಯುದ್ದದೆಳೆ
ಹೊಂದಿಸುವನಲ್ತೆ !
ನೋವ್ನಲಿವಿನೆಳೆಗಳಿಂ
ನೇಕಾರ ಹೊಂದಿಸಿದ
ಬಾಳ ಬಟ್ಟೆಯ ನೋಡೊ
ಜಾಣಮೂರ್ಖ //
ನಾವೆಲ್ಲಾ ತರಾವರಿ ಬಣ್ಣ ಬಣ್ಣದ ಬಟ್ಟೆಗಳನ್ನು ಧರಿಸುತ್ತೇವೆ ! ಚಂದವಾಗಿ ಕಾಣಬೇಕೆಂದು ಅಲ್ಲವೇ ಗೆಳೆಯರೇ ? ಅದರ ಹಿಂದೆ ಬಟ್ಟೆ ನೆಯ್ದವನ ತುಂಬುಶ್ರಮವಿರುತ್ತದೆ. ಸ್ವಲ್ಪ ಸೂಕ್ಷ್ಮವಾಗಿ ಗಮನಿಸಿ ನೂಲಿನ ಎಳೆಗಳು ಅಡ್ಡವಾಗಿಯೂ , ಉದ್ದುದ್ದವಾಗಿಯೂ ಜೋಡಿಸಲ್ಪಟ್ಟು ನೆಯ್ದ ಸುಂದರ ವಸ್ತ್ರವದು ! ಈ ಬದುಕೂ ಕೂಡ ಹಾಗೆಯೇ ಗೆಳೆಯರೇ ! ದೇವನೆಂಬ ನೇಕಾರನು ನೋವು ನಲಿವುಗಳೆಂಬ ಎಳೆಗಳನ್ನು ಅಡ್ಡಡ್ಡ ಉದ್ದುದ್ದವಾಗಿ ಸಮಾನವಾಗಿ ಜೋಡಿಸಿ ನೆಯ್ದಂತಹಾ ಬಾಳಬಟ್ಟೆ ಇದು. ಬರೀ ಉದ್ದವಾಗಿಯೋ ಅಥವಾ ಅಡ್ಡವಾಗಿಯೋ ಎಳೆಗಳನ್ನು ಜೋಡಿಸಿ ವಸ್ತ್ರವನ್ನು ನೇಯಲಾದೀತೆ ಗೆಳೆಯರೇ ? ಕಷ್ಟ ಸುಖ ನೋವು ನಲಿವುಗಳು ಬಾಳಬಟ್ಟೆಗೆ ಅಗತ್ಯವಾದವುಗಳು ತಾನೆ. ಕಷ್ಟದಲ್ಲಿ ಸುಖದ ಮಹತ್ವ ! ಸುಖದ ದೆಸೆಯಿಂದ ಕಷ್ಟದ ಮಹತ್ವಗಳು ತಿಳಿಯುವಂತೆ ರೂಪುಗೊಂಡ ಸುಂದರ ನೇಯ್ಗೆ ಈ ಜೀವನ ! ಅಲ್ಲವೇ ಗೆಳೆಯರೇ !?
ಶ್ರೀ ಮುರಳೀಧರ ಹೆಚ್ ಆರ್ ಮೂಲತಃ ಚಿತ್ರದುರ್ಗ ಜಿಲ್ಲೆಯ ಹೊಸದುರ್ಗ ತಾಲ್ಲೂಕಿನ ಹೆಗ್ಗೆರೆ ಗ್ರಾಮದವರು ಪ್ರಸ್ತುತ ತಿಪಟೂರಿನ ಬಾಲಕಿಯರ ಸರ್ಕಾರೀ ಪದವಿ ಪೂರ್ವ ಕಾಲೇಜಿನ ಪ್ರಾಢಶಾಲಾ ವಿಭಾಗದಲ್ಲಿ ಕನ್ನಡ ಭಾಷಾ ಉಪದಾಧ್ಯಾಯರಾಗಿ ಕರ್ತವ್ಯ ನಿರ್ವಹಿಸುತ್ತಿದ್ದಾರೆ. ಸಾಹಿತ್ಯ, ಕಲೆ, ಸಂಗೀತ ಮೊದಲಾದವುಗಳಲ್ಲಿ ಸಕ್ರಿಯವಾಗಿ ತೊಡಗಿಸಿಕೊಂಡಿರುವ ಇವರು ಶಿಕ್ಷಣ ಇಲಾಖೆಯಲ್ಲಿ ರಾಜ್ಯಮಟ್ಟದ ಸಂಪನ್ನೂಲ ವ್ಯಕ್ತಿಯಾಗಿ ತಮ್ಮನ್ನು ತೊಡಗಿಸಿಕೊಂಡವರು. "ಹೊರಬೀಡು" ಇವರ ಕಥಾ ಸಂಕಲನವಾಗಿದೆ. ಇದಾಗಲೇ ಎಂಟುನೂರಕ್ಕೂ ಅಧಿಕ ಮುಕ್ತಕಗಳನ್ನು ಅರ್ಥ ಸಹಿತ ಬರೆದು ಸಾಮಾಜಿಕ ಜಾಲತಾಣಗಳಲ್ಲೂ ಪ್ರಸಿದ್ಧರಾಗಿದ್ದಾರೆ.
Latest posts by ಶ್ರೀ ಮುರಳೀಧರ ಹೆಚ್ ಆರ್ (see all)
- ಭವ ಕಳೆವ ಶಿವ ಸತ್ಯ - September 6, 2021
- ಬಾಳಿನಾಹವ - September 4, 2021
- ಪಿಡಿದರಿವಿನೊಳ್ಮಾಗು - September 3, 2021
