ಜೀವನ ಪ್ರೀತಿ

ಗೊಂದಲದೊಳೊಂದು ಮರು
ಸಂದೆಯದ ಸುಳಿಯೇಳೆ
ಉತ್ತರವದೆಲ್ಲಿಹುದು
ಬಾಳ ಪಯಣದಲಿ !?
ಸಂದೆಯದ ಸಂದಿನಲಿ
ಬಾಳ ಭರವಸೆ ಸೋರೆ
ಪೋಪುದೆಲ್ಲಿಗೆ ಪೇಳು
ಜಾಣಮೂರ್ಖ //

ಒಮ್ಮೊಮ್ಮೆ ನಮ್ಮ ಮನಸ್ಥಿತಿ ಹೇಗಾಗುತ್ತದೆ ಎಂದರೆ ಗೊಂದಲದ ಗೂಡಾಗಿಬಿಡುತ್ತದೆ. ಮೊದಲೇ ಗೊಂದಲ ! ಅದರೊಳಗೆ ಮತ್ತೊಂದು ಸಂದೇಹ ! ಈ ಕೆಲಸ ಮಾಡುವುದೋ , ಬೇಡವೋ ! ಏನಾದರೂ ಕೆಟ್ಟದ್ದು ಸಂಭವಿಸಿದರೆ ಗತಿಯೇನು !? ಎಂದು ಮೊದಲೇ ಋಣಾತ್ಮಕವಾಗಿ ಚಿಂತಿಸುತ್ತಾ ಸಾಗಿದರೆ ಮನದ ಗೊಂದಲಕ್ಕೆ ಉತ್ತರ ಸಿಗುವುದಾದರೂ ಹೇಗೆ ? ಮನಸ್ಸಿನ ಸಂದೇಹಗಳನ್ನು ಬಿಡಯ್ಯಾ ಗೆಳೆಯ. ಒಳ್ಳೆಯದನ್ನು ಚಿಂತಿಸಿ ಕಾರ್ಯಪ್ರವೃತ್ತರಾದರೆ ಒಳ್ಳೆಯದೇ ಆಗುತ್ತದೆ. ಮತ್ತೆ ಸಂದೇಹದ ಸುಳಿಯೇಕೆ ? ಸಂದೇಹದ ಸಂದುಗಳಲ್ಲಿ ಬದುಕಿನ ಭರವಸೆಯೇ ಸೋರಿ ಹೋದರೆ ! ನಮ್ಮಲ್ಲೇ ನಮಗೆ ಅಪನಂಬಿಕೆ (Distrust with ourself !) ಉಂಟಾದರೆ ಯಾರ ಬಳಿ ಹೋಗುವುದು ? ಅಲ್ಲವೇ ಗೆಳೆಯರೇ ? ಆದ್ದರಿಂದ ಒಳ್ಳೆಯ ಉದ್ದೇಶ ಮತ್ತು ಆತ್ಮವಿಶ್ವಾಸದಿಂದ ಬದುಕಿನಲ್ಲಿ ಮುನ್ನಡೆಯಬೇಕು. ಒಂದುವೇಳೆ ಸೋತರೇನಂತೆ ? ಮತ್ತೆ ಪ್ರಯತ್ನಿಸಿ ಗೆದ್ದರಾಯ್ತು ಎಂಬ ಧೈರ್ಯದಿಂದ ಮುನ್ನಡೆಯಬೇಕು. ಮತ್ತೇನಾದರೂ ಗೊಂದಲವೇ ?!!

Author
Recent Posts

ಶ್ರೀ ಮುರಳೀಧರ ಹೆಚ್ ಆರ್

ಶ್ರೀ ಮುರಳೀಧರ ಹೆಚ್ ಆರ್ ಮೂಲತಃ ಚಿತ್ರದುರ್ಗ ಜಿಲ್ಲೆಯ ಹೊಸದುರ್ಗ ತಾಲ್ಲೂಕಿನ ಹೆಗ್ಗೆರೆ ಗ್ರಾಮದವರು ಪ್ರಸ್ತುತ ತಿಪಟೂರಿನ ಬಾಲಕಿಯರ ಸರ್ಕಾರೀ ಪದವಿ ಪೂರ್ವ ಕಾಲೇಜಿನ ಪ್ರಾಢಶಾಲಾ ವಿಭಾಗದಲ್ಲಿ ಕನ್ನಡ ಭಾಷಾ ಉಪದಾಧ್ಯಾಯರಾಗಿ ಕರ್ತವ್ಯ ನಿರ್ವಹಿಸುತ್ತಿದ್ದಾರೆ. ಸಾಹಿತ್ಯ, ಕಲೆ, ಸಂಗೀತ ಮೊದಲಾದವುಗಳಲ್ಲಿ ಸಕ್ರಿಯವಾಗಿ ತೊಡಗಿಸಿಕೊಂಡಿರುವ ಇವರು ಶಿಕ್ಷಣ ಇಲಾಖೆಯಲ್ಲಿ ರಾಜ್ಯಮಟ್ಟದ ಸಂಪನ್ನೂಲ ವ್ಯಕ್ತಿಯಾಗಿ ತಮ್ಮನ್ನು ತೊಡಗಿಸಿಕೊಂಡವರು. "ಹೊರಬೀಡು" ಇವರ ಕಥಾ ಸಂಕಲನವಾಗಿದೆ. ಇದಾಗಲೇ ಎಂಟುನೂರಕ್ಕೂ ಅಧಿಕ ಮುಕ್ತಕಗಳನ್ನು ಅರ್ಥ ಸಹಿತ ಬರೆದು ಸಾಮಾಜಿಕ ಜಾಲತಾಣಗಳಲ್ಲೂ ಪ್ರಸಿದ್ಧರಾಗಿದ್ದಾರೆ.

Latest posts by ಶ್ರೀ ಮುರಳೀಧರ ಹೆಚ್ ಆರ್ (see all)