ಅದೆಲ್ಲಿ ಹುಡುಕುವೆಯವನ !

ಅನ್ನಬೊಮ್ಮನು ದಿನವು
ಚೈತನ್ಯವೀವನೈ !
ಜ್ಞಾನಬೊಮ್ಮನು ಅರಿವ
ದಾರಿಯನು ತೋರ್ವ !
ಬದುಕನಿತ್ತಿಹ ಪಂಚ
ಭೂತಂಗಳೊಲುಮಿರಲ
ದೆಲ್ಲಿ ಹುಡುಕುವೆಯವನ !
ಜಾಣಮೂರ್ಖ //

ಈಗ ಈ ವಿಚಾರ ಎಷ್ಟು ವಿಚಿತ್ರ ಎಂದರೆ ಸತ್ಯವು ನಮಗೆ ತಿಳಿದಿದ್ದರೂ ಕೂಡ ಮತ್ತೆ ಮತ್ತೆ ಅದೇ ತಪ್ಪು ಮಾಡುತ್ತೇವೆ. ಭಗವಂತನು ನಮ್ಮನ್ನು ಕಾಪಾಡುತ್ತಾನೆ ಹೌದು ತಾನೆ ? ಯಾವಾಗ ? ಹೇಗೆ ? ಯಾವ ರೂಪದಲ್ಲಿ ? ಈ ಪ್ರಶ್ನೆಗಳನ್ನು ಹಾಕಿಕೊಳ್ಳೋಣ. ಅನ್ನಬ್ರಹ್ಮನು ಹಸಿವನ್ನು ಕಳೆದು ಚೈತನ್ಯವೀಯುತ್ತಾನೆ ! ಜ್ಞಾನ ಬ್ರಹ್ಮನು ಅರಿವಿನ ಬಲದಿಂದ ಬದುಕುವ ದಾರಿಯನ್ನು ತೋರುತ್ತಾನೆ. ನಾವು ಬದುಕಲು ಪಂಚಭೂತಗಳು ಬೆನ್ನೆಲುಬಾಗಿವೆ. ಇವುಗಳಲ್ಲಿ ಒಂದಿಲ್ಲದಿದ್ದರೂ ಬದುಕೇ ಇಲ್ಲ. ಹೆಜ್ಜೆ ಹೆಜ್ಜೆಗೂ ನಮ್ಮ ಬದುಕಿಗೆ ಆಧಾರವಾಗಿರುವ ಈ ಎಲ್ಲಾ ಭಗವದಂಶಗಳನ್ನು ಲೆಕ್ಕಿಸದೇ ಆ ದೇವರನ್ನು ಎಲ್ಲೆಲ್ಲೋ ಹುಡುಕುತ್ತಿದ್ದೇವಲ್ಲಾ ನಾವು ! ಸ್ವಲ್ಪ ಹಾಗೇ ಪರಾಮರ್ಶಿಸಿ ದೇವನು ಸದಾಕಾಲ ನಮ್ಮ ಜೊತೆಯಲ್ಲೇ ಇದ್ದಾನೆ ! ನೋಡುವ ಕಣ್ಣು ಬೇಕಷ್ಟೆ ನಮಗೆ. ನಮ್ಮ ಹಿರಿಯರು ಅವನನ್ನು ಭಕ್ತರ ಬಂಧು ಎನ್ನುತ್ತಿದ್ದರು. ಆದರೆ ಅಷ್ಟೇ ಅಲ್ಲ. ಅವನು ಭಾವಬಂಧುವೂ ಹೌದು. ಯದ್ಭಾವಂ ತದ್ಭವತಿ ಮನಸ್ಸಿನಂತೆ ಮಹದೇವ ಎನ್ನುವರಲ್ಲಾ ಹಾಗೆ. ಅಲ್ಲವೇ ಗೆಳೆಯರೇ ?

Author
Recent Posts

ಶ್ರೀ ಮುರಳೀಧರ ಹೆಚ್ ಆರ್

ಶ್ರೀ ಮುರಳೀಧರ ಹೆಚ್ ಆರ್ ಮೂಲತಃ ಚಿತ್ರದುರ್ಗ ಜಿಲ್ಲೆಯ ಹೊಸದುರ್ಗ ತಾಲ್ಲೂಕಿನ ಹೆಗ್ಗೆರೆ ಗ್ರಾಮದವರು ಪ್ರಸ್ತುತ ತಿಪಟೂರಿನ ಬಾಲಕಿಯರ ಸರ್ಕಾರೀ ಪದವಿ ಪೂರ್ವ ಕಾಲೇಜಿನ ಪ್ರಾಢಶಾಲಾ ವಿಭಾಗದಲ್ಲಿ ಕನ್ನಡ ಭಾಷಾ ಉಪದಾಧ್ಯಾಯರಾಗಿ ಕರ್ತವ್ಯ ನಿರ್ವಹಿಸುತ್ತಿದ್ದಾರೆ. ಸಾಹಿತ್ಯ, ಕಲೆ, ಸಂಗೀತ ಮೊದಲಾದವುಗಳಲ್ಲಿ ಸಕ್ರಿಯವಾಗಿ ತೊಡಗಿಸಿಕೊಂಡಿರುವ ಇವರು ಶಿಕ್ಷಣ ಇಲಾಖೆಯಲ್ಲಿ ರಾಜ್ಯಮಟ್ಟದ ಸಂಪನ್ನೂಲ ವ್ಯಕ್ತಿಯಾಗಿ ತಮ್ಮನ್ನು ತೊಡಗಿಸಿಕೊಂಡವರು. "ಹೊರಬೀಡು" ಇವರ ಕಥಾ ಸಂಕಲನವಾಗಿದೆ. ಇದಾಗಲೇ ಎಂಟುನೂರಕ್ಕೂ ಅಧಿಕ ಮುಕ್ತಕಗಳನ್ನು ಅರ್ಥ ಸಹಿತ ಬರೆದು ಸಾಮಾಜಿಕ ಜಾಲತಾಣಗಳಲ್ಲೂ ಪ್ರಸಿದ್ಧರಾಗಿದ್ದಾರೆ.

Latest posts by ಶ್ರೀ ಮುರಳೀಧರ ಹೆಚ್ ಆರ್ (see all)