ಬಣ್ಣ ಗಾಜಲಿ ನೋಡ
ಲೆಲ್ಲವದೆ ಬಣ್ಣ ಕಾಣ್
ಅಂತೆ ಸತ್ಯಕೆ ಮಿಥ್ಯ
ದಾ ಬಣ್ಣವಯ್ಯೋ !
ಗಾಜಿಗಂಟಿದ ಬಣ್ಣ
ಕಳೆದಾಗಲಲ್ಲೆ ನಿಜ
ವೇದ್ಯವೈ ಸತ್ಯಾರ್ಥ
ಜಾಣಮೂರ್ಖ //
ಬಣ್ಣದ ಗಾಜಿನಲ್ಲಿ ಭೌತಿಕ ಜಗತ್ತನ್ನು ನೋಡಿದರೆ ಗಾಜು ಯಾವ ಬಣ್ಣದಲ್ಲಿರುತ್ತದೋ ಜಗತ್ತೂ ಅದೇ ಬಣ್ಣದಲ್ಲಿಯೇ ಕಾಣುತ್ತದೆ. ಹಾಗೆಯೇ ಗಾಜಿನ ಬಣ್ಣವನ್ನು ಕಳೆದು ನೋಡಿದರೆ ಆ ವಸ್ತುವಿನ ನಿಜಸ್ಥಿತಿ ತಿಳಿಯುತ್ತದೆ. ಅಲ್ಲವೇ !? ಹಾಗೆಯೇ ಈ ಬದುಕಿನಲ್ಲಿ ಸತ್ಯಕ್ಕೆ ಮಿಥ್ಯದ ಮುಸುಕಿದೆ ! ಮನಸ್ಸಿಗೆ ಮಾಯೆಯ ಮುಸುಕಿದೆ ! ಅವು ಗಾಜಿನ ಬಣ್ಣದಂತೆ ಜಗದ ಸತ್ಯದ ನೈಜತೆಯನ್ನು ಅರಿಯಲು ಬಿಡುವುದಿಲ್ಲ. ಅದಕ್ಕೆ ಜ್ಞಾನಿಗಳು, ಪ್ರಾಜ್ಞರು ಗಾಜಿನ ಬಣ್ಣವನ್ನು ಮೊದಲು ಕಳೆದು ಸತ್ಯದ ನೈಜತೆಯನ್ನೇ ನೋಡಿ ಆನಂದಿಸುತ್ತಾರೆ. ಮಿಥ್ಯ ಮತ್ತು ಮಾಯೆಯ ಬಣ್ಣವನ್ನು ಕಳೆದು ನೋಡಿದಾಗ ಬದುಕಿನ ವಾಸ್ತವ ಸತ್ಯವು ಗೋಚರಿಸುತ್ತದೆ. ಆ ನಂತರವೇ ಆನಂದಮಯ ಈ ಜಗ ಹೃದಯ ! ಮತ್ತೆ ಭಯ , ಚಿಂತೆ ದುಃಖ ಉದ್ವೇಗಾದಿಗಳಿಗೆಲ್ಲ ಜಾಗವೆಲ್ಲಿ ? ಅಲ್ಲವೇ ಗೆಳೆಯರೇ ?
ಶ್ರೀ ಮುರಳೀಧರ ಹೆಚ್ ಆರ್ ಮೂಲತಃ ಚಿತ್ರದುರ್ಗ ಜಿಲ್ಲೆಯ ಹೊಸದುರ್ಗ ತಾಲ್ಲೂಕಿನ ಹೆಗ್ಗೆರೆ ಗ್ರಾಮದವರು ಪ್ರಸ್ತುತ ತಿಪಟೂರಿನ ಬಾಲಕಿಯರ ಸರ್ಕಾರೀ ಪದವಿ ಪೂರ್ವ ಕಾಲೇಜಿನ ಪ್ರಾಢಶಾಲಾ ವಿಭಾಗದಲ್ಲಿ ಕನ್ನಡ ಭಾಷಾ ಉಪದಾಧ್ಯಾಯರಾಗಿ ಕರ್ತವ್ಯ ನಿರ್ವಹಿಸುತ್ತಿದ್ದಾರೆ. ಸಾಹಿತ್ಯ, ಕಲೆ, ಸಂಗೀತ ಮೊದಲಾದವುಗಳಲ್ಲಿ ಸಕ್ರಿಯವಾಗಿ ತೊಡಗಿಸಿಕೊಂಡಿರುವ ಇವರು ಶಿಕ್ಷಣ ಇಲಾಖೆಯಲ್ಲಿ ರಾಜ್ಯಮಟ್ಟದ ಸಂಪನ್ನೂಲ ವ್ಯಕ್ತಿಯಾಗಿ ತಮ್ಮನ್ನು ತೊಡಗಿಸಿಕೊಂಡವರು. "ಹೊರಬೀಡು" ಇವರ ಕಥಾ ಸಂಕಲನವಾಗಿದೆ. ಇದಾಗಲೇ ಎಂಟುನೂರಕ್ಕೂ ಅಧಿಕ ಮುಕ್ತಕಗಳನ್ನು ಅರ್ಥ ಸಹಿತ ಬರೆದು ಸಾಮಾಜಿಕ ಜಾಲತಾಣಗಳಲ್ಲೂ ಪ್ರಸಿದ್ಧರಾಗಿದ್ದಾರೆ.
Latest posts by ಶ್ರೀ ಮುರಳೀಧರ ಹೆಚ್ ಆರ್ (see all)
- ಭವ ಕಳೆವ ಶಿವ ಸತ್ಯ - September 6, 2021
- ಬಾಳಿನಾಹವ - September 4, 2021
- ಪಿಡಿದರಿವಿನೊಳ್ಮಾಗು - September 3, 2021
