ಹೃದಯ ವಿಡಿವವಗೆ ಜಗ
ವೊಂದು ಸುಂದರ ಗುಡಿಯು
ಮಿಡಿಯದವಗೇನಿಹುದು
ಬರಿ ಕಲ್ಲು ಮಣ್ಣು !
ಕಾಣ್ವವಗೆ ಕಲ್ಲಿನಲು
ದೇವನಿಹ ವೈಚಿತ್ರ್ಯ !
ಕಾಣ್ದವಗೆ ಜೀವಜಡ
ಜಾಣಮೂರ್ಖ //
ಶರೀರದಲ್ಲಿನ ಭೌತಿಕವಾದ ಹೃದಯ ಎಲ್ಲರಿಗೂ ಇರುವುದಾದರೂ ಅದು ಭಾವುಕತೆಯಿಂದ ಮಿಡಿಯಬೇಕು. ಹಾಗೆ ಹೃದಯ ಮಿಡಿಯುವವರಿಗೆ ಇಡೀ ಜಗತ್ತೇ ಒಂದು ಸುಂದರ ಗುಡಿ. ವಿಶ್ವದ ಚರಾಚರ ವಸ್ತುಗಳೆಲ್ಲದರಲ್ಲೂ ಅಡಗಿರುವ ಚೈತನ್ಯವನ್ನು ಅವರು ಗುರ್ತಿಸಬಲ್ಲರು. ಹೃದಯ ಮಿಡಿಯದವರಿಗೆ ಅನಂತ ಸೃಷ್ಟಿಯೇ ಬರೀ ಕಲ್ಲು… ಮಣ್ಣು… ಕಾಡು….ಮೇಡು….ಅಷ್ಟೆ. ತನ್ನೊಳಗಿನ ಚೈತನ್ಯವನ್ನೇ ಅವರು ಕಾಣರು ! ಇನ್ನು ಅಖಂಡ ಸೃಷ್ಟಿಯಲ್ಲಡಗಿರುವ ಚೈತನ್ಯದ ಮಾತೆಲ್ಲಿ !? ಕಾಣ್ವ ಕಣ್ಣಿರುವವರು ಕಲ್ಲು ಮಣ್ಣಿನಲ್ಲು ಭಗವಂತನನ್ನೇ ಕಾಣುತ್ತಾರೆ. ಆ ಕಣ್ಣು ಅರ್ಥಾತ್ ದೃಷ್ಟಿಕೋನ ಇಲ್ಲದವರಿಗೆ ಜಗತ್ತು ಜೀವಂತಿಕೆಯಿಂದ ತುಂಬಿದ್ದರೂ ಜಡವಾಗಿ ತೋರುತ್ತದೆ. ಅಲ್ಲವೇ ಗೆಳೆಯರೇ ?!
ಶ್ರೀ ಮುರಳೀಧರ ಹೆಚ್ ಆರ್ ಮೂಲತಃ ಚಿತ್ರದುರ್ಗ ಜಿಲ್ಲೆಯ ಹೊಸದುರ್ಗ ತಾಲ್ಲೂಕಿನ ಹೆಗ್ಗೆರೆ ಗ್ರಾಮದವರು ಪ್ರಸ್ತುತ ತಿಪಟೂರಿನ ಬಾಲಕಿಯರ ಸರ್ಕಾರೀ ಪದವಿ ಪೂರ್ವ ಕಾಲೇಜಿನ ಪ್ರಾಢಶಾಲಾ ವಿಭಾಗದಲ್ಲಿ ಕನ್ನಡ ಭಾಷಾ ಉಪದಾಧ್ಯಾಯರಾಗಿ ಕರ್ತವ್ಯ ನಿರ್ವಹಿಸುತ್ತಿದ್ದಾರೆ. ಸಾಹಿತ್ಯ, ಕಲೆ, ಸಂಗೀತ ಮೊದಲಾದವುಗಳಲ್ಲಿ ಸಕ್ರಿಯವಾಗಿ ತೊಡಗಿಸಿಕೊಂಡಿರುವ ಇವರು ಶಿಕ್ಷಣ ಇಲಾಖೆಯಲ್ಲಿ ರಾಜ್ಯಮಟ್ಟದ ಸಂಪನ್ನೂಲ ವ್ಯಕ್ತಿಯಾಗಿ ತಮ್ಮನ್ನು ತೊಡಗಿಸಿಕೊಂಡವರು. "ಹೊರಬೀಡು" ಇವರ ಕಥಾ ಸಂಕಲನವಾಗಿದೆ. ಇದಾಗಲೇ ಎಂಟುನೂರಕ್ಕೂ ಅಧಿಕ ಮುಕ್ತಕಗಳನ್ನು ಅರ್ಥ ಸಹಿತ ಬರೆದು ಸಾಮಾಜಿಕ ಜಾಲತಾಣಗಳಲ್ಲೂ ಪ್ರಸಿದ್ಧರಾಗಿದ್ದಾರೆ.
Latest posts by ಶ್ರೀ ಮುರಳೀಧರ ಹೆಚ್ ಆರ್ (see all)
- ಭವ ಕಳೆವ ಶಿವ ಸತ್ಯ - September 6, 2021
- ಬಾಳಿನಾಹವ - September 4, 2021
- ಪಿಡಿದರಿವಿನೊಳ್ಮಾಗು - September 3, 2021
