ಎಡವಿದೆಡೆಯಲೆ ಮತ್ತೆ
ಎಡವದಿರು ಓ ಮನವೆ !
ಪಿಂತಿನೆಡಹಿನ ಕತೆಯ
ಮರೆಯದಿರು ಮನವೆ !
ಸೋತ ಧರ್ಮಜ ಮತ್ತೆ
ಲೆತ್ತಕ್ಕೆ ಚಿತ್ತಕೊಡೆ
ಯುದ್ಧಕಾಯ್ತದು ಹೇತು
ಜಾಣಮೂರ್ಖ //
ಓ, ಗೆಳೆಯಾ ! ನಾವು ಬದುಕಿನಲ್ಲಿ ಮತ್ತೆ ಮತ್ತೆ ಎಡವುತ್ತಿದ್ದೇವೆ. ಅದೂ ಎಡವಿದ ಎಡೆಯಲ್ಲೆ ಮತ್ತೆ ಎಡವುತ್ತಿದ್ದೇವೆ. ಇದು ಇಂದು ನಿನ್ನೆಯದಲ್ಲ . ಪುರಾತನ ಕಾಲದಿಂದಲೂ ಹೀಗೇನೆ. ಆ ಹಿಂದಿನ ಕತೆಯನ್ನು ನಾವು ಮರೆಯಬಾರದಷ್ಟೆ. ಮೊದಲ ಬಾರಿ ಲೆತ್ತದಲ್ಲಿ ಸೋತ ಧರ್ಮಜನನ್ನು ದುರ್ಯೋಧನ ಮತ್ತೆ ಲೆತ್ತವಾಡಲು ಕರೆಯುತ್ತಾನೆ. ವಿಧುರನು ಬೇಡವೆಂದು ಹೇಳಿದರೂ ಸಹ ಧರ್ಮಜನು ಮತ್ತೆ ಪಗಡೆಯಾಡಿ ಎಲ್ಲವನ್ನೂ ಕಳೆದುಕೊಂಡು , ಕಡೆಗೆ ತನ್ನ ಪತ್ನಿ ದ್ರೌಪದಿಯನ್ನೂ ಫಣಕ್ಕಿಡುತ್ತಾನೆ. ಹೀಗೆ ಎಡವಿದ ಕಡೆಯಲ್ಲೇ ಮತ್ತೆ ಎಡವಿದ. ತೆಗೆದುಕೊಂಡ ಒಂದು ದುಡುಕು ನಿರ್ಧಾರ ಘೋರ ಮಹಾಭಾರತ ಯುದ್ಧಕ್ಕೆ ಕಾರಣವಾಗಿಬಿಟ್ಟಿತು. ಆದ್ದರಿಂದ ನಾವು ಆಡುವ ನುಡಿ , ಮಾಡುವ ಕಾರ್ಯಗಳು ದೂರದೃಷ್ಟಿಯಿಂದ ಮಾಡಬೇಕು. ದುಡುಕಬಾರದು. ದುಡುಕಿ ಅನಾಹುತಗಳಿಗೆ ಎಡೆಮಾಡಿಕೊಡಬಾರದು. ಅಲ್ಲವೇ ಗೆಳೆಯರೇ !?
ಶ್ರೀ ಮುರಳೀಧರ ಹೆಚ್ ಆರ್ ಮೂಲತಃ ಚಿತ್ರದುರ್ಗ ಜಿಲ್ಲೆಯ ಹೊಸದುರ್ಗ ತಾಲ್ಲೂಕಿನ ಹೆಗ್ಗೆರೆ ಗ್ರಾಮದವರು ಪ್ರಸ್ತುತ ತಿಪಟೂರಿನ ಬಾಲಕಿಯರ ಸರ್ಕಾರೀ ಪದವಿ ಪೂರ್ವ ಕಾಲೇಜಿನ ಪ್ರಾಢಶಾಲಾ ವಿಭಾಗದಲ್ಲಿ ಕನ್ನಡ ಭಾಷಾ ಉಪದಾಧ್ಯಾಯರಾಗಿ ಕರ್ತವ್ಯ ನಿರ್ವಹಿಸುತ್ತಿದ್ದಾರೆ. ಸಾಹಿತ್ಯ, ಕಲೆ, ಸಂಗೀತ ಮೊದಲಾದವುಗಳಲ್ಲಿ ಸಕ್ರಿಯವಾಗಿ ತೊಡಗಿಸಿಕೊಂಡಿರುವ ಇವರು ಶಿಕ್ಷಣ ಇಲಾಖೆಯಲ್ಲಿ ರಾಜ್ಯಮಟ್ಟದ ಸಂಪನ್ನೂಲ ವ್ಯಕ್ತಿಯಾಗಿ ತಮ್ಮನ್ನು ತೊಡಗಿಸಿಕೊಂಡವರು. "ಹೊರಬೀಡು" ಇವರ ಕಥಾ ಸಂಕಲನವಾಗಿದೆ. ಇದಾಗಲೇ ಎಂಟುನೂರಕ್ಕೂ ಅಧಿಕ ಮುಕ್ತಕಗಳನ್ನು ಅರ್ಥ ಸಹಿತ ಬರೆದು ಸಾಮಾಜಿಕ ಜಾಲತಾಣಗಳಲ್ಲೂ ಪ್ರಸಿದ್ಧರಾಗಿದ್ದಾರೆ.
Latest posts by ಶ್ರೀ ಮುರಳೀಧರ ಹೆಚ್ ಆರ್ (see all)
- ಭವ ಕಳೆವ ಶಿವ ಸತ್ಯ - September 6, 2021
- ಬಾಳಿನಾಹವ - September 4, 2021
- ಪಿಡಿದರಿವಿನೊಳ್ಮಾಗು - September 3, 2021
