ಘನ- ಅಘನ

ಬಾಲ್ಯದಾ ಘನವೆಲ್ಲ
ಪ್ರೌಢನಾಗಲುವಘನ
ಪ್ರೌಢ ಮಾಗಲು ಮತ್ತೆ
ಘನವೆಲ್ಲವಘನ !
ಕಳೆದುದೆಲ್ಲವು ಹಳೆಯ
ಹೊತ್ತಗೆಯ ವೊಲು ತೋರ್ದು
ದೊಣಕೊರಡು ಕೊನರೀತೆ !
ಜಾಣಮೂರ್ಖ !?

ಕಳೆದಿರುವ ಬದುಕನ್ನು ಹಾಗೇ ಸುಮ್ಮನೇ ನೋಡಿ. ಬಾಲ್ಯದಲ್ಲಿ ಯಃಕಶ್ಚಿತ್ ಆದುದೆಲ್ಲಾ ತುಂಬಾ ಘನವಾಗಿ ಕಂಡಿರುತ್ತೆ. ಅಂದಿಗೆ ಅದು ಘನವೇ. ಸ್ವಲ್ಪ ದೊಡ್ಡವರಾದ ಮೇಲೆ ಅಯ್ಯೋ ಇದಕ್ಕಾಗಿ ಇಷ್ಟೊಂದು ಹಾರಾಡಿದೆನಾ ನಾನು ಅನ್ನಿಸುತ್ತೆ. ಈ ಪ್ರೌಢತ್ವ ವಯಸ್ಸು ಕಳೆದಂತೆ ಮತ್ತೆ ಮಾಗುತ್ತದೆ. ಬಾಳ ಲೌಕಿಕವನ್ನೆಲ್ಲಾ ಮನದ ಅನುಭವದ ಜೊತೆ ನಾದಿದಾಗ ಮುಂದಿನದೆಲ್ಲಾ ತೀರಾ ಕನಿಷ್ಠವೆನಿಸುತ್ತಾ ಹೋಗುತ್ತವೆ. ಕಳೆದ ಬದುಕು ಓದಿದ ಹಳೆಯ ಪುಸ್ತಕದಂತೆ ಗೋಚರವಾಗುತ್ತವೆ. ಅಷ್ಟು ಹೊತ್ತಿಗೆ ಮನದ ಮೋಹಗಳೆಲ್ಲಾ ಅಳಿದು ಕೊನರದ ಕೊರಡಿನಂತಾಗಿರುತ್ತೇವೆ. ಒಣಕೊರಡು ಚಿಗುರುವುದೆಂತು ? ಹೀಗೆ ಬದುಕು ಹಣ್ಣಾದಂತೆ ಮೋಹವಳಿಯಬೇಕು. ಮನಸ್ಸು ಹಣ್ಣಾಗಿ ಮಾಗಿ ಮಧುರವಾಗಿ ಕಡೆಗೆ ಪೂರ್ಣತ್ವದಲ್ಲಿ ಸೇರಿ , ಪೂರ್ಣವೇ ಆಗಿ ಶೂನ್ಯದಲ್ಲಿ ಸೇರಿ ಹೋಗಬೇಕು. ಇರಿ, ಇರಿ ಈ ಸ್ಥಿತಿ ಇನ್ನೂ ಕೊನೆಗೆ. ಈಗ ಬದುಕನ್ನು ಪ್ರೀತಿಸಿ , ಅನುಭವಿಸಿ. ಅನುಭವಿಯಾಗಿ ! ಬರೀ ಅನುಭವಿಯಾಗೇ ಉಳಿಯದೇ ಅನುಭಾವಿಯಾಗಿ. ಆ ನಂತರ ಇನ್ನಾವ ಉಪಾಧಿಗಳೂ ನಮ್ಮನ್ನು ಬಂಧಿಸಲಾರವು ! ಏನಂತೀರಿ !?

Author
Recent Posts

ಶ್ರೀ ಮುರಳೀಧರ ಹೆಚ್ ಆರ್

ಶ್ರೀ ಮುರಳೀಧರ ಹೆಚ್ ಆರ್ ಮೂಲತಃ ಚಿತ್ರದುರ್ಗ ಜಿಲ್ಲೆಯ ಹೊಸದುರ್ಗ ತಾಲ್ಲೂಕಿನ ಹೆಗ್ಗೆರೆ ಗ್ರಾಮದವರು ಪ್ರಸ್ತುತ ತಿಪಟೂರಿನ ಬಾಲಕಿಯರ ಸರ್ಕಾರೀ ಪದವಿ ಪೂರ್ವ ಕಾಲೇಜಿನ ಪ್ರಾಢಶಾಲಾ ವಿಭಾಗದಲ್ಲಿ ಕನ್ನಡ ಭಾಷಾ ಉಪದಾಧ್ಯಾಯರಾಗಿ ಕರ್ತವ್ಯ ನಿರ್ವಹಿಸುತ್ತಿದ್ದಾರೆ. ಸಾಹಿತ್ಯ, ಕಲೆ, ಸಂಗೀತ ಮೊದಲಾದವುಗಳಲ್ಲಿ ಸಕ್ರಿಯವಾಗಿ ತೊಡಗಿಸಿಕೊಂಡಿರುವ ಇವರು ಶಿಕ್ಷಣ ಇಲಾಖೆಯಲ್ಲಿ ರಾಜ್ಯಮಟ್ಟದ ಸಂಪನ್ನೂಲ ವ್ಯಕ್ತಿಯಾಗಿ ತಮ್ಮನ್ನು ತೊಡಗಿಸಿಕೊಂಡವರು. "ಹೊರಬೀಡು" ಇವರ ಕಥಾ ಸಂಕಲನವಾಗಿದೆ. ಇದಾಗಲೇ ಎಂಟುನೂರಕ್ಕೂ ಅಧಿಕ ಮುಕ್ತಕಗಳನ್ನು ಅರ್ಥ ಸಹಿತ ಬರೆದು ಸಾಮಾಜಿಕ ಜಾಲತಾಣಗಳಲ್ಲೂ ಪ್ರಸಿದ್ಧರಾಗಿದ್ದಾರೆ.

Latest posts by ಶ್ರೀ ಮುರಳೀಧರ ಹೆಚ್ ಆರ್ (see all)