ನರಳುವುದು ತರವೆ ಪೇಳ್

ನವಿಲ ನಾಟ್ಯವ ಕಂಡು
ನೊಂದುಕೊಳ್ವುದೆ ಕಾಕ ?
ಕೋಗಿಲೆಯ ಘೂಕ ತಾಂ
ಮಚ್ಚರಿಪುದೇನು ?
ಎಮ್ಮ ಬಾಳೆಮಗಿರಲು
ಲೋಗರೊಡೆ ಹೋಲಿಸುತ
ನರಳುವುದು ತರವೆ ಪೇಳ್
ಜಾಣಮೂರ್ಖ //

ಪ್ರಾಣಿ ಪಕ್ಷಿಗಳ ಬದುಕು ಬಹು ಸುಂದರ ! ಅವು ಎಂದೂ ಇತರರೊಂದಿಗೆ ತಮ್ಮನ್ನು ಹೋಲಿಸಿಕೊಳ್ಳುವುದಿಲ್ಲ. ತಾವಾಯಿತು , ತಮ್ಮ ಬದುಕಾಯಿತೆಂದು ಇದ್ದುಬಿಡುತ್ತವೆ. ನವಿಲ ನಾಟ್ಯವ ಕಂಡು ಕಾಗೆ ಎಂದೂ ನೊಂದುಕೊಂಡಿಲ್ಲ ! ಕೋಗಿಲೆಯ ಇಂಪಾದ ಕೂಗಿಗೆ ಗೂಬೆ ಎಂದಾದರೂ ಅಸೂಯೆ ಪಟ್ಟಿದ್ದುಂಟೆ ? ಇದ್ದರೂ ! ಅದು ಮಾನವ ನಿರ್ಮಿತ ಕಥೆಗಳಲ್ಲಿ ಮಾತ್ರ ! ಏಕೆಂದರೆ ಅವು ಮನುಷ್ಯನಿಂದ ಹುಟ್ಟಿದ ಕಥೆಗಳು ! ಯದ್ಭಾವಂ ತದ್ಭವತಿ ! ನಾವು ಹೇಗೋ ನಮ್ಮಿಂದ ಹುಟ್ಟಿದ ಕಥೆಗಳಲ್ಲೂ ಅದೇ ಭಾವ ! ಇತರರೊಂದಿಗೆ ಹೋಲಿಸಿಕೊಳ್ಳದೇ ಸುಂದರವಾಗಿ ಬದುಕುವ ಅವುಗಳನ್ನು ನೋಡಿ ನಾವು ಕಲಿಯಬೇಕಿದೆ. ನಮ್ಮ ಬಾಳು ನಮಗಿದೆ. ಅದನ್ನು ಸ್ವೀಕರಿಸೋಣ. ಅದುಬಿಟ್ಟು ಇತರರೊಂದಿಗೆ ಹೋಲಿಸಿಕೊಳ್ಳುತ್ತಾ , ನರಳುತ್ತಲೇ ಬದುಕೋದು ಎಷ್ಟು ಮಾತ್ರ ಸರಿ ? ಹೀಗೆ ಹೋಲಿಸಿಕೊಳ್ಳುವುದನ್ನು ಬಿಟ್ಟು ನಿಮ್ಮ ಬದುಕನ್ನೊಮ್ಮೆ ಒಳಹೊಕ್ಕು ನೋಡಿ ! ನಿಜಕ್ಕೂ ತುಂಬಾ ಸುಂದರವಾಗಿರುತ್ತದೆ. ಲೋಗರ ಗೊಡವೆ ಬಿಡಿ. ಭಗವಂತ ಕೊಟ್ಟ ಬದುಕನ್ನು ಸಂತೋಷವಾಗಿ ಕಳೆಯೋಣ. ಅಲ್ಲವೇ ಗೆಳೆಯರೇ ?!

Author
Recent Posts

ಶ್ರೀ ಮುರಳೀಧರ ಹೆಚ್ ಆರ್

ಶ್ರೀ ಮುರಳೀಧರ ಹೆಚ್ ಆರ್ ಮೂಲತಃ ಚಿತ್ರದುರ್ಗ ಜಿಲ್ಲೆಯ ಹೊಸದುರ್ಗ ತಾಲ್ಲೂಕಿನ ಹೆಗ್ಗೆರೆ ಗ್ರಾಮದವರು ಪ್ರಸ್ತುತ ತಿಪಟೂರಿನ ಬಾಲಕಿಯರ ಸರ್ಕಾರೀ ಪದವಿ ಪೂರ್ವ ಕಾಲೇಜಿನ ಪ್ರಾಢಶಾಲಾ ವಿಭಾಗದಲ್ಲಿ ಕನ್ನಡ ಭಾಷಾ ಉಪದಾಧ್ಯಾಯರಾಗಿ ಕರ್ತವ್ಯ ನಿರ್ವಹಿಸುತ್ತಿದ್ದಾರೆ. ಸಾಹಿತ್ಯ, ಕಲೆ, ಸಂಗೀತ ಮೊದಲಾದವುಗಳಲ್ಲಿ ಸಕ್ರಿಯವಾಗಿ ತೊಡಗಿಸಿಕೊಂಡಿರುವ ಇವರು ಶಿಕ್ಷಣ ಇಲಾಖೆಯಲ್ಲಿ ರಾಜ್ಯಮಟ್ಟದ ಸಂಪನ್ನೂಲ ವ್ಯಕ್ತಿಯಾಗಿ ತಮ್ಮನ್ನು ತೊಡಗಿಸಿಕೊಂಡವರು. "ಹೊರಬೀಡು" ಇವರ ಕಥಾ ಸಂಕಲನವಾಗಿದೆ. ಇದಾಗಲೇ ಎಂಟುನೂರಕ್ಕೂ ಅಧಿಕ ಮುಕ್ತಕಗಳನ್ನು ಅರ್ಥ ಸಹಿತ ಬರೆದು ಸಾಮಾಜಿಕ ಜಾಲತಾಣಗಳಲ್ಲೂ ಪ್ರಸಿದ್ಧರಾಗಿದ್ದಾರೆ.

Latest posts by ಶ್ರೀ ಮುರಳೀಧರ ಹೆಚ್ ಆರ್ (see all)