ಮಿತ್ತುವಿನ ಕತ್ತಿ ತಾ
ನೆತ್ತಿಯೊಳು ತೂಗಿರಲು
ಕತ್ತು ವಿತ್ತದ ಕಡೆಗೆ
ಚಿತ್ತಕ್ಕೆ ಮಾಯೆ !
ಎಚ್ಚೆತ್ತು ಇತ್ತ ಬಾ
ಹೊತ್ತು ಮೀರುವುದಯ್ಯೊ
ಸತ್ತಮೇಲೊಂಟಿ ನೀ
ಜಾಣಮೂರ್ಖ//
ಸತ್ಯವು ಸಹಿಸಿಕೊಳ್ಳಲು ತುಂಬಾ ಕಷ್ಟ. ಆದರೂ ಹೇಳಿಬಿಡುತ್ತೇನೆ.ಇವತ್ತಿನ ಪರಿಸ್ಥಿತಿಯನ್ನೊಮ್ಮೆ ಹಾಗೇ ನೋಡಿದರೆ ಮೃತ್ಯು ಯಾವಾಗ ಹೇಗೆ ಬರುತ್ತದೋ ಹೇಳಲಿಕ್ಕಾಗದು ! ನಮ್ಮನ್ನು ನೋಡಿ ಅದು ನಿಜಕ್ಕೂ ನಗುತ್ತಿದೆ ! ನೆತ್ತಿಯ ಮೇಲೇಯೇ ನಾನಿದ್ದರೂ ಇವನ ಕತ್ತು ಮಾತ್ರ ವಾಲಬೇಕಾದ ಕಡೆಗೆ ವಾಲದೆ ಹಣದ ಕಡೆಗೇ ವಾಲುತ್ತಿದೆಯಲ್ಲಾ ಎಂದು ಪರಿಹಾಸ್ಯಗೈಯ್ಯುತ್ತಿದೆ ! ಆದರೂ ಚಿತ್ತವನ್ನು ಮುತ್ತಿರುವ ಮಾಯೆಯ ಗಾಢಾಂಧಕಾರದಲ್ಲಿ ಆ ಪರಿಹಾಸ್ಯವು ಕಾಣುತ್ತಲೂ ಇಲ್ಲ ! ಕೇಳುತ್ತಲೂ ಇಲ್ಲ ! ಹೀಗೆಯೇ ಸಾಗಿದರೆಂತು ಹೇಳಯ್ಯ ಗೆಳೆಯ ! ಇನ್ನಾದರೂ ಎಚ್ಚೆತ್ತುಕೋ. ಆಡಾಡುತ್ತಾ ಬದುಕಿನ ಸಂಧ್ಯಾಕಾಲ ಬಂದೇ ಬಿಡುತ್ತದೆ. ಸತ್ತ ಮೇಲಂತೂ ಹೇಳುವುದೇನಿದೆ ನಾವು ಒಂಟಿಯೇ ! ನಂಬಿದವರು ಯಾರೇ ಆಗಿರಲಿ ಜೊತೆಗೆ ಬಾರರು . ಅದು ಸಾಧ್ಯವೂ ಇಲ್ಲ. ಇನ್ನಾದರೂ ಅರಿತು ನಡೆಯಯ್ಯಾ ಗೆಳೆಯ
ಶ್ರೀ ಮುರಳೀಧರ ಹೆಚ್ ಆರ್ ಮೂಲತಃ ಚಿತ್ರದುರ್ಗ ಜಿಲ್ಲೆಯ ಹೊಸದುರ್ಗ ತಾಲ್ಲೂಕಿನ ಹೆಗ್ಗೆರೆ ಗ್ರಾಮದವರು ಪ್ರಸ್ತುತ ತಿಪಟೂರಿನ ಬಾಲಕಿಯರ ಸರ್ಕಾರೀ ಪದವಿ ಪೂರ್ವ ಕಾಲೇಜಿನ ಪ್ರಾಢಶಾಲಾ ವಿಭಾಗದಲ್ಲಿ ಕನ್ನಡ ಭಾಷಾ ಉಪದಾಧ್ಯಾಯರಾಗಿ ಕರ್ತವ್ಯ ನಿರ್ವಹಿಸುತ್ತಿದ್ದಾರೆ. ಸಾಹಿತ್ಯ, ಕಲೆ, ಸಂಗೀತ ಮೊದಲಾದವುಗಳಲ್ಲಿ ಸಕ್ರಿಯವಾಗಿ ತೊಡಗಿಸಿಕೊಂಡಿರುವ ಇವರು ಶಿಕ್ಷಣ ಇಲಾಖೆಯಲ್ಲಿ ರಾಜ್ಯಮಟ್ಟದ ಸಂಪನ್ನೂಲ ವ್ಯಕ್ತಿಯಾಗಿ ತಮ್ಮನ್ನು ತೊಡಗಿಸಿಕೊಂಡವರು. "ಹೊರಬೀಡು" ಇವರ ಕಥಾ ಸಂಕಲನವಾಗಿದೆ. ಇದಾಗಲೇ ಎಂಟುನೂರಕ್ಕೂ ಅಧಿಕ ಮುಕ್ತಕಗಳನ್ನು ಅರ್ಥ ಸಹಿತ ಬರೆದು ಸಾಮಾಜಿಕ ಜಾಲತಾಣಗಳಲ್ಲೂ ಪ್ರಸಿದ್ಧರಾಗಿದ್ದಾರೆ.
Latest posts by ಶ್ರೀ ಮುರಳೀಧರ ಹೆಚ್ ಆರ್ (see all)
- ಭವ ಕಳೆವ ಶಿವ ಸತ್ಯ - September 6, 2021
- ಬಾಳಿನಾಹವ - September 4, 2021
- ಪಿಡಿದರಿವಿನೊಳ್ಮಾಗು - September 3, 2021
