ಮರೆತೆವೇತಕೆ ನಾವು ?

ನೆಲನ ಕೊಟ್ಟವನಾರೊ
ನೀರನಿಟ್ಟವನಾರೊ
ಗಾಳಿ ಬಯಲಗ್ನಿಗಳ
ಕೊಟ್ಟವನು ಯಾರೊ
ಕೊಟ್ಟ ದೇವನು ಮೌನಿ
ಮರೆತೆವೇತಕೆ ನಾವು ?
ನಮ್ಮದೇನಿಹುದಿಲ್ಲಿ
ಜಾಣಮೂರ್ಖ //

ನಾನು , ನನ್ನದೆಂಬ ವ್ಯಾಮೋಹಕ್ಕೆ ಬಿದ್ದು ನಾವು ಸುಮ್ಮನೆ ಉದ್ವೇಗಕ್ಕೆ ಒಳಗಾಗುತ್ತಿದ್ದೇವೆ. ಲೌಕಿಕ ಬದುಕಿಗೆ ಇವೆಲ್ಲಾ ಉಪಾಧಿಗಳು ಬೇಕು ನಿಜ. (ಅಧ್ಯಾತ್ಮಿಕ ಬದುಕಿಗೆ ಬೇಡವಾದ ಎಲ್ಲವೂ ಉಪಾಧಿಗಳೇ. ಹಣ, ಆಸ್ತಿ, ಒಡವೆ, ಬಿರುದುಬಾವಲಿಗಳು ಇತ್ಯಾದಿಗಳೆಲ್ಲವೂ) ಆದರೆ ಇವುಗಳ ವ್ಯಾಮೋಹ ಅತಿಯಾಗಬಾರದು. ಅತಿಯಾದ ವ್ಯಾಮೋಹಿಗಳ ಅಂತರಂಗದ ಬದುಕು ಹೇಗಿರುತ್ತೆ ಎಂದರೆ ಅವರು ತುಂಬಾ ಬಡವರು ಮತ್ತು ಅತೃಪ್ತರಾಗಿರುತ್ತಾರೆ. ನೆಲ , ನೀರು, ಬೆಂಕಿ , ಬಯಲು , ಗಾಳಿ ಇದನ್ನೆಲ್ಲಾ ಮಾನವನಿಗೆ ನೀಡಿದ ಭಗವಂತನು ಮೌನವಾಗಿದ್ದಾನೆ. ಆದರೆ ಇದನ್ನೇ ಬಳಸಿಕೊಂಡು ಕೆರೆ ಕಟ್ಟಿಸಿ , ಬಾವಿ ತೋಡಿಸಿ, ದೇವಾಲಯ ಕಟ್ಟಿಸಿ ನಾನು ಮಾಡಿದ್ದು ಎಂದು ಹೆಸರು ಕೆತ್ತಿಸೋ ನಾವೆಷ್ಟು ಚಿಕ್ಕವರಲ್ಲವೇ ? ವಿಪರ್ಯಾಸವೆಂದರೆ ಇದಕ್ಕೆಲ್ಲಾ ಮೂಲದ್ರವ್ಯಸ್ವರೂಪನಾದ ಭಗವಂತನನ್ನೇ ಮರೆತಿರುವುದು ಮತ್ತೆ ತಾನೇ ಭಗವತ್ಸ್ವರೂಪಿ ಎಂಬ ಹುಚ್ಚು ಭ್ರಮೆ ಮತ್ತು ಅಹಂಕಾರದಲ್ಲಿ ಮೆರೆಯುತ್ತಿರುವುದು ! ದೈವಾಂಶ ಸಂಭೂತರಾದವರು ಇಂತಹಾ ಭ್ರಮೆ ಮತ್ತು ಅಹಂಕಾರಗಳಿಗೆ ಒಳಗಾಗುವುದೇ ಇಲ್ಲ. ಸ್ವಲ್ಪ ಚಿಂತಿಸಲೇ ಬೇಕು. ಅಲ್ಲವೇ ಗೆಳೆಯರೇ ?

Author
Recent Posts

ಶ್ರೀ ಮುರಳೀಧರ ಹೆಚ್ ಆರ್

ಶ್ರೀ ಮುರಳೀಧರ ಹೆಚ್ ಆರ್ ಮೂಲತಃ ಚಿತ್ರದುರ್ಗ ಜಿಲ್ಲೆಯ ಹೊಸದುರ್ಗ ತಾಲ್ಲೂಕಿನ ಹೆಗ್ಗೆರೆ ಗ್ರಾಮದವರು ಪ್ರಸ್ತುತ ತಿಪಟೂರಿನ ಬಾಲಕಿಯರ ಸರ್ಕಾರೀ ಪದವಿ ಪೂರ್ವ ಕಾಲೇಜಿನ ಪ್ರಾಢಶಾಲಾ ವಿಭಾಗದಲ್ಲಿ ಕನ್ನಡ ಭಾಷಾ ಉಪದಾಧ್ಯಾಯರಾಗಿ ಕರ್ತವ್ಯ ನಿರ್ವಹಿಸುತ್ತಿದ್ದಾರೆ. ಸಾಹಿತ್ಯ, ಕಲೆ, ಸಂಗೀತ ಮೊದಲಾದವುಗಳಲ್ಲಿ ಸಕ್ರಿಯವಾಗಿ ತೊಡಗಿಸಿಕೊಂಡಿರುವ ಇವರು ಶಿಕ್ಷಣ ಇಲಾಖೆಯಲ್ಲಿ ರಾಜ್ಯಮಟ್ಟದ ಸಂಪನ್ನೂಲ ವ್ಯಕ್ತಿಯಾಗಿ ತಮ್ಮನ್ನು ತೊಡಗಿಸಿಕೊಂಡವರು. "ಹೊರಬೀಡು" ಇವರ ಕಥಾ ಸಂಕಲನವಾಗಿದೆ. ಇದಾಗಲೇ ಎಂಟುನೂರಕ್ಕೂ ಅಧಿಕ ಮುಕ್ತಕಗಳನ್ನು ಅರ್ಥ ಸಹಿತ ಬರೆದು ಸಾಮಾಜಿಕ ಜಾಲತಾಣಗಳಲ್ಲೂ ಪ್ರಸಿದ್ಧರಾಗಿದ್ದಾರೆ.

Latest posts by ಶ್ರೀ ಮುರಳೀಧರ ಹೆಚ್ ಆರ್ (see all)