ಕೆಸರೊಳರಳಿದರೇನು
ಹಸನು ಕಮಲದ ಬದುಕು
ಮಾಸುವುದೆ ಮೋಹಕತೆ
ಕೆಸರಿನೊಡಲಿನಲಿ ?
ಹೊರಗಿನೈಹಿಕವಳಿದು
ಒಳಗಿನಾತ್ಮವು ಬೆಳಗೆ
ಕೆಸರೊಡಲ ಕಮಲ ನೀ
ಜಾಣಮೂರ್ಖ //
ಕೆಸರಿನ ಮಧ್ಯೆ ಇದ್ದರೂ ಸಹ ಕಮಲದ ಹೂವಿನ ಬದುಕು ಸಾರ್ಥಕ.ಅದರ ಚೆಲುವು , ಕಂಪು, ಮೋಹಕತೆಯು ಕಿಂಚಿತ್ತೂ ಮಾಸುವುದಿಲ್ಲ. ಕಮಲವು ಸಹಜವಾಗೇ ಸುಂದರವಾಗಿದೆ. ಕೃತಕವಾದುದು ಏನೂ ಇಲ್ಲ. ಯಾರೂ ಶೃಂಗಾರ ಮಾಡಿಲ್ಲ ಅದಕ್ಕೆ. ತನ್ನಷ್ಟಕ್ಕೆ ತಾನೇ ಸುಂದರವಾಗಿದೆ. ನಮ್ಮ ಬದುಕೂ ಸಹ ಹಾಗೆಯೇ ಇದ್ದರೆಷ್ಟು ಚಂದವಲ್ಲವೇ ಗೆಳೆಯರೇ ? ಐಹಿಕ ಭೋಗ ಭಾಗ್ಯಗಳ ಆಸೆಯನ್ನು ತೊರೆದು ಅಂದರೆ ಪ್ರಾಪಂಚಿಕವಾದುದು ನಶ್ವರವೆಂಬುದನ್ನು ಅರಿತು ನಮ್ಮೊಳಗಿನ ಆತ್ಮವು ಬೆಳಗಬೇಕು. ಆತ್ಮಶುದ್ಧಿ , ಅಂತರಂಗ ಶುದ್ಧಿಯಾಗಬೇಕು. ಐಹಿಕವೇ ಕೆಸರು. ಆ ಕೆಸರಿನೊಡಲಿನ ಕಮಲ ನಾವಾಗಬೇಕು. ಆತ್ಮಜ್ಞಾನವು ನಮ್ಮೊಳಗಿನಿಂದ ಸಹಜವಾಗೇ ಮೂಡಿ ಬಂದು, ಬದುಕು ಸುಂದರವೂ , ಅರ್ಥಪೂರ್ಣವೂ ಆಗಬೇಕು. ಅಲ್ಲವೇ ಗೆಳೆಯರೇ ?
ಶ್ರೀ ಮುರಳೀಧರ ಹೆಚ್ ಆರ್ ಮೂಲತಃ ಚಿತ್ರದುರ್ಗ ಜಿಲ್ಲೆಯ ಹೊಸದುರ್ಗ ತಾಲ್ಲೂಕಿನ ಹೆಗ್ಗೆರೆ ಗ್ರಾಮದವರು ಪ್ರಸ್ತುತ ತಿಪಟೂರಿನ ಬಾಲಕಿಯರ ಸರ್ಕಾರೀ ಪದವಿ ಪೂರ್ವ ಕಾಲೇಜಿನ ಪ್ರಾಢಶಾಲಾ ವಿಭಾಗದಲ್ಲಿ ಕನ್ನಡ ಭಾಷಾ ಉಪದಾಧ್ಯಾಯರಾಗಿ ಕರ್ತವ್ಯ ನಿರ್ವಹಿಸುತ್ತಿದ್ದಾರೆ. ಸಾಹಿತ್ಯ, ಕಲೆ, ಸಂಗೀತ ಮೊದಲಾದವುಗಳಲ್ಲಿ ಸಕ್ರಿಯವಾಗಿ ತೊಡಗಿಸಿಕೊಂಡಿರುವ ಇವರು ಶಿಕ್ಷಣ ಇಲಾಖೆಯಲ್ಲಿ ರಾಜ್ಯಮಟ್ಟದ ಸಂಪನ್ನೂಲ ವ್ಯಕ್ತಿಯಾಗಿ ತಮ್ಮನ್ನು ತೊಡಗಿಸಿಕೊಂಡವರು. "ಹೊರಬೀಡು" ಇವರ ಕಥಾ ಸಂಕಲನವಾಗಿದೆ. ಇದಾಗಲೇ ಎಂಟುನೂರಕ್ಕೂ ಅಧಿಕ ಮುಕ್ತಕಗಳನ್ನು ಅರ್ಥ ಸಹಿತ ಬರೆದು ಸಾಮಾಜಿಕ ಜಾಲತಾಣಗಳಲ್ಲೂ ಪ್ರಸಿದ್ಧರಾಗಿದ್ದಾರೆ.
Latest posts by ಶ್ರೀ ಮುರಳೀಧರ ಹೆಚ್ ಆರ್ (see all)
- ಭವ ಕಳೆವ ಶಿವ ಸತ್ಯ - September 6, 2021
- ಬಾಳಿನಾಹವ - September 4, 2021
- ಪಿಡಿದರಿವಿನೊಳ್ಮಾಗು - September 3, 2021
