ಜಗವ ಬೆಳಗುವ ಸೂರ್ಯ
ಚಂದ್ರಗೂ ಗ್ರಹಣವಿದೆ !
ತೊತ್ತುಗೊಳಲೇನು ತಮ
ಮತ್ತೆ ಬೆಳಗುವರೊ !
ಸತ್ಯಸೂರ್ಯನ ಮಿಥ್ಯ
ತೊತ್ತುಗೊಳೆ ಕತ್ತಲಿಗೆ
ತುತ್ತಾಗುವುದೆ ಸತ್ಯ ?
ಜಾಣಮೂರ್ಖ //
ಇಡೀ ಜಗತ್ತನ್ನೇ ಬೆಳಗೋ ಸೂರ್ಯ ಚಂದ್ರರನ್ನೇ ಗ್ರಹಣವು ನುಂಗಿಬಿಡುವುದು. ಅವರೂ ಕೂಡ ಮರೆಯಾಗುವರು. ಜಗತ್ತಿಗೇ ಕತ್ತಲು ತುಂಬಿಕೊಳ್ಳುವುದು. ಆದರೇನಂತೆ !? ಅದು ಕೆಲಕಾಲ ಮಾತ್ರ. ಶಾಶ್ವತವಾಗಿ ಮರೆಯಾಗುವರೇನವರು ? ಮತ್ತೆ ಎಂದಿನಂತೆಯೇ ಬೆಳಗುವರು ತಾನೆ? ಹಾಗೆಯೇ ಸತ್ಯವೂ ಕೂಡ. ಮಿಥ್ಯವೆಂಬ ಅಂಧಕಾರವು ತತ್ಕಾಲಕ್ಕೆ ಮುಚ್ಚಿರಬಹುದು.ಆದರೆ ಅದು ಶಾಶ್ವತವಲ್ಲ. ಮಿಥ್ಯದ ಪೊರೆ ಕಳಚಿದ ಮೇಲೆ ಸತ್ಯ ಸೂರ್ಯನ ಬೆಳಗುವಿಕೆಯನ್ನು ತಡೆಯಲಾದೀತೆ ? ಮಿಥ್ಯಕ್ಕೆ ತತ್ಕಾಲದ ಜಯವೇ ಹೊರತು ಶಾಶ್ವತ ಜಯವಲ್ಲ. ಅಂತೆಯೇ ಸತ್ಯಕ್ಕೆ ತತ್ಕಾಲದ ಸೋಲಾದರೂ ಜಯವು ನಿಶ್ಚಿತ ! ಏನಂತೀರಿ ?
ಶ್ರೀ ಮುರಳೀಧರ ಹೆಚ್ ಆರ್ ಮೂಲತಃ ಚಿತ್ರದುರ್ಗ ಜಿಲ್ಲೆಯ ಹೊಸದುರ್ಗ ತಾಲ್ಲೂಕಿನ ಹೆಗ್ಗೆರೆ ಗ್ರಾಮದವರು ಪ್ರಸ್ತುತ ತಿಪಟೂರಿನ ಬಾಲಕಿಯರ ಸರ್ಕಾರೀ ಪದವಿ ಪೂರ್ವ ಕಾಲೇಜಿನ ಪ್ರಾಢಶಾಲಾ ವಿಭಾಗದಲ್ಲಿ ಕನ್ನಡ ಭಾಷಾ ಉಪದಾಧ್ಯಾಯರಾಗಿ ಕರ್ತವ್ಯ ನಿರ್ವಹಿಸುತ್ತಿದ್ದಾರೆ. ಸಾಹಿತ್ಯ, ಕಲೆ, ಸಂಗೀತ ಮೊದಲಾದವುಗಳಲ್ಲಿ ಸಕ್ರಿಯವಾಗಿ ತೊಡಗಿಸಿಕೊಂಡಿರುವ ಇವರು ಶಿಕ್ಷಣ ಇಲಾಖೆಯಲ್ಲಿ ರಾಜ್ಯಮಟ್ಟದ ಸಂಪನ್ನೂಲ ವ್ಯಕ್ತಿಯಾಗಿ ತಮ್ಮನ್ನು ತೊಡಗಿಸಿಕೊಂಡವರು. "ಹೊರಬೀಡು" ಇವರ ಕಥಾ ಸಂಕಲನವಾಗಿದೆ. ಇದಾಗಲೇ ಎಂಟುನೂರಕ್ಕೂ ಅಧಿಕ ಮುಕ್ತಕಗಳನ್ನು ಅರ್ಥ ಸಹಿತ ಬರೆದು ಸಾಮಾಜಿಕ ಜಾಲತಾಣಗಳಲ್ಲೂ ಪ್ರಸಿದ್ಧರಾಗಿದ್ದಾರೆ.
Latest posts by ಶ್ರೀ ಮುರಳೀಧರ ಹೆಚ್ ಆರ್ (see all)
- ಭವ ಕಳೆವ ಶಿವ ಸತ್ಯ - September 6, 2021
- ಬಾಳಿನಾಹವ - September 4, 2021
- ಪಿಡಿದರಿವಿನೊಳ್ಮಾಗು - September 3, 2021
