ನಾಮರೂಪಿನ ದಿವ್ಯ
ಧಾಮದೊಳಗೆಂತ ಪರಿ
ಕಂಡು ಕಾಣದು ಕಿವಿಯು
ಕೇಳ್ದರೂ ಮಂದ !
ಕಂಡು ಕಾಣದ ಕಿವಿಗೆ
ಕೇಳಿಯೂ ಕೇಳದುದ
ಕಂಡು ಕೇಳೇಳಯ್ಯ
ಜಾಣಮೂರ್ಖ //
ಈ ಭೂವಿಯ ಮೇಲೆ ಎಲ್ಲಕ್ಕೂ ಹೆಸರಿದೆ ! ಆಕಾರವಿದೆ ! ಇದೆಲ್ಲವೂ ವ್ಯವಸ್ಥಿತವಾಗಿ ನಡೆಯುತ್ತಿದೆ ಎಂದ ಮೇಲೆ ಭಗವಂತನೂ ಇದ್ದಾನೆ ತಾನೆ ! ಎಲ್ಲವೂ ಜೀವಂತಿಕೆಯಿಂದ ಕ್ಷಣಕ್ಷಣವೂ ಚೈತನ್ಯ ಸ್ವರೂಪಿಯಾಗಿದ್ದರೂ ಭೌತಿಕವಾದುದು ಮಾತ್ರ ಕಾಣುತ್ತಿದೆ, ಕೇಳುತ್ತಿದೆ. ಆದರೆ ಕಂಡೂ ಕಾಣದ , ಕೇಳಿಯೂ ಕೇಳದ , ಅಖಂಡ ಸೃಷ್ಟಿಯ ಸೃಷ್ಟಿ ಸ್ಥಿತಿ ಲಯಗಳಿಗೆ ಹೇತುವಾದ ಅಭೌತಿಕ ಶಕ್ತಿ ಮಾತ್ರ ನೇಪಥ್ಯಕ್ಕೆ ಸರಿದಿದೆ. ಆ ಶಕ್ತಿಯನ್ನು ಕಾಣುವ ಕಣ್ಣಿದ್ದೂ ಕಾಣದಿದ್ದರೆ, ಕೇಳ್ವ ಕಿವಿಯಿದ್ದೂ ಕೇಳದಿದ್ದರೆ ಇಂತಹಾ ಶ್ರೇಷ್ಠವಾದ ಮಾನವ ಜನ್ಮವನ್ನು ಪಡೆದು ಪ್ರಯೋಜನವಾದರೂ ಏನು ? ಭೌತಿಕ ಜಗತ್ತನ್ನು ಎಲ್ಲರೂ ಕಾಣುತ್ತಾರಾದರೂ ಅದರಲ್ಲಡಗಿರುವ ಅಭೌತಿಕತೆಯನ್ನು , ಪರಮಾತ್ಮ ತತ್ತ್ವವನ್ನು ಗುರುತಿಸಲು ಹೃದಯದ ಕಣ್ಣು ತೆರೆದು ಪ್ರೀತಿಯಿಂದ ನೋಡಬೇಕು. ಅಲ್ಲವೇ ಗೆಳೆಯರೇ ?
ಶ್ರೀ ಮುರಳೀಧರ ಹೆಚ್ ಆರ್ ಮೂಲತಃ ಚಿತ್ರದುರ್ಗ ಜಿಲ್ಲೆಯ ಹೊಸದುರ್ಗ ತಾಲ್ಲೂಕಿನ ಹೆಗ್ಗೆರೆ ಗ್ರಾಮದವರು ಪ್ರಸ್ತುತ ತಿಪಟೂರಿನ ಬಾಲಕಿಯರ ಸರ್ಕಾರೀ ಪದವಿ ಪೂರ್ವ ಕಾಲೇಜಿನ ಪ್ರಾಢಶಾಲಾ ವಿಭಾಗದಲ್ಲಿ ಕನ್ನಡ ಭಾಷಾ ಉಪದಾಧ್ಯಾಯರಾಗಿ ಕರ್ತವ್ಯ ನಿರ್ವಹಿಸುತ್ತಿದ್ದಾರೆ. ಸಾಹಿತ್ಯ, ಕಲೆ, ಸಂಗೀತ ಮೊದಲಾದವುಗಳಲ್ಲಿ ಸಕ್ರಿಯವಾಗಿ ತೊಡಗಿಸಿಕೊಂಡಿರುವ ಇವರು ಶಿಕ್ಷಣ ಇಲಾಖೆಯಲ್ಲಿ ರಾಜ್ಯಮಟ್ಟದ ಸಂಪನ್ನೂಲ ವ್ಯಕ್ತಿಯಾಗಿ ತಮ್ಮನ್ನು ತೊಡಗಿಸಿಕೊಂಡವರು. "ಹೊರಬೀಡು" ಇವರ ಕಥಾ ಸಂಕಲನವಾಗಿದೆ. ಇದಾಗಲೇ ಎಂಟುನೂರಕ್ಕೂ ಅಧಿಕ ಮುಕ್ತಕಗಳನ್ನು ಅರ್ಥ ಸಹಿತ ಬರೆದು ಸಾಮಾಜಿಕ ಜಾಲತಾಣಗಳಲ್ಲೂ ಪ್ರಸಿದ್ಧರಾಗಿದ್ದಾರೆ.
Latest posts by ಶ್ರೀ ಮುರಳೀಧರ ಹೆಚ್ ಆರ್ (see all)
- ಭವ ಕಳೆವ ಶಿವ ಸತ್ಯ - September 6, 2021
- ಬಾಳಿನಾಹವ - September 4, 2021
- ಪಿಡಿದರಿವಿನೊಳ್ಮಾಗು - September 3, 2021
