ಪರಮಾತ್ಮ ತತ್ತ್ವ

ಹಿರಿಕಿರಿಯದಾವುದಿದೆ
ದೇವನೊಳು ಧರ್ಮದೊಳು ?
ಮಸಣದೊಳಗೊಂದೆ ಕಾಣ್
ಬಡವ ಬಲ್ಲದರು !
ಎಲ್ಲವನು ಮೀರಿದವ
ದೇವನಾಗುವ ದಿಟದಿ
ಪರಮಾತ್ಮ ತತ್ತ್ವಮಿದು
ಜಾಣಮೂರ್ಖ //

ಉಚ್ಚ ನೀಚಾದಿ ಭಾವನೆಗಳಿಂದ ಮುಚ್ಚಿ ಹೋಗಿಬಿಟ್ಟಿದ್ದೇವೆ ನಾವು. ಆ ದೇವರು ಇಷ್ಟು ಸಾಲ ಪಡೆದ ! ಇನ್ನೂ ತೀರಿಸಿಲ್ಲ ! ಅವನಿಗಿಷ್ಟು ಕೊಡೋಣವೆಂಬ ಭಾವ ! ಎಂತದಿದು ವಿಕೃತಿ ! ಹಾಗಾದರೆ ನಮಗೆ ಕೊಟ್ಟವನಾರು ? ತಿರುಪತಿಯ ಶ್ರೀನಿವಾಸ ಶ್ರೀಮಂತ ದೇವರು ಎನ್ನುವವರನ್ನು ಕೇಳಿದ್ದೇನೆ. ಹಾಗಾದರೆ ಭಕ್ತರು ಕೇಳಿದ್ದನ್ನೆಲ್ಲಾ ಕೊಟ್ಟು ಬೋಳಾಶಂಕರನೆನಿಸಿಕೊಂಡ ಮಸಣವಾಸಿ ಶಿವ ಬಡವನೇ ? ಕೇಳಿದ್ದನ್ನೆಲ್ಲಾ ಕೊಡುವ ಶಿವ ಎಂತು ಬಡವನಾದಾನು ? ಅಂತೆಯೇ ಧರ್ಮಗಳೆಲ್ಲದರ ಸಾರವೊಂದೆ. ಅದು ಉಚ್ಚ ಇದು ನೀಚ ಇದೆಲ್ಲಾ ನಾವು ಮಾಡಿಕೊಂಡದ್ದಷ್ಟೆ. ಬಡವ ಬಲ್ಲಿದರೆಲ್ಲರೂ ಮಸಣದೊಳಗೆ ಒಂದೇ ಅಲ್ಲವೇ !? ಇವೆಲ್ಲವನ್ನೂ ಮೀರಿ ನಿಂತವನು ದೇವನು. ಮಾನವನಾಗಿ ಹುಟ್ಟಿ ಇವೆಲ್ಲವನ್ನೂ ಮೀರಿನಿಂತವನು ದೇವನೇ ಆಗಿಬಿಡುತ್ತಾನೆ. ಇದೇ ಪರಮಾತ್ಮ ತತ್ತ್ವವು. ಮನೋವಿಕಾರಗಳನ್ನು ಕಳೆದು ಆ ಎತ್ತರಕ್ಕೆ ಏರಬೇಕಿದೆಯಷ್ಟೆ. ಏನಂತೀರಿ ?

Author
Recent Posts

ಶ್ರೀ ಮುರಳೀಧರ ಹೆಚ್ ಆರ್

ಶ್ರೀ ಮುರಳೀಧರ ಹೆಚ್ ಆರ್ ಮೂಲತಃ ಚಿತ್ರದುರ್ಗ ಜಿಲ್ಲೆಯ ಹೊಸದುರ್ಗ ತಾಲ್ಲೂಕಿನ ಹೆಗ್ಗೆರೆ ಗ್ರಾಮದವರು ಪ್ರಸ್ತುತ ತಿಪಟೂರಿನ ಬಾಲಕಿಯರ ಸರ್ಕಾರೀ ಪದವಿ ಪೂರ್ವ ಕಾಲೇಜಿನ ಪ್ರಾಢಶಾಲಾ ವಿಭಾಗದಲ್ಲಿ ಕನ್ನಡ ಭಾಷಾ ಉಪದಾಧ್ಯಾಯರಾಗಿ ಕರ್ತವ್ಯ ನಿರ್ವಹಿಸುತ್ತಿದ್ದಾರೆ. ಸಾಹಿತ್ಯ, ಕಲೆ, ಸಂಗೀತ ಮೊದಲಾದವುಗಳಲ್ಲಿ ಸಕ್ರಿಯವಾಗಿ ತೊಡಗಿಸಿಕೊಂಡಿರುವ ಇವರು ಶಿಕ್ಷಣ ಇಲಾಖೆಯಲ್ಲಿ ರಾಜ್ಯಮಟ್ಟದ ಸಂಪನ್ನೂಲ ವ್ಯಕ್ತಿಯಾಗಿ ತಮ್ಮನ್ನು ತೊಡಗಿಸಿಕೊಂಡವರು. "ಹೊರಬೀಡು" ಇವರ ಕಥಾ ಸಂಕಲನವಾಗಿದೆ. ಇದಾಗಲೇ ಎಂಟುನೂರಕ್ಕೂ ಅಧಿಕ ಮುಕ್ತಕಗಳನ್ನು ಅರ್ಥ ಸಹಿತ ಬರೆದು ಸಾಮಾಜಿಕ ಜಾಲತಾಣಗಳಲ್ಲೂ ಪ್ರಸಿದ್ಧರಾಗಿದ್ದಾರೆ.

Latest posts by ಶ್ರೀ ಮುರಳೀಧರ ಹೆಚ್ ಆರ್ (see all)