ಬದುಕು ತಪಮಲ್ತೆ !

ಅರಿವರ್ಗಗಳನಿರಿದು
ಅರಿತರಿತು ನಡೆಯಲದು
ಘನ ತಪಕು ಮಿಗಿಲುಗಾಣ್
ಬದುಕು ತಪಮಲ್ತೆ !
ಕಾಮಕ್ರೋಧಾದಿಗಳ
ದಮನಿಸದ ತವಸಿ ತಾ
ನೆಂತು ಬೆಳಗುವನೊಳಗ
ಜಾಣಮೂರ್ಖ //

ಅರಿಷಡ್ವರ್ಗಗಳ ಜೊತೆ ಹೋರಾಟವೇ ಈ ಬದುಕು. ಅವುಗಳನ್ನು ಹಿಡಿತದಲ್ಲಿಟ್ಟುಕೊಂಟು ಸಮತೋಲನದ ಬದುಕು ಸಾಗಿಸುವುದು ನಿಜವಾದ ತಪಸ್ಸು ! ಕಾಡಿಗೆ ಹೋಗಿ ತಪವನಾಚರಿಸುವುದಲ್ಲ. ಹಾಗೆ ತಪಸ್ವಿಗಳಾದವರೂ ಕಾಮ ಕ್ರೋಧಾದಿಗಳಿಂದ ಹೊರತಾದವರೇನಲ್ಲ. ಹಾಗೆ ಇವನ್ನು ಆಂತರ್ಯದಲ್ಲಿ ದಮನಿಸದವರು ಎಂತು ತವಸಿಗಳಾದಾರು !? ತನ್ನ ಅಂತರಂಗವನ್ನು ಹೇಗೆ ಬೆಳಗುವರು ? ತನ್ನಂತರಂಗವನ್ನೇ ಬೆಳಗದವರು ಜಗಕೆಂತು ಬೆಳಕ ನೀಡುವರು ?! ಅಲ್ಲವೇ ಗೆಳೆಯರೇ ? ಯಾರು ಸಂಸಾರಜೀವನದಲ್ಲಿದ್ದುಕೊಂಡೇ ತಾನೂ ಬೆಳಗಿ ಜಗತ್ತನ್ನೂ ಬೆಳಗುವರೋ ಅವರೇ ನಿಜವಾದ ತವಸಿಗಳು, ಯೋಗಿಗಳು! ಅದಕ್ಕೆ ದಾಸವರೇಣ್ಯರಾದ ಪುರಂದರದಾಸರು-“ಪಿತಮಾತೆ ಸತಿಸುತರ ಅಗಲಿರಬೇಡ
ಯತಿಯಾಗಿ ಅರಣ್ಯವ ತಿರುಗಲಿಬೇಡ
ವ್ರತ ನೇಮವ ಮಾಡಿ ದಣಿಯಲುಬೇಡ
ಸತಿಯಿಲ್ಲದವಗೆ ಸದ್ಗತಿಯಿಲ್ಲವೋ ಮೂಢ ! ಎಂದದ್ದಾರೆ. ಅದೆಷ್ಟು ಸತ್ಯ ಈ ಅನುಭಾವಿಕ ನುಡಿ ಅಲ್ಲವೇ ಗೆಳೆಯರೇ !?

Author
Recent Posts

ಶ್ರೀ ಮುರಳೀಧರ ಹೆಚ್ ಆರ್

ಶ್ರೀ ಮುರಳೀಧರ ಹೆಚ್ ಆರ್ ಮೂಲತಃ ಚಿತ್ರದುರ್ಗ ಜಿಲ್ಲೆಯ ಹೊಸದುರ್ಗ ತಾಲ್ಲೂಕಿನ ಹೆಗ್ಗೆರೆ ಗ್ರಾಮದವರು ಪ್ರಸ್ತುತ ತಿಪಟೂರಿನ ಬಾಲಕಿಯರ ಸರ್ಕಾರೀ ಪದವಿ ಪೂರ್ವ ಕಾಲೇಜಿನ ಪ್ರಾಢಶಾಲಾ ವಿಭಾಗದಲ್ಲಿ ಕನ್ನಡ ಭಾಷಾ ಉಪದಾಧ್ಯಾಯರಾಗಿ ಕರ್ತವ್ಯ ನಿರ್ವಹಿಸುತ್ತಿದ್ದಾರೆ. ಸಾಹಿತ್ಯ, ಕಲೆ, ಸಂಗೀತ ಮೊದಲಾದವುಗಳಲ್ಲಿ ಸಕ್ರಿಯವಾಗಿ ತೊಡಗಿಸಿಕೊಂಡಿರುವ ಇವರು ಶಿಕ್ಷಣ ಇಲಾಖೆಯಲ್ಲಿ ರಾಜ್ಯಮಟ್ಟದ ಸಂಪನ್ನೂಲ ವ್ಯಕ್ತಿಯಾಗಿ ತಮ್ಮನ್ನು ತೊಡಗಿಸಿಕೊಂಡವರು. "ಹೊರಬೀಡು" ಇವರ ಕಥಾ ಸಂಕಲನವಾಗಿದೆ. ಇದಾಗಲೇ ಎಂಟುನೂರಕ್ಕೂ ಅಧಿಕ ಮುಕ್ತಕಗಳನ್ನು ಅರ್ಥ ಸಹಿತ ಬರೆದು ಸಾಮಾಜಿಕ ಜಾಲತಾಣಗಳಲ್ಲೂ ಪ್ರಸಿದ್ಧರಾಗಿದ್ದಾರೆ.

Latest posts by ಶ್ರೀ ಮುರಳೀಧರ ಹೆಚ್ ಆರ್ (see all)