ದಾಸನಾಗಿ ವಿಶೇಷನಾಗು

ದಾಸ್ಯಮೆಂತದು ಬುವಿಯ
ಲಿಷ್ಟಿಷ್ಟಕೂ ಜಗದಿ
ಹಾಸ್ಯಕೀಡಾಗುವುದು
ತರವೆ ನೀ ಪೇಳು !?
ಘನಮಾದುದಿದೆ ಬಿಡದೆ
ಮನ ತುಂಬಿ ದಾಸನಾ
ಗದೆ ಮುಕ್ತಿಗಾಧಾರ
ಜಾಣಮೂರ್ಖ //

ನಾವು ಈ ಜಗತ್ತಿನಲ್ಲಿ ತೀರಾ ಕ್ಷುಲ್ಲಕವಾದುದಕ್ಕೆಲ್ಲಾ ದಾಸರಾಗಿಬಿಡುತ್ತೇವೆ. ಹಣಕ್ಕೆ ! ಅಧಿಕಾರಕ್ಕೆ ! ಕೆಲವು ಕ್ಷುಲ್ಲಕವಾದ ಚಟಗಳಿಗೆ ಹೀಗೆ ಏನೇನಕ್ಕೋ ನಮ್ಮ ವ್ಯಕ್ತಿತ್ವವನ್ನೇ ಒತ್ತೆಯಿಟ್ಟುಬಿಡುತ್ತೇವೆ. ಆತ್ಮಗೌರವವನ್ನೇ ಕೊಂದುಕೊಂಡು ಬಿಡುತ್ತೇವೆ. ಹಾಸ್ಯಕ್ಕೀಡಾಗುತ್ತೇವೆ. ಬೇರೆಯವರ ಕತೆ ಹೋಗಲಿ ನಮ್ಮ ಮನಸ್ಸೇ ನಮ್ಮನ್ನು ಕಂಡು ಅಸಹ್ಯ ಪಡುವಷ್ಟರ ಮಟ್ಟಿಗೆ ದಾಸ್ಯತ್ವವನ್ನು ಅನುಭವಿಸುತ್ತೇವೆ. ಏಕೆ ಹೀಗೆ ? ಘನವಾದುದು ಈ ಸೃಷ್ಠಿ ! ಮತ್ತೆ ಸೃಷ್ಠಿ , ಸ್ಥಿತಿ ಲಯಕಾರಕ ದಿವ್ಯ ಶಕ್ತಿಗಳು ! ಆ ದಿವ್ಯ ಭವ್ಯ ಶಕ್ತಿಯನ್ನು ಗಮನಿಸುವುದೇ ಇಲ್ಲ. ಅಂತಹಾ ದಿವ್ಯಶಕ್ತಿ ಅರ್ಥಾತ್ ಭಗವಂತನಿಗೆ ದಾಸನಾಗಯ್ಯ ಗೆಳೆಯ. ಅದು ಮುಕ್ತಿಗೆ ಆಧಾರವಾದರೂ ಆಗುತ್ತದೆ. ಅದು ಬಿಟ್ಟು ಸಣ್ಣಸಣ್ಣದಕ್ಕೂ ದಾಸನಾಗಿ ಯಾತನೆ , ನೋವುಗಳನ್ನು ಅನುಭವಿಸುವುದಕ್ಕಿಂತ ಘನನಾದ ಭಗವಂತನ ದಾಸನಾಗಿ ವಿಶೇಷನಾಗುವುದು , ಮುಕ್ತನಾಗುವುದು ಸರಿಯಲ್ಲವೇ ಗೆಳೆಯರೇ !?

Author
Recent Posts

ಶ್ರೀ ಮುರಳೀಧರ ಹೆಚ್ ಆರ್

ಶ್ರೀ ಮುರಳೀಧರ ಹೆಚ್ ಆರ್ ಮೂಲತಃ ಚಿತ್ರದುರ್ಗ ಜಿಲ್ಲೆಯ ಹೊಸದುರ್ಗ ತಾಲ್ಲೂಕಿನ ಹೆಗ್ಗೆರೆ ಗ್ರಾಮದವರು ಪ್ರಸ್ತುತ ತಿಪಟೂರಿನ ಬಾಲಕಿಯರ ಸರ್ಕಾರೀ ಪದವಿ ಪೂರ್ವ ಕಾಲೇಜಿನ ಪ್ರಾಢಶಾಲಾ ವಿಭಾಗದಲ್ಲಿ ಕನ್ನಡ ಭಾಷಾ ಉಪದಾಧ್ಯಾಯರಾಗಿ ಕರ್ತವ್ಯ ನಿರ್ವಹಿಸುತ್ತಿದ್ದಾರೆ. ಸಾಹಿತ್ಯ, ಕಲೆ, ಸಂಗೀತ ಮೊದಲಾದವುಗಳಲ್ಲಿ ಸಕ್ರಿಯವಾಗಿ ತೊಡಗಿಸಿಕೊಂಡಿರುವ ಇವರು ಶಿಕ್ಷಣ ಇಲಾಖೆಯಲ್ಲಿ ರಾಜ್ಯಮಟ್ಟದ ಸಂಪನ್ನೂಲ ವ್ಯಕ್ತಿಯಾಗಿ ತಮ್ಮನ್ನು ತೊಡಗಿಸಿಕೊಂಡವರು. "ಹೊರಬೀಡು" ಇವರ ಕಥಾ ಸಂಕಲನವಾಗಿದೆ. ಇದಾಗಲೇ ಎಂಟುನೂರಕ್ಕೂ ಅಧಿಕ ಮುಕ್ತಕಗಳನ್ನು ಅರ್ಥ ಸಹಿತ ಬರೆದು ಸಾಮಾಜಿಕ ಜಾಲತಾಣಗಳಲ್ಲೂ ಪ್ರಸಿದ್ಧರಾಗಿದ್ದಾರೆ.

Latest posts by ಶ್ರೀ ಮುರಳೀಧರ ಹೆಚ್ ಆರ್ (see all)