ಪೂರ್ವದೊಳಗೊಡೆಯನಾರ್
ನಿನ್ನ ಹೊಲ ಮನೆಗೆಲ್ಲ ?
ನಾಳೆ ಯಾರದೊ ಗೊತ್ತೆ ?
ಅರಿತವರು ಯಾರು ?
ಅಂತೆ ಸುಖ ದುಃಖಗಳು
ಕಾಲಚಕ್ರದಿ ಬಂಧಿ !
ಅರಿವಿನಾ ಕಣ್ಣ ತೆರೆ
ಜಾಣಮೂರ್ಖ //
ಈಗ ಸ್ವಲ್ಪ ಯೋಚಿಸೋಣ. ನಮ್ಮ ತೋಟ , ಹೊಲ , ಮನೆ , ಆಸ್ತಿಪಾಸ್ತಿಗಳೆಲ್ಲವೂ ಈ ಭೂಮಿ ಹುಟ್ಟಿದಾಗಿನಿಂದಲೂ ಇವೆ. ಹಿಂದೆಲ್ಲಾ ಅವುಗಳಿಗೆ ಯಾರು ಒಡೆಯರಾಗಿದ್ದರು ? ಇಂದು ನಾವು ಒಡೆಯರಿರಬಹುದು ! ನಮ್ಮ ನಂತರ ! ನಮ್ಮ ಮಕ್ಕಳು ! ಮುಂದೆ ಯಾರು ? ಯಾರೋ ! ಅರಿತವರು ಯಾರು ? ಲಕ್ಷ ಲಕ್ಷ ವರ್ಷಗಳಿಂದಲೂ ಕಾಲ ಚಕ್ರವು ಸುತ್ತುತ್ತಲೇ ಇದೆ ! ಅಲ್ಲಿ ನಾವೆಲ್ಲರೂ ಬಂಧಿಗಳು. ಅಂತೆಯೇ ನಮ್ಮ ಸುಖ ಸಂತೋಷ, ಅಧಿಕಾರ, ದರ್ಪ ಮತ್ತೊಂದು ಎಲ್ಲ. ಇಂದು ಹಿತವಾಗಿರಬಹುದು ಮುಂದೆ ಅಹಿತ ! ಇಂದಿನ ಸುಖ ನಾಳಿನ ಅಸುಖ ! ಇಂದಿನ ದುಃಖವಳಿದು ಸಂತಸವೂ ಸಿಗಬಹುದು ! ಮತ್ತೆ ಅದು ಶಾಶ್ವತವಂತೂ ಅಲ್ಲ. ಆದರೆ ಭಗವಂತನೊಬ್ಬನೇ ಸತ್ಯ ನಿತ್ಯ ! ಮತ್ತಾವುದೂ ಚಿರವಲ್ಲ. ಅರಿವಿನ ಕಣ್ಣು ತೆರೆದು ನೋಡಿದಾಗ ಎಲ್ಲವೂ ಸ್ಪಷ್ಟ. ಆ ವಿವೇಕದ ಕಣ್ಣು ತೆರೆದು ನೋಡಬೇಕಷ್ಟೆ ! ಏನಂತೀರಿ ?
ಶ್ರೀ ಮುರಳೀಧರ ಹೆಚ್ ಆರ್ ಮೂಲತಃ ಚಿತ್ರದುರ್ಗ ಜಿಲ್ಲೆಯ ಹೊಸದುರ್ಗ ತಾಲ್ಲೂಕಿನ ಹೆಗ್ಗೆರೆ ಗ್ರಾಮದವರು ಪ್ರಸ್ತುತ ತಿಪಟೂರಿನ ಬಾಲಕಿಯರ ಸರ್ಕಾರೀ ಪದವಿ ಪೂರ್ವ ಕಾಲೇಜಿನ ಪ್ರಾಢಶಾಲಾ ವಿಭಾಗದಲ್ಲಿ ಕನ್ನಡ ಭಾಷಾ ಉಪದಾಧ್ಯಾಯರಾಗಿ ಕರ್ತವ್ಯ ನಿರ್ವಹಿಸುತ್ತಿದ್ದಾರೆ. ಸಾಹಿತ್ಯ, ಕಲೆ, ಸಂಗೀತ ಮೊದಲಾದವುಗಳಲ್ಲಿ ಸಕ್ರಿಯವಾಗಿ ತೊಡಗಿಸಿಕೊಂಡಿರುವ ಇವರು ಶಿಕ್ಷಣ ಇಲಾಖೆಯಲ್ಲಿ ರಾಜ್ಯಮಟ್ಟದ ಸಂಪನ್ನೂಲ ವ್ಯಕ್ತಿಯಾಗಿ ತಮ್ಮನ್ನು ತೊಡಗಿಸಿಕೊಂಡವರು. "ಹೊರಬೀಡು" ಇವರ ಕಥಾ ಸಂಕಲನವಾಗಿದೆ. ಇದಾಗಲೇ ಎಂಟುನೂರಕ್ಕೂ ಅಧಿಕ ಮುಕ್ತಕಗಳನ್ನು ಅರ್ಥ ಸಹಿತ ಬರೆದು ಸಾಮಾಜಿಕ ಜಾಲತಾಣಗಳಲ್ಲೂ ಪ್ರಸಿದ್ಧರಾಗಿದ್ದಾರೆ.
Latest posts by ಶ್ರೀ ಮುರಳೀಧರ ಹೆಚ್ ಆರ್ (see all)
- ಭವ ಕಳೆವ ಶಿವ ಸತ್ಯ - September 6, 2021
- ಬಾಳಿನಾಹವ - September 4, 2021
- ಪಿಡಿದರಿವಿನೊಳ್ಮಾಗು - September 3, 2021
