ಪಾರು ಮಾಳ್ಪುದೆ ಸಿರಿಯು

ನಾನಳಿದು ನೀನೆಂಬ
ಭಾವ ಮೂಡಲುಮಾಗ
ನೀನೆ ಬಲು ಜಾಣ ಕಾಣ್
ಧ್ಯಾನ ಬೇರೇಕೆ !?
ಮರಣ ಕಾಲದಿ ಸಿರಿಯು
ಪಾರು ಮಾಳ್ಪುದೆ ಮರುಳೆ
ಬರಿ ಬೆಮೆಯೊಳೇಕಳುವೆ
ಜಾಣಮೂರ್ಖ //

ನಮ್ಮಲ್ಲಿರುವ ನಾನತ್ವವಳಿದು ನೀನೇ ಎಂಬ ಭಾವವು ಮೂಡಬೇಕು. ಆಗ ನೀನು ನಿಜವಾದ ಜಾಣ. ಭವಭಂಧನಗಳಿಂದ ಪಾರು ಮಾಡುವ ಭಗವಂತನನ್ನು ನಂಬಬೇಕೇ ಹೊರತು ಬೇರೇನನ್ನೂ ಅಲ್ಲ ! ಸಿರಿ ಸಂಪದ , ಆಸ್ತಿ ಪಾಸ್ತಿ ಏನೇ ಇದ್ದರೂ ಮರಣಕಾಲದಲ್ಲಿ ಯಾವುವೂ ನಮ್ಮ ರಕ್ಷಣೆಗೆ ಬಾರವು. ನಾವು ಮಾಡಿದ ಧರ್ಮಕಾರ್ಯಗಳಷ್ಟೇ ನಮ್ಮ ಬೆನ್ನೆಲುಬಾಗಿ ನಿಲ್ಲುತ್ತವೆ. ಇದರಲ್ಲಿ ಸಂದೇಹವಿಲ್ಲ. ಮಹಾನ್ ಮಹಾನ್ ಪಂಡಿತರುಗಳನ್ನೇ ವಾದದಲ್ಲಿ ಸೋಲಿಸಿದ ಆದಿ ಶಂಕರರೇ -“ನಹಿ ನಹಿ ರಕ್ಷತಿ ಡುಕ್ರುಂಕರಣೇ ! ಭಜಗೋವಿಂದಂ ! ಎಂದು ಭಕ್ತಿಯ ಪಾರಮ್ಯವನ್ನು ಸಾರಿ ಹೇಳಿದ್ದಾರೆ. ಹೀಗಿರುವಾಗ ಬರಿಯ ಭ್ರಮೆಯಲ್ಲಿ ತೊಳಲಾಡುವುದನ್ನು ಬಿಟ್ಟು ಭಗವಂತನನ್ನು ಭಜಿಸೋಣವೇ !?
ಸಹೃದಯ ಓದುಗರೆಲ್ಲರಿಗೂ ಗೌರಿ ಗಣೇಶ ಹಬ್ಬದ ಹಾರ್ದಿಕ ಶುಭಾಶಯಗಳು . ಜಗನ್ಮಾತೆಯು ಅಂತೆಯೇ ವರಸಿದ್ಧಿ ವಿನಾಯಕನು ತಾವು ನೆನೆಸಿದುದನ್ನು ನನಸಾಗಿಸಲೆಂಬ ಶುಭ ಹಾರೈಕೆಯೊಂದಿಗೆ
✍️ಮುರಳೀಧರ ಹೆಚ್.ಆರ್.

Author
Recent Posts

ಶ್ರೀ ಮುರಳೀಧರ ಹೆಚ್ ಆರ್

ಶ್ರೀ ಮುರಳೀಧರ ಹೆಚ್ ಆರ್ ಮೂಲತಃ ಚಿತ್ರದುರ್ಗ ಜಿಲ್ಲೆಯ ಹೊಸದುರ್ಗ ತಾಲ್ಲೂಕಿನ ಹೆಗ್ಗೆರೆ ಗ್ರಾಮದವರು ಪ್ರಸ್ತುತ ತಿಪಟೂರಿನ ಬಾಲಕಿಯರ ಸರ್ಕಾರೀ ಪದವಿ ಪೂರ್ವ ಕಾಲೇಜಿನ ಪ್ರಾಢಶಾಲಾ ವಿಭಾಗದಲ್ಲಿ ಕನ್ನಡ ಭಾಷಾ ಉಪದಾಧ್ಯಾಯರಾಗಿ ಕರ್ತವ್ಯ ನಿರ್ವಹಿಸುತ್ತಿದ್ದಾರೆ. ಸಾಹಿತ್ಯ, ಕಲೆ, ಸಂಗೀತ ಮೊದಲಾದವುಗಳಲ್ಲಿ ಸಕ್ರಿಯವಾಗಿ ತೊಡಗಿಸಿಕೊಂಡಿರುವ ಇವರು ಶಿಕ್ಷಣ ಇಲಾಖೆಯಲ್ಲಿ ರಾಜ್ಯಮಟ್ಟದ ಸಂಪನ್ನೂಲ ವ್ಯಕ್ತಿಯಾಗಿ ತಮ್ಮನ್ನು ತೊಡಗಿಸಿಕೊಂಡವರು. "ಹೊರಬೀಡು" ಇವರ ಕಥಾ ಸಂಕಲನವಾಗಿದೆ. ಇದಾಗಲೇ ಎಂಟುನೂರಕ್ಕೂ ಅಧಿಕ ಮುಕ್ತಕಗಳನ್ನು ಅರ್ಥ ಸಹಿತ ಬರೆದು ಸಾಮಾಜಿಕ ಜಾಲತಾಣಗಳಲ್ಲೂ ಪ್ರಸಿದ್ಧರಾಗಿದ್ದಾರೆ.

Latest posts by ಶ್ರೀ ಮುರಳೀಧರ ಹೆಚ್ ಆರ್ (see all)