ಬವರವೇತಕೊ ಕಾಣೆ

ಬೆವರ ಹಾರವ ನೀಡಿ
ಬವರವೇತಕೊ ಕಾಣೆ
ಬುವಿಯಮ್ಮ ನಗುವಳೋ
ಬವಣೆಗಳ ಕಂಡು !
ಕಸವರಕೆ ಕಾದುವರು
ಜಸವರಸಿ ಓಡುವವ
ರಿವಳನೆಂತರಿವರೋ
ಜಾಣಮೂರ್ಖ //

ನಾವು ಬೆವರು ಸುರಿಸಿ , ಕಷ್ಟ ಪಟ್ಟು ದುಡಿಯುತ್ತೇವೆ. ಆದರೂ ಬದುಕಿಗಾಗಿ ಯುದ್ಧವನ್ನೇ ಮಾಡುತ್ತೇವೆ. ಅದೆಷ್ಟು ಬವಣೆಗಳು ! ಭೂತಾಯಿ ಇದನ್ನು ಕಂಡು ನಗುತ್ತಾಳೆ. ದುಡಿಮೆಗೆ ತಕ್ಕ ಪ್ರತಿಫಲ, ಬದುಕು ಇದ್ದೇ ಇರುತ್ತದೆ. ಆದರೂ ಹಣ, ಆಸ್ತಿಗಾಗಿ ಹೋರಾಟ ! ಯಶಸ್ಸಿಗಾಗಿ ಹಾರಾಟ ! ಪ್ರಾಮಾಣಿಕವಾಗಿ ದುಡಿದು ಸಂತೃಪ್ತಿಯಿಂದ ಬದುಕುವುದು ಯಾವಾಗ ? ಭೂತಾಯಿಯ ಬದುಕನ್ನೊಮ್ಮೆ ನೋಡಿ ಏನಾದರೂ ತನ್ನ ಕರ್ತವ್ಯವನ್ನವಳು ಬಿಡಳು . ಅಪಾರ ಸಂಪತ್ತಿನ ಗಣಿಯಿವಳು ! ಆದರೂ ಎಲ್ಲವನ್ನೂ ತನ್ನ ಮಕ್ಕಳಿಗೆ ಕೊಟ್ಟು ಸಲಹುತ್ತಿದ್ದಾಳೆ . ಅದೆಂತಹಾ ತಾಳ್ಮೆ ! ಅದೆಷ್ಟು ಸಹನೆ ! ಚಿಕ್ಕದನ್ನೂ ದೊಡ್ಡದನ್ನಾಗಿಸಿ ಕೊರಗುವ ನಾವು ಸ್ವಲ್ಪ ಶಾಂತರಾಗಿ ಚಿಂತಿಸೋಣ. ಈ ತಾಯಿಯಿಂದ ಕಲಿಯಬೇಕಾದದ್ದು ಬಹಳವಿದೆ. ಬದುಕಿನಲ್ಲಿ ತಿನ್ನುವ ಇಷ್ಟು ಅನ್ನಕ್ಕಾಗಿ ಏಕಿಷ್ಟು ಉದ್ವೇಗ ! ಸ್ವಾರ್ಥ! ಹೋರಾಟ! ಹಾರಾಟ ! ಯುದ್ಧವೋ ನಾ ಬೇರೆ ಕಾಣೆ. ಅಲ್ಲವೇ ಗೆಳೆಯರೇ ?

Author
Recent Posts

ಶ್ರೀ ಮುರಳೀಧರ ಹೆಚ್ ಆರ್

ಶ್ರೀ ಮುರಳೀಧರ ಹೆಚ್ ಆರ್ ಮೂಲತಃ ಚಿತ್ರದುರ್ಗ ಜಿಲ್ಲೆಯ ಹೊಸದುರ್ಗ ತಾಲ್ಲೂಕಿನ ಹೆಗ್ಗೆರೆ ಗ್ರಾಮದವರು ಪ್ರಸ್ತುತ ತಿಪಟೂರಿನ ಬಾಲಕಿಯರ ಸರ್ಕಾರೀ ಪದವಿ ಪೂರ್ವ ಕಾಲೇಜಿನ ಪ್ರಾಢಶಾಲಾ ವಿಭಾಗದಲ್ಲಿ ಕನ್ನಡ ಭಾಷಾ ಉಪದಾಧ್ಯಾಯರಾಗಿ ಕರ್ತವ್ಯ ನಿರ್ವಹಿಸುತ್ತಿದ್ದಾರೆ. ಸಾಹಿತ್ಯ, ಕಲೆ, ಸಂಗೀತ ಮೊದಲಾದವುಗಳಲ್ಲಿ ಸಕ್ರಿಯವಾಗಿ ತೊಡಗಿಸಿಕೊಂಡಿರುವ ಇವರು ಶಿಕ್ಷಣ ಇಲಾಖೆಯಲ್ಲಿ ರಾಜ್ಯಮಟ್ಟದ ಸಂಪನ್ನೂಲ ವ್ಯಕ್ತಿಯಾಗಿ ತಮ್ಮನ್ನು ತೊಡಗಿಸಿಕೊಂಡವರು. "ಹೊರಬೀಡು" ಇವರ ಕಥಾ ಸಂಕಲನವಾಗಿದೆ. ಇದಾಗಲೇ ಎಂಟುನೂರಕ್ಕೂ ಅಧಿಕ ಮುಕ್ತಕಗಳನ್ನು ಅರ್ಥ ಸಹಿತ ಬರೆದು ಸಾಮಾಜಿಕ ಜಾಲತಾಣಗಳಲ್ಲೂ ಪ್ರಸಿದ್ಧರಾಗಿದ್ದಾರೆ.

Latest posts by ಶ್ರೀ ಮುರಳೀಧರ ಹೆಚ್ ಆರ್ (see all)