ಕಾಣದುದ ಕಾಣ್ವುದಿದೆ
ಕೇಳದುದ ಕೇಳ್ವುದಿದೆ
ಸವಿವ ಸವಿ ಬೇರೆಯಿದೆ
ಮನವನಣಿಗೊಳಿಸು !
ಜಗದವಾಸನೆಗಳಂ
ತೊರೆ ಸ್ಪರ್ಷಿಸೇಳ್ ದಿ
ವ್ಯ ದೈವತ್ವಮಿದೆ ಕಾಣ್
ಜಾಣಮೂರ್ಖ//
ಓ, ಗೆಳೆಯಾ ಈ ಜಗತ್ತಿನಲ್ಲಿ ಜನ್ಮವೆತ್ತಿ ನಾವು ಕಾಣಬೇಕಾದುದನ್ನು ಕಾಣಬೇಕಿದೆ. ಕೇಳಬೇಕಾದುದನ್ನು ಕೇಳಬೇಕಿದೆ. ಸವಿಯಬೇಕಾದುದನ್ನು ಸವಿಯಬೇಕಿದೆ. ಆದರೆ ಇದೆಕ್ಕೆಲ್ಲಾ ಈ ಜಗದ ಲೌಕಿಕದ ವಾಸನೆಗಳು ಅಡ್ಡಿ ಪಡಿಸಿ ದಿವ್ಯವಾದ ದೈವಾನುಸಂಧಾನಕ್ಕೆ ಅಡ್ಡಿಯಾಗಿವೆ. ಈ ಪಂಚೇಂದ್ರಿಯಗಳು ನಮಗೆ ಕೊಡಲ್ಪಟ್ಟಿರುವುದು ಕೇವಲ ಭೌತಿಕ ಪ್ರಪಂಚದ ಸುಖವನ್ನು ಅನುಭವಿಸಿ ಸಾಗುವುದಕ್ಕಲ್ಲ. ಇದರ ಮಧ್ಯದಲ್ಲಿದ್ದುಕ್ಕೊಂಡೇ ಇದಕ್ಕೆ ಅತೀತವಾದುದನ್ನು ಕಾಣುವುದಕ್ಕೆ ! ಅದಕ್ಕೆ ನಾವು ಸ್ವಲ್ಪ ಜಾಗೃತರಾಗಿ ಚಿಂತಿಸಿ ಕಾಣದುದನ್ನು ಕಾಣಬೇಕು ! ಕೇಳದುದನ್ನು ಕೇಳಬೇಕು ! ಸವಿಯದುದನ್ನು ಸವಿಯಬೇಕು ! ಲೌಕಿಕ ಭೋಗಭಾಗ್ಯಂಗಳಿಂದ ದೂರವಿದ್ದು ಭಗವದನುಸಂಧಾನ ಮಾಡಬೇಕು. ಆಗ ನಿಜವಾದ ಅರ್ಥದಲ್ಲಿ ಬದುಕು ಸಾರ್ಥಕ ಎನಿಸುತ್ತದೆ. ಇದನ್ನು ಭಗವಂತನೂ ಮೆಚ್ಚುತ್ತಾನೆ. ಮೆಚ್ಚಲೇಬೇಕು ! ಅಲ್ಲವೇ ?
ಶ್ರೀ ಮುರಳೀಧರ ಹೆಚ್ ಆರ್ ಮೂಲತಃ ಚಿತ್ರದುರ್ಗ ಜಿಲ್ಲೆಯ ಹೊಸದುರ್ಗ ತಾಲ್ಲೂಕಿನ ಹೆಗ್ಗೆರೆ ಗ್ರಾಮದವರು ಪ್ರಸ್ತುತ ತಿಪಟೂರಿನ ಬಾಲಕಿಯರ ಸರ್ಕಾರೀ ಪದವಿ ಪೂರ್ವ ಕಾಲೇಜಿನ ಪ್ರಾಢಶಾಲಾ ವಿಭಾಗದಲ್ಲಿ ಕನ್ನಡ ಭಾಷಾ ಉಪದಾಧ್ಯಾಯರಾಗಿ ಕರ್ತವ್ಯ ನಿರ್ವಹಿಸುತ್ತಿದ್ದಾರೆ. ಸಾಹಿತ್ಯ, ಕಲೆ, ಸಂಗೀತ ಮೊದಲಾದವುಗಳಲ್ಲಿ ಸಕ್ರಿಯವಾಗಿ ತೊಡಗಿಸಿಕೊಂಡಿರುವ ಇವರು ಶಿಕ್ಷಣ ಇಲಾಖೆಯಲ್ಲಿ ರಾಜ್ಯಮಟ್ಟದ ಸಂಪನ್ನೂಲ ವ್ಯಕ್ತಿಯಾಗಿ ತಮ್ಮನ್ನು ತೊಡಗಿಸಿಕೊಂಡವರು. "ಹೊರಬೀಡು" ಇವರ ಕಥಾ ಸಂಕಲನವಾಗಿದೆ. ಇದಾಗಲೇ ಎಂಟುನೂರಕ್ಕೂ ಅಧಿಕ ಮುಕ್ತಕಗಳನ್ನು ಅರ್ಥ ಸಹಿತ ಬರೆದು ಸಾಮಾಜಿಕ ಜಾಲತಾಣಗಳಲ್ಲೂ ಪ್ರಸಿದ್ಧರಾಗಿದ್ದಾರೆ.
Latest posts by ಶ್ರೀ ಮುರಳೀಧರ ಹೆಚ್ ಆರ್ (see all)
- ಭವ ಕಳೆವ ಶಿವ ಸತ್ಯ - September 6, 2021
- ಬಾಳಿನಾಹವ - September 4, 2021
- ಪಿಡಿದರಿವಿನೊಳ್ಮಾಗು - September 3, 2021
