ಬೇಡುತಿಷ್ಟಾರ್ಥಗಳ
ಕೊಡುವೆಯೇನಭವಂಗೆ
ಇಟ್ಟುದೆಲ್ಲವು ದೇವ
ಕೊಟ್ಟುದೇ ತಾನೆ !?
ಏನ ಕೊಟ್ಟೆಂಬುದಿರ
ಲೆಂತು ಕೊಟ್ಟದ ಪೇಳು
ಕೊಟ್ಟ ಭಾವವದೆಂತೊ
ಜಾಣಮೂರ್ಖ //
ಭಗವಂತನ ಬಳಿ ನಾವೆಲ್ಲಾ ಯಾಚಕರೇ. ಆಳಾಗಲಿ , ಅರಸನಾಗಲಿ ! ಯಾರಾದರೂ ಸರಿಯೇ. ಆದರೆ ಅವನಿಗೆ ನಾವೇನು ಕೊಡಲು ಸಾಧ್ಯ ದೇವನಿಗೆ ? ಹಣ್ಣು, ಕಾಯಿ , ಕಡ್ಡಿ , ಕರ್ಪೂರ , ಚಿನ್ನ, ಬೆಳ್ಳಿ ಏನೇ ಅರ್ಪಿಸಿದರೂ ಅದೆಲ್ಲವೂ ಭಗವಂತ ಕೊಟ್ಟುದೇ ಅಲ್ಲವೇ ? ಆದ್ದರಿಂದ ನಾವು ಅವನಿಗೆ ಏನು ಅರ್ಪಿಸಿದೆವು ಎಂಬುದಕ್ಕಿಂತ ಹೇಗೆ ಅರ್ಪಿಸಿದೆವು ಎಂಬುದೇ ಮುಖ್ಯ. ಇಲ್ಲಿ ಕೊಡುವ ನಮ್ಮ ಮನಸ್ಸಿನ ಭಕ್ತಿ , ಭಾವಗಳೇ ಮುಖ್ಯ. ‘ನಾನು’ ಕೊಟ್ಟೆನೆಂಬ ಭಾವ ಲವಲೇಶ ಮಾತ್ರವೂ ಸುಳಿಯಬಾರದು. ಅವನು ಭಕ್ತಿಪರಾಧೀನ. ಭಕ್ತರ ಬಂಧು. ಭೌತಿಕವಾದುದೇನನ್ನೂ ಅವನು ಗಣಿಸನು. ಆದರೆ ಹಣ್ಣಿಗಿಂತ ಹಣ್ಣಾದ ನಮ್ಮ ಮನಸ್ಸು !ಕಾಯಿಗಿಂತ ಕಾಯವನ್ನು ಸೇವೆಗೊಪ್ಪಿಸುವ ಪರಿಯೇ ಅವನಿಗೆ ಮುಖ್ಯ. ಏನಂತೀರಿ ?
ಶ್ರೀ ಮುರಳೀಧರ ಹೆಚ್ ಆರ್ ಮೂಲತಃ ಚಿತ್ರದುರ್ಗ ಜಿಲ್ಲೆಯ ಹೊಸದುರ್ಗ ತಾಲ್ಲೂಕಿನ ಹೆಗ್ಗೆರೆ ಗ್ರಾಮದವರು ಪ್ರಸ್ತುತ ತಿಪಟೂರಿನ ಬಾಲಕಿಯರ ಸರ್ಕಾರೀ ಪದವಿ ಪೂರ್ವ ಕಾಲೇಜಿನ ಪ್ರಾಢಶಾಲಾ ವಿಭಾಗದಲ್ಲಿ ಕನ್ನಡ ಭಾಷಾ ಉಪದಾಧ್ಯಾಯರಾಗಿ ಕರ್ತವ್ಯ ನಿರ್ವಹಿಸುತ್ತಿದ್ದಾರೆ. ಸಾಹಿತ್ಯ, ಕಲೆ, ಸಂಗೀತ ಮೊದಲಾದವುಗಳಲ್ಲಿ ಸಕ್ರಿಯವಾಗಿ ತೊಡಗಿಸಿಕೊಂಡಿರುವ ಇವರು ಶಿಕ್ಷಣ ಇಲಾಖೆಯಲ್ಲಿ ರಾಜ್ಯಮಟ್ಟದ ಸಂಪನ್ನೂಲ ವ್ಯಕ್ತಿಯಾಗಿ ತಮ್ಮನ್ನು ತೊಡಗಿಸಿಕೊಂಡವರು. "ಹೊರಬೀಡು" ಇವರ ಕಥಾ ಸಂಕಲನವಾಗಿದೆ. ಇದಾಗಲೇ ಎಂಟುನೂರಕ್ಕೂ ಅಧಿಕ ಮುಕ್ತಕಗಳನ್ನು ಅರ್ಥ ಸಹಿತ ಬರೆದು ಸಾಮಾಜಿಕ ಜಾಲತಾಣಗಳಲ್ಲೂ ಪ್ರಸಿದ್ಧರಾಗಿದ್ದಾರೆ.
Latest posts by ಶ್ರೀ ಮುರಳೀಧರ ಹೆಚ್ ಆರ್ (see all)
- ಭವ ಕಳೆವ ಶಿವ ಸತ್ಯ - September 6, 2021
- ಬಾಳಿನಾಹವ - September 4, 2021
- ಪಿಡಿದರಿವಿನೊಳ್ಮಾಗು - September 3, 2021
