ಆಳೇನು ಅರಸೇನು
ಆರುಳಿದರೀ ಜಗದಿ !?
ಪಾಳಿಬರೆ ವಿಧಿಗೂಳಿ
ದಾಳಿ ತಪ್ಪೀತೆ ?
ಎತ್ತರೆತ್ತರ ಹಾರಿ
ಹೊತ್ತು ಮೀರಲು ಹಕ್ಕಿ
ಮತ್ತೆ ಗೂಡಿಗೆ ಬರದೆ ?
ಜಾಣಮೂರ್ಖ //
ಈ ಜಗತ್ತು ತುಂಬಾ ವಿಚಿತ್ರ ! ಆಳಾದರೂ , ಅರಸನಾದರೂ ಯಾರಾದರೂ ವಿಧಿಯ ಎದಿರು ಒಂದೇ. ವಿಧಿಯು ತನ್ನ ಕಟ್ಟಳೆಯನ್ನು ಮೀರದು. ಸರದಿ ಬಂದಾಗ ನಾವೆಷ್ಟೇ ಶ್ರೀಮಂತರಾದರೂ , ಶ್ರೇಷ್ಠರಾದರೂ , ಪ್ರಭಾವಶಾಲಿಗಳಾದರೂ ವಿಧಿಗೆ ಶರಣಾಗಲೇ ಬೇಕು. ಹಕ್ಕಿ ಎಷ್ಟೇ ಎತ್ತರದಲ್ಲಿ ಹಾರಿದರೂ ಸಹ ಹೊತ್ತು ಮುಳುಗಿದ ಮೇಲೆ ಮತ್ತೆ ಗೂಡಿಗೆ ಬರಲೇಬೇಕಲ್ಲವೇ ಗೆಳೆಯರೇ ? ಆಕಾಶದಲ್ಲೇ ನಿದ್ರಿಸಲಾದೀತೆ !? ವಿಶ್ರಾಂತಿ ಪಡೆಯಲಾದೀತೆ !? ಹಾಗೆಯೇ ನಾವೆಷ್ಟೇ ಎತ್ತರಕ್ಕೆ ಬೆಳೆದರೂ ಒಂದು ದಿನ ಕೆಳಗಿಳಿಯಲೇ ಬೇಕು. ಈ ಅರಿವನ್ನು ಪಡೆದವರು ಅಹಂಕಾರ ಮತ್ಸರಾದಿ ಗುಣಗಳಿಂದ ದೂರಾಗಿ ಘನತರವಾದ ಶಾಂತಿ ಸಮಾಧಾನಗಳನ್ನು ಹೊಂದಿದವರಾಗುತ್ತಾರೆ. ಅದಕ್ಕೇ ದಾಸರು -“ಅಲ್ಲಿದೇ ನಮ್ಮನೇ ಇಲ್ಲಿ ಬಂದೆ ಸುಮ್ಮನೇ” ಎಂದಿರುವುದು ಎಷ್ಟು ಮಾರ್ಮಿಕ ! ಎಷ್ಟು ಸತ್ಯ ! ಅಲ್ಲವೇ ಗೆಳೆಯರೇ ?
ಶ್ರೀ ಮುರಳೀಧರ ಹೆಚ್ ಆರ್ ಮೂಲತಃ ಚಿತ್ರದುರ್ಗ ಜಿಲ್ಲೆಯ ಹೊಸದುರ್ಗ ತಾಲ್ಲೂಕಿನ ಹೆಗ್ಗೆರೆ ಗ್ರಾಮದವರು ಪ್ರಸ್ತುತ ತಿಪಟೂರಿನ ಬಾಲಕಿಯರ ಸರ್ಕಾರೀ ಪದವಿ ಪೂರ್ವ ಕಾಲೇಜಿನ ಪ್ರಾಢಶಾಲಾ ವಿಭಾಗದಲ್ಲಿ ಕನ್ನಡ ಭಾಷಾ ಉಪದಾಧ್ಯಾಯರಾಗಿ ಕರ್ತವ್ಯ ನಿರ್ವಹಿಸುತ್ತಿದ್ದಾರೆ. ಸಾಹಿತ್ಯ, ಕಲೆ, ಸಂಗೀತ ಮೊದಲಾದವುಗಳಲ್ಲಿ ಸಕ್ರಿಯವಾಗಿ ತೊಡಗಿಸಿಕೊಂಡಿರುವ ಇವರು ಶಿಕ್ಷಣ ಇಲಾಖೆಯಲ್ಲಿ ರಾಜ್ಯಮಟ್ಟದ ಸಂಪನ್ನೂಲ ವ್ಯಕ್ತಿಯಾಗಿ ತಮ್ಮನ್ನು ತೊಡಗಿಸಿಕೊಂಡವರು. "ಹೊರಬೀಡು" ಇವರ ಕಥಾ ಸಂಕಲನವಾಗಿದೆ. ಇದಾಗಲೇ ಎಂಟುನೂರಕ್ಕೂ ಅಧಿಕ ಮುಕ್ತಕಗಳನ್ನು ಅರ್ಥ ಸಹಿತ ಬರೆದು ಸಾಮಾಜಿಕ ಜಾಲತಾಣಗಳಲ್ಲೂ ಪ್ರಸಿದ್ಧರಾಗಿದ್ದಾರೆ.
Latest posts by ಶ್ರೀ ಮುರಳೀಧರ ಹೆಚ್ ಆರ್ (see all)
- ಭವ ಕಳೆವ ಶಿವ ಸತ್ಯ - September 6, 2021
- ಬಾಳಿನಾಹವ - September 4, 2021
- ಪಿಡಿದರಿವಿನೊಳ್ಮಾಗು - September 3, 2021
