ಸತ್ಯದರ್ಶನ

ಮುಚ್ಚಿಪೋಪುದು ವಿಶ್ವ
ಮೊಂದು ದಿನ ಕತ್ತಲೆಯೊ
ಲುಳಿವಿದೇ ಮತಧರ್ಮ
ಹೆಣ್ಣು ಹೊನ್ಮಣ್ಣು !?
ಭಾವ ಬೆಮೆಯಳಿದು ಬಾ
ಸಂತಸವ ಕಾಣುಬಾ
ಸತ್ಯದರ್ಶನಮಿಹುದೊ
ಜಾಣಮೂರ್ಖ //

ಸ್ನೇಹಿತರೇ , ಮುಂದೊಂದು ದಿನ ಈ ಭೂಮಿಯೂ ಸಹ ಸೀಮಾತೀತವಾದ ಸೃಷ್ಠಿಯ ಅಗಾಧತೆಯಲ್ಲಿ ಮುಚ್ಚಿಹೋಗುತ್ತದೆ. ಆಗ ಎಲ್ಲೆಲ್ಲೂ ಶೂನ್ಯ ! ನಿಶ್ಶಬ್ದ ! ಗಾಡಾಂಧಕಾರ ! ಮುಂದಿನದೇನೋ ಬಲ್ಲವರಾರು !? ಇದಂತೂ ಒಂದು ದಿನ ಆಗಿಯೇ ಆಗುತ್ತದೆ. ಬ್ಲ್ಯಾಕ್ ಹೋಲ್ ಸಿದ್ಧಾಂತ ಇದನ್ನೇ ಹೇಳುತ್ತದೆ. ಹೀಗಿರುವಾಗ ನಮ್ಮ ಜಾತಿ , ಮತ , ಪಂಥ ,ಧರ್ಮಗಳಾಗಲಿ ಹೆಣ್ಣು ಹೊನ್ನು ಮಣ್ಣಾಗಲಿ ಚಿರವೇ ! ಶಾಶ್ವತವೇ !? ಏಕೆ ಸುಮ್ಮನೆ ಹೊಡೆದಾಡುತ್ತೇವೋ ಭಗವಂತನೇ ಬಲ್ಲ. ಇದನ್ನೊಮ್ಮೆ ಮನಸ್ಸಿನಲ್ಲಿ ಕಲ್ಪಿಸಿಕೊಳ್ಳುತ್ತಾ ಕಣ್ಮುಚ್ಚಿ ಧ್ಯಾನಾಸಕ್ತರಾಗಿ ! ನೋಡಿ ಹೇಗಿರುತ್ತದೆಯೆಂದು. ಆದರೆ ಇದಕ್ಕೆ ಭ್ರಮೆಯ ಭಾವವನ್ನು ಕಳೆದು ಬರಬೇಕು. ನಿಜವಾದ ಸಂತಸವನ್ನು ಕಾಣುವ ಉದ್ದೇಶದಿಂದ ಬರಬೇಕು. ನಿರ್ಲಿಪ್ತತೆಯಿಂದ ಕೂರಬೇಕು. ಒಂದು ಹಂತದಲ್ಲಿ ಬದುಕಿನ ಸತ್ಯದರ್ಶನವಾಗುತ್ತದೆ. ಪ್ರಕೃತಿಯ ಅಗಾಧತೆಯ ಮುಂದೆ ನಾವೆಷ್ಟರವರೆಂಬುದು ತಿಳಿಯುತ್ತದೆ ! ಇನ್ನೂ ಏನೇನೋ ಅವ್ಯಕ್ತವಾದ ಅನುಭವಗಳಾಗಬಹುದು ! ಇದರಿಂದ ಎಲ್ಲರಲ್ಲಾಗುವ ಬದಲಾವಣೆಯನ್ನು ನಾನು ಹೇಳಲಾರೆ. ಆದರೆ ಕಿಂಚಿತ್ ಅಜ್ಞಾನವಂತೂ ದೂರವಾಗಬಹುದೇನೋ !?
ಏನಂತೀರಿ !?

Author
Recent Posts

ಶ್ರೀ ಮುರಳೀಧರ ಹೆಚ್ ಆರ್

ಶ್ರೀ ಮುರಳೀಧರ ಹೆಚ್ ಆರ್ ಮೂಲತಃ ಚಿತ್ರದುರ್ಗ ಜಿಲ್ಲೆಯ ಹೊಸದುರ್ಗ ತಾಲ್ಲೂಕಿನ ಹೆಗ್ಗೆರೆ ಗ್ರಾಮದವರು ಪ್ರಸ್ತುತ ತಿಪಟೂರಿನ ಬಾಲಕಿಯರ ಸರ್ಕಾರೀ ಪದವಿ ಪೂರ್ವ ಕಾಲೇಜಿನ ಪ್ರಾಢಶಾಲಾ ವಿಭಾಗದಲ್ಲಿ ಕನ್ನಡ ಭಾಷಾ ಉಪದಾಧ್ಯಾಯರಾಗಿ ಕರ್ತವ್ಯ ನಿರ್ವಹಿಸುತ್ತಿದ್ದಾರೆ. ಸಾಹಿತ್ಯ, ಕಲೆ, ಸಂಗೀತ ಮೊದಲಾದವುಗಳಲ್ಲಿ ಸಕ್ರಿಯವಾಗಿ ತೊಡಗಿಸಿಕೊಂಡಿರುವ ಇವರು ಶಿಕ್ಷಣ ಇಲಾಖೆಯಲ್ಲಿ ರಾಜ್ಯಮಟ್ಟದ ಸಂಪನ್ನೂಲ ವ್ಯಕ್ತಿಯಾಗಿ ತಮ್ಮನ್ನು ತೊಡಗಿಸಿಕೊಂಡವರು. "ಹೊರಬೀಡು" ಇವರ ಕಥಾ ಸಂಕಲನವಾಗಿದೆ. ಇದಾಗಲೇ ಎಂಟುನೂರಕ್ಕೂ ಅಧಿಕ ಮುಕ್ತಕಗಳನ್ನು ಅರ್ಥ ಸಹಿತ ಬರೆದು ಸಾಮಾಜಿಕ ಜಾಲತಾಣಗಳಲ್ಲೂ ಪ್ರಸಿದ್ಧರಾಗಿದ್ದಾರೆ.

Latest posts by ಶ್ರೀ ಮುರಳೀಧರ ಹೆಚ್ ಆರ್ (see all)