ವಿಷಯಗಳ ಭಾರದಿಂ
ಜರ್ಜರಿತಮೀ ಬದುಕು
ಭಾರವಿಳಿಯಲು ಬಾಳ
ಪಯಣ ಬಲು ಸುಗಮ !
ಮನೆಯ ದೀಪಕೆ ಮುತ್ತ
ನಿಕ್ಕುವರೆ ಮುದದಿಂದ ?
ಹೊರೆಯಿಳಿಸು ದಾರಿಯಿದೆ
ಜಾಣಮೂರ್ಖ //
ಸವಿಯ ಬೇಕಾದ ಬದುಕಿನಲ್ಲಿ ವಿಷಯಾಂಧಕಾರವು ತುಂಬಿದೆ. ಎತ್ತ ನೋಡಿದರೂ ಕತ್ತಲೇ ! ಮನದ ಕತ್ತಲು! ಬದುಕು ದಾರಿಕಾಣದೆ ಜರ್ಜರಿತವಾಗಿದೆ. ಒಂದು ಕ್ಷಣ ಮನದ ಭಾರವನ್ನಿಳಿಸಿ ಹಗುರವಾಗಿಬಿಡಯ್ಯಾ ! ಸರಳವಾಗಿಸಿ ಬಿಡು ಬದುಕ. ಬಾಳ ದಾರಿ ಬಹು ಸುಲಭವಾಗ ! ಮನೆ ದೀಪ. ನಮಗೆಲ್ಲಾ ಬೆಳಕ ನೀಡುತ್ತದೆಯೆಂದು ಯಾರಾದರೂ ಮುತ್ತನಿಡುವರೇನದಕೆ ? ಈ ಬದುಕೂ ಹಾಗೆ. ಅಂಟಿಯೂ ಅಂಟದಂತೆ ಇದ್ದು ಆನಂದಿಸಿ ಹೋಗಬೇಕು. ಯಾವುದಕ್ಕೂ ಅಂಟಿಕೊಳ್ಳಬಾರದು. ವಿಷಯಗಳ ಹೊರೆಯನ್ನು ಹಂತಹಂತವಾಗಿ ಕಳೆದು ಮುನ್ನಡೆದಾಗ ದಾರಿ ತಾನಾಗೇ ಸಿಗುತ್ತದೆ. ಇದರಲ್ಲಿ ಸಂಶಯವಿಲ್ಲ.
ಶ್ರೀ ಮುರಳೀಧರ ಹೆಚ್ ಆರ್ ಮೂಲತಃ ಚಿತ್ರದುರ್ಗ ಜಿಲ್ಲೆಯ ಹೊಸದುರ್ಗ ತಾಲ್ಲೂಕಿನ ಹೆಗ್ಗೆರೆ ಗ್ರಾಮದವರು ಪ್ರಸ್ತುತ ತಿಪಟೂರಿನ ಬಾಲಕಿಯರ ಸರ್ಕಾರೀ ಪದವಿ ಪೂರ್ವ ಕಾಲೇಜಿನ ಪ್ರಾಢಶಾಲಾ ವಿಭಾಗದಲ್ಲಿ ಕನ್ನಡ ಭಾಷಾ ಉಪದಾಧ್ಯಾಯರಾಗಿ ಕರ್ತವ್ಯ ನಿರ್ವಹಿಸುತ್ತಿದ್ದಾರೆ. ಸಾಹಿತ್ಯ, ಕಲೆ, ಸಂಗೀತ ಮೊದಲಾದವುಗಳಲ್ಲಿ ಸಕ್ರಿಯವಾಗಿ ತೊಡಗಿಸಿಕೊಂಡಿರುವ ಇವರು ಶಿಕ್ಷಣ ಇಲಾಖೆಯಲ್ಲಿ ರಾಜ್ಯಮಟ್ಟದ ಸಂಪನ್ನೂಲ ವ್ಯಕ್ತಿಯಾಗಿ ತಮ್ಮನ್ನು ತೊಡಗಿಸಿಕೊಂಡವರು. "ಹೊರಬೀಡು" ಇವರ ಕಥಾ ಸಂಕಲನವಾಗಿದೆ. ಇದಾಗಲೇ ಎಂಟುನೂರಕ್ಕೂ ಅಧಿಕ ಮುಕ್ತಕಗಳನ್ನು ಅರ್ಥ ಸಹಿತ ಬರೆದು ಸಾಮಾಜಿಕ ಜಾಲತಾಣಗಳಲ್ಲೂ ಪ್ರಸಿದ್ಧರಾಗಿದ್ದಾರೆ.
Latest posts by ಶ್ರೀ ಮುರಳೀಧರ ಹೆಚ್ ಆರ್ (see all)
- ಭವ ಕಳೆವ ಶಿವ ಸತ್ಯ - September 6, 2021
- ಬಾಳಿನಾಹವ - September 4, 2021
- ಪಿಡಿದರಿವಿನೊಳ್ಮಾಗು - September 3, 2021
