ದೇವನೆಡೆ

ಕಡಲ ಮತ್ಸ್ಯವು ಕಡಲ
ಭವ್ಯತೆಯ ಕಾಣದೆಲೆ
ಮನದಿ ಚಿಂತೆಯ ತಳೆದು
ದುಃಖಿಸುವ ತೆರದಿ !
ಕಾಣ್ವೆಡೆಯೊಳಲ್ಲಲ್ಲೆ
ಕಾಣ್ವ ದೇವನ ಕಾಣ
ದಂತ ಮೇಳವ ಕಾಣೊ
ಜಾಣಮೂರ್ಖ //

ಸಮುದ್ರದಲ್ಲೇ ಇರುವ ಮೀನೊಂದು ಸಮುದ್ರದ ಭವ್ಯತೆಯನ್ನು ನೋಡಲು ತವಕಿಸಿ ಮನಸ್ಸಿನಲ್ಲಿ ಚಿಂತೆಗೊಳಗಾಯ್ತು. ತನ್ನವರನ್ನಲ್ಲಾ ಕೇಳಿತು. ಕಡಲೆಂದರೆ ಹೇಗಿರುತ್ತದೆ ಎಂದು ! ಈ ಮೀನಿನ ಸ್ಥಿತಿಯೇ ಅವುಗಳದ್ದೂ ಸಹ ! ಅವುಗಳೂ ಕೂಡ ತಾವು ಕಂಡಿಲ್ಲವೆಂದೇ ಹೇಳಿದವು. ತಮ್ಮ ಬದುಕಿಗೆ ಮೂಲಾಧಾರವಾದ ಕಡಲಿನೊಳಗೇ ಇದ್ದು , ಕಡಲ ಕಾಣಬೇಕೆಂದು ತವಕಿಸಿ , ದುಃಖಿಸುವ ಮೀನಂತೆಯೇ ನಾವು ಸಹ ! ಅಲ್ಲವೇ ಗೆಳೆಯರೇ ! ಸ್ವಲ್ಪ ಆಳವಾಗಿ ಚಿಂತಿಸಿ. ನಾವೆಲ್ಲರೂ ಆ ಭಗವಂತನ ಜೊತೆಯಲ್ಲೇ ಇದ್ದೇವೆ. ನೋಡಬೇಕೆಂದ ಕಡೆಯೆಲ್ಲಾ ಅವನು ಗೋಚರಿಸುತ್ತಾನೆ. ಭಗವದಾನಂದವನ್ನು ನೀಡುತ್ತಾನೆ. ಆದರೆ ಜಗದ ಮಾಯಾಪಾಶಕ್ಕೆ ಬಲಿಯಾಗಿ ಆ ಆನಂದವನ್ನು ಅನುಭವಿಸುವಲ್ಲಿ ನಾವು ವಿಫಲರಾಗುತ್ತೇವೆ ಅಷ್ಟೆ. ಅವನ ಜೊತೆಯಲ್ಲೇ ಇದ್ದು ಅವನನ್ನು ಕಾಣಲು ಪರಿತಪಿಸುತ್ತೇವೆ. ತಪಸ್ಸು ಮಾಡುತ್ತೇವೆ. ಕಾಣ್ವ ಕಣ್ಣಿರುವವರಿಗೆ ಭಗವಂತ ಬಣ್ಣ , ರುಚಿ , ಶಬ್ದ ಇತ್ಯಾದಿಗಳೆಲ್ಲವುಗಳಲ್ಲೂ ಕಾಣುತ್ತಾನೆ. ಹೂವನ್ನು ನೋಡಬಹುದಾದರೂ ಹೂವಿನ ಸುಗಂಧವನ್ನು ನೋಡಲು ಸಾಧ್ಯವೇನು ? ಅನುಭವಿಸಬೇಕಷ್ಟೆ ! ಹಾಗೆಯೇ ಪ್ರಪಂಚದ ಚರಾಚರ ವಸ್ತುಗಳೆಲ್ಲದರಲ್ಲೂ ಇರುವ ಭಗವಂತನ ಅಸ್ತಿತ್ವವನ್ನು ಅನುಭವಿಸಿದಾಗಲೇ ಗೊತ್ತಾಗುವುದು. ಬಲ್ಲವನೇ ಬಲ್ಲ ಬೆಲ್ಲದಾ ಸವಿಯ ! ಏನಂತೀರಿ !?

Author
Recent Posts

ಶ್ರೀ ಮುರಳೀಧರ ಹೆಚ್ ಆರ್

ಶ್ರೀ ಮುರಳೀಧರ ಹೆಚ್ ಆರ್ ಮೂಲತಃ ಚಿತ್ರದುರ್ಗ ಜಿಲ್ಲೆಯ ಹೊಸದುರ್ಗ ತಾಲ್ಲೂಕಿನ ಹೆಗ್ಗೆರೆ ಗ್ರಾಮದವರು ಪ್ರಸ್ತುತ ತಿಪಟೂರಿನ ಬಾಲಕಿಯರ ಸರ್ಕಾರೀ ಪದವಿ ಪೂರ್ವ ಕಾಲೇಜಿನ ಪ್ರಾಢಶಾಲಾ ವಿಭಾಗದಲ್ಲಿ ಕನ್ನಡ ಭಾಷಾ ಉಪದಾಧ್ಯಾಯರಾಗಿ ಕರ್ತವ್ಯ ನಿರ್ವಹಿಸುತ್ತಿದ್ದಾರೆ. ಸಾಹಿತ್ಯ, ಕಲೆ, ಸಂಗೀತ ಮೊದಲಾದವುಗಳಲ್ಲಿ ಸಕ್ರಿಯವಾಗಿ ತೊಡಗಿಸಿಕೊಂಡಿರುವ ಇವರು ಶಿಕ್ಷಣ ಇಲಾಖೆಯಲ್ಲಿ ರಾಜ್ಯಮಟ್ಟದ ಸಂಪನ್ನೂಲ ವ್ಯಕ್ತಿಯಾಗಿ ತಮ್ಮನ್ನು ತೊಡಗಿಸಿಕೊಂಡವರು. "ಹೊರಬೀಡು" ಇವರ ಕಥಾ ಸಂಕಲನವಾಗಿದೆ. ಇದಾಗಲೇ ಎಂಟುನೂರಕ್ಕೂ ಅಧಿಕ ಮುಕ್ತಕಗಳನ್ನು ಅರ್ಥ ಸಹಿತ ಬರೆದು ಸಾಮಾಜಿಕ ಜಾಲತಾಣಗಳಲ್ಲೂ ಪ್ರಸಿದ್ಧರಾಗಿದ್ದಾರೆ.

Latest posts by ಶ್ರೀ ಮುರಳೀಧರ ಹೆಚ್ ಆರ್ (see all)