ತೊಳೆ ಮೊದಲು ನಿನ್ನೊಳಹ

ತೋಳ ಹಳ್ಳಕೆ ಬೀಳ್ದ
ರಾಳಿಗೊಂದೆಸೆಗಲ್ಲು
ಪೇಳರೇಕವರ ಬಾ
ಳ್ಬಂಗಗಳ ಹುಳುಕ ?
ತಾಳ್ಮರುಳೆ ಲೋಗರೊಳ
ಹುಳುಕುಗಳು ಇರಲಂತೆ
ತೊಳೆ ಮೊದಲು ನಿನ್ನೊಳಹ
ಜಾಣಮೂರ್ಖ //

ನಾವೆಷ್ಟು ವಿಚಿತ್ರ ಎಂದರೆ ಬೇರೆಯವರೊಂದಿಗೆ ನಮ್ಮನ್ನು ಹೋಲಿಸಿಕೊಂಡು ಬದುಕುವುದರಲ್ಲೇ ಬಹುಕಾಲ ಕಳೆದುಬಿಡುತ್ತೇವೆ. ಆ ಬದುಕಿನ ಹಾದಿಯಲ್ಲಿ ನೆರೆ ಹೊರೆಯವರ , ಬಂಧು ಬಾಂಧವರ ಒಂದೇ ಒಂದು ಸಣ್ಣ ದೋಷ ಸಿಕ್ಕಿಬಿಟ್ಟರೆ ಸಾಕು ಅದೇನೋ ದೊಡ್ಡ ಪ್ರಮಾದವೆಂಬಂತೆ ಬಿಂಬಿಸಿ ತುಂಬಾ ವಿಕೃತವಾದ ಸಂತೋಷ ಪಡುತ್ತೇವೆ. ಆದರೆ ನಮ್ಮ ಬಾಳಿನ ಹುಳುಕುಗಳನ್ನು ತುಂಬಾ ಗೌಪ್ಯವಾಗಿ ಮುಚ್ಚಿಡುತ್ತೇವೆ. ಏನೂ ನಡೆದೇ ಇಲ್ಲವೆಂಬಂತೆ ಇದ್ದುಬಿಡುತ್ತೇವೆ. ಅವರು ಹಾಗೆ , ಇವರು ಹೀಗೆ ಎಂದಾಡುವುದಕ್ಕಿಂತ ನಾನೆಂತು ಬದುಕಿದ್ದೇನೆ ಎಂದು ಬಂದ ಹೆಜ್ಜೆ ಗುರುತುಗಳನ್ನು ಒಮ್ಮೆ ಹಿಂತಿರುಗಿ ನೋಡಯ್ಯ ಗೆಳೆಯ ! ಇತರರ ಬದುಕು ಹೇಗಾದರೂ ಇರಲಿ ನಿನ್ನ ಅಂತರಂಗವನ್ನು ಒಮ್ಮೆ ನೀನು ಶುದ್ಧಿಗೊಳಿಸಿಕೊ! ಅಷ್ಟು ಸಾಕು. ಅದೇನೋ ಅನ್ನುವರಲ್ಲ ತೋಳ ಹಳ್ಳಕೆ ಬಿದ್ದರೆ ಆಳಿಗೊಂದೆಸೆಗಲ್ಲು ಎನ್ನುವ ಹಾಗೆ ನಮ್ಮ ಮಾತುಗಳಿಂದ ಅನ್ಯಥಾ ಇತರರ ಮನಸ್ಸಿಗೆ ನೋವುಂಟು ಮಾಡದೆ ಒಳ್ಳೆಯ ಮಾತುಗಳನ್ನಾಡಿ , ಸಾಧ್ಯವಾದರೆ ನೊಂದವರ ಬದುಕಿಗೊಂದಿಷ್ಟು ಸ್ಪೂರ್ತಿ ನೀಡೋಣ. ಇಲ್ಲದಿದ್ದರೆ ಸುಮ್ಮನಿದ್ದುಬಿಡೋಣ. ಕೆದಕಿ ನೋಯಿಸುವುದರಿಂದ ಸಿಗುವ ಲಾಭವಾದರೂ ಏನು ? ಅಲ್ಲವೇ ಗೆಳೆಯರೇ !?

Author
Recent Posts

ಶ್ರೀ ಮುರಳೀಧರ ಹೆಚ್ ಆರ್

ಶ್ರೀ ಮುರಳೀಧರ ಹೆಚ್ ಆರ್ ಮೂಲತಃ ಚಿತ್ರದುರ್ಗ ಜಿಲ್ಲೆಯ ಹೊಸದುರ್ಗ ತಾಲ್ಲೂಕಿನ ಹೆಗ್ಗೆರೆ ಗ್ರಾಮದವರು ಪ್ರಸ್ತುತ ತಿಪಟೂರಿನ ಬಾಲಕಿಯರ ಸರ್ಕಾರೀ ಪದವಿ ಪೂರ್ವ ಕಾಲೇಜಿನ ಪ್ರಾಢಶಾಲಾ ವಿಭಾಗದಲ್ಲಿ ಕನ್ನಡ ಭಾಷಾ ಉಪದಾಧ್ಯಾಯರಾಗಿ ಕರ್ತವ್ಯ ನಿರ್ವಹಿಸುತ್ತಿದ್ದಾರೆ. ಸಾಹಿತ್ಯ, ಕಲೆ, ಸಂಗೀತ ಮೊದಲಾದವುಗಳಲ್ಲಿ ಸಕ್ರಿಯವಾಗಿ ತೊಡಗಿಸಿಕೊಂಡಿರುವ ಇವರು ಶಿಕ್ಷಣ ಇಲಾಖೆಯಲ್ಲಿ ರಾಜ್ಯಮಟ್ಟದ ಸಂಪನ್ನೂಲ ವ್ಯಕ್ತಿಯಾಗಿ ತಮ್ಮನ್ನು ತೊಡಗಿಸಿಕೊಂಡವರು. "ಹೊರಬೀಡು" ಇವರ ಕಥಾ ಸಂಕಲನವಾಗಿದೆ. ಇದಾಗಲೇ ಎಂಟುನೂರಕ್ಕೂ ಅಧಿಕ ಮುಕ್ತಕಗಳನ್ನು ಅರ್ಥ ಸಹಿತ ಬರೆದು ಸಾಮಾಜಿಕ ಜಾಲತಾಣಗಳಲ್ಲೂ ಪ್ರಸಿದ್ಧರಾಗಿದ್ದಾರೆ.

Latest posts by ಶ್ರೀ ಮುರಳೀಧರ ಹೆಚ್ ಆರ್ (see all)