ವಿಧಿ ಪಡೆಯದ ಭಾಗ್ಯ !

ಕೊಡುವ ಭಾಗ್ಯವನೆಲ್ಲ
ಬಿಡದೆ ಪಡೆವುದು ವಿಧಿಯು !
ಪಡೆಯದಿಹ ಭಾಗ್ಯಮಿದೆ
ಒಡನೆ ಪಡೆ ಕೆಳೆಯ !
ಅಳಿವ ವೈಭೊಗ ತೊರೆ
ದಾತ್ಮದರಿವನು ಪಡೆದು
ಮುಕ್ತನಾಗೇಳೇಳೊ
ಜಾಣಮೂರ್ಖ //

ವಿಧಿಯು ನಮಗೆ ಯಾವ ಯಾವ ಭಾಗ್ಯವನ್ನು ನೀಡುವುದೋ ಅದನ್ನೆಲ್ಲಾ ಒಮ್ಮೆ ನಿರ್ದಾಕ್ಷಣ್ಯವಾಗಿ ಹಿಂಪಡೆಯುತ್ತದೆ. ಏನನ್ನೂ ಬಿಡುವುದಿಲ್ಲ. ಇದೊಂದು ಮಹಾ ವಿಯೋಗ. ದುಃಖಕರ ! ಎಲ್ಲವೂ ಹೋಗುತ್ತದೆ , ಯಾವುದೂ ಶಾಶ್ವತವಲ್ಲ ಎಂಬುದು ನಿಶ್ಚಿತವಾದ ಮೇಲೆ ದುಃಖವಾದರೂ ಏಕೆ ? ಅಲ್ಲವೇ ಓ ,ಗೆಳೆಯಾ ವಿಧಿಯು ಪಡೆಯದಿಹ ಭಾಗ್ಯವೊಂದಿದೆ. ಅದನ್ನು ಪಡೆದುಕೊಳ್ಳುವ ಅದ್ವಿತೀಯ ಶಕ್ತಿಯೂ ನಿನಗಿದೆ. ಅದೇ ಆತ್ಮಜ್ಞಾನ. ಇದರ ಜಾಡು ಕಷ್ಟವಾದರೂ ಆ ಜಾಡು ಹಿಡಿದರೆ ಮುಗಿಯಿತು. ಮತ್ತೆ ಹಿಂದಿರುಗುವ ಮಾತೇ ಇಲ್ಲ. ಅದೇ ಚಿರವು. ಉಳಿದುದೆಲ್ಲವೂ ನೀರಮೇಲಣ ಗುಳ್ಳೆ ! ಗಾಳಿಗೊಡ್ಡಿದ ಸೊಡರು ! ಎಲ್ಲವೂ ನಶ್ವರ. ಇಂತಹಾ ಅರಿವನ್ನು ಪಡೆದವರು ಭವಬಂಧನಗಳಿಂದ ಮುಕ್ತರಾಗುತ್ತಾರೆ. ಅಂತಹಾ ಶ್ರೇಷ್ಠವಾದ ಆತ್ಮಜ್ಞಾನದ ಜಾಡು ಹಿಡಿದು ಆತ್ಮಾನಂದ ಪಡೆಯೋಣ. ಕಾಲನ ಮನೆಯ ಬಾಗಿಲ ಬಳಿ ಉಪವಾಸ ಕುಳಿತ ಉದ್ಧಾಲಕ ಮಹಾರಾಜನ ಪುತ್ರ ನಚಿಕೇತನು ಆತ್ಮಜ್ಞಾನವನ್ನು ಪಡೆದುದನ್ನು ಒಮ್ಮೆ ಸ್ಮರಿಸಿಕೊಳ್ಳಿ !
ಏಳಿ ಗೆಳೆಯರೇ ಜಾಗೃತರಾಗೋಣ. ಅಂತಹಾ ಅರಿವೀವ ಗುರುವಿನ ಗುಲಾಮರಾಗಿ ಅರಿವ ಪಡೆಯೋಣ. ಪಡೆಯದಿದ್ದರೆ ಮುಕುತಿಯ ಮಾತೆಲ್ಲಿಯದು ! ಅಲ್ಲವೇ !?

Author
Recent Posts

ಶ್ರೀ ಮುರಳೀಧರ ಹೆಚ್ ಆರ್

ಶ್ರೀ ಮುರಳೀಧರ ಹೆಚ್ ಆರ್ ಮೂಲತಃ ಚಿತ್ರದುರ್ಗ ಜಿಲ್ಲೆಯ ಹೊಸದುರ್ಗ ತಾಲ್ಲೂಕಿನ ಹೆಗ್ಗೆರೆ ಗ್ರಾಮದವರು ಪ್ರಸ್ತುತ ತಿಪಟೂರಿನ ಬಾಲಕಿಯರ ಸರ್ಕಾರೀ ಪದವಿ ಪೂರ್ವ ಕಾಲೇಜಿನ ಪ್ರಾಢಶಾಲಾ ವಿಭಾಗದಲ್ಲಿ ಕನ್ನಡ ಭಾಷಾ ಉಪದಾಧ್ಯಾಯರಾಗಿ ಕರ್ತವ್ಯ ನಿರ್ವಹಿಸುತ್ತಿದ್ದಾರೆ. ಸಾಹಿತ್ಯ, ಕಲೆ, ಸಂಗೀತ ಮೊದಲಾದವುಗಳಲ್ಲಿ ಸಕ್ರಿಯವಾಗಿ ತೊಡಗಿಸಿಕೊಂಡಿರುವ ಇವರು ಶಿಕ್ಷಣ ಇಲಾಖೆಯಲ್ಲಿ ರಾಜ್ಯಮಟ್ಟದ ಸಂಪನ್ನೂಲ ವ್ಯಕ್ತಿಯಾಗಿ ತಮ್ಮನ್ನು ತೊಡಗಿಸಿಕೊಂಡವರು. "ಹೊರಬೀಡು" ಇವರ ಕಥಾ ಸಂಕಲನವಾಗಿದೆ. ಇದಾಗಲೇ ಎಂಟುನೂರಕ್ಕೂ ಅಧಿಕ ಮುಕ್ತಕಗಳನ್ನು ಅರ್ಥ ಸಹಿತ ಬರೆದು ಸಾಮಾಜಿಕ ಜಾಲತಾಣಗಳಲ್ಲೂ ಪ್ರಸಿದ್ಧರಾಗಿದ್ದಾರೆ.

Latest posts by ಶ್ರೀ ಮುರಳೀಧರ ಹೆಚ್ ಆರ್ (see all)