ಸತ್ಯಾನಂದ

ಆರು ನೀನೆನುವುದಕೆ
ಕೊಡುತ ಸಾರುತ್ತರವ
ಬಡವನೋ ಬಲ್ಲಿದನೊ
ಮಗನೊ ಮೊಮ್ಮಗನೊ
ಮಂತ್ರಿಯೋ ತಂತ್ರಿಯೋ
ಏನಿರಲಿ ಬಾ ಹೊರಗೆ
ಅದುವೆ ಸತ್ಯಾನಂದ
ಜಾಣಮೂರ್ಖ //

ಈ ಕೆಲಸವನ್ನು ಪ್ರಯೋಗಿಕವಾಗಿ ನೀವೂ ಮಾಡಿ , ಈಗಲೇ ಮಾಡಿ. ಏನೂ ತೊಂದರೆಯಿಲ್ಲ ! ನಿಜವಾಗಿ ನೀವು ಯಾರೆಂಬ ಸತ್ಯ ತಿಳಿಯುತ್ತದೆ. ಏನೆಂದರೆ ಒಂದು ಪ್ರಶ್ನೆ ಹಾಕಿಕೊಳ್ಳಿ. ಅದೇನೆಂದರೆ ನಾನು ಯಾರು ? ಎನ್ನುವುದಷ್ಟೆ. ಉತ್ತರ ಕೊಡುತ್ತಾ ಸಾಗಿ. ನಾನು ಮುರಳೀಧರ( ನೀವು ನಿಮ್ಮ ಹೆಸರು ಹೇಳಿಕೊಳ್ಳಿ ) , ನಾನು ಉಪಾಧ್ಯಾಯ , ನಾನು ಇಂತಹವರ ಮಗ , ಇಂತಹವರ ಮೊಮ್ಮಗ , ನಾನು ಬಡವ , ನಾನು ಶ್ರೀಮಂತ , ನಾನು ಮಂತ್ರಿ , ನಾನು ತಂತ್ರಿ , ನಾನು……… ನೀವು ಏನೇನೋ ಎಲ್ಲವನ್ನೂ ಹೇಳುತ್ತಾ ಹೋಗಿ ! ಒಳ್ಳೆಯದು ಕೆಟ್ಟದ್ದು ಎಲ್ಲಾ ! ಏನೊಂದನ್ನೂ ಉಳಿಸಬೇಡಿ. ಕೊನೆಯಲ್ಲಿ ಏನುಳಿಯುವುದೋ ನೋಡಿ ! ಅದೇ ನಿಜವಾಗಿ ನೀವು. ಲೋಕದ ಸಂಬಂಧಗಳನ್ನೆಲ್ಲಾ ಕಳಚಿ ಹೊರಬರುತ್ತೇವಲ್ಲಾ ! ಅದೆಂತಹಾ ಸ್ಥಿತಿ ಗೊತ್ತೇ ! ಆ ಆನಂದವನ್ನು ನಾನು ಮಾತುಗಳಲ್ಲಿ ಹೇಳಲಾರೆ. ಅದು ಆನಂದದ ಒಂದು ಅವ್ಯಕ್ತ ಸ್ಥಿತಿ. ಅದೇ ನಿತ್ಯ ಸತ್ಯ ! ಸತ್ಯಾನಂದ ! ಜಗನ್ನಾಟಕದಲ್ಲಿ ಎಲ್ಲವನ್ನೂ ಮೀರಿನಿಂತ ಸ್ಥಿತಿ ! ಅದೊಂದು ದಿವ್ಯಾನುಭವ ! ಈ ಸ್ಥಿತಿಯನ್ನು ಸಾಕ್ಷಾತ್ಕರಿಸಿಕೊಂಡವರು ನಿಜವಾಗಿ ಬದುಕಿನ ಸತ್ಯವನ್ನು ಅರಿಯುತ್ತಾರೆ. ಅನುಭವಿಸಿದವರಿಗೇ ಗೊತ್ತು. ಬಲ್ಲವನೇ ಬಲ್ಲ ಬೆಲ್ಲದಾ ಸವಿಯ ಅಲ್ಲವೇ ಗೆಳೆಯರೇ !?

Author
Recent Posts

ಶ್ರೀ ಮುರಳೀಧರ ಹೆಚ್ ಆರ್

ಶ್ರೀ ಮುರಳೀಧರ ಹೆಚ್ ಆರ್ ಮೂಲತಃ ಚಿತ್ರದುರ್ಗ ಜಿಲ್ಲೆಯ ಹೊಸದುರ್ಗ ತಾಲ್ಲೂಕಿನ ಹೆಗ್ಗೆರೆ ಗ್ರಾಮದವರು ಪ್ರಸ್ತುತ ತಿಪಟೂರಿನ ಬಾಲಕಿಯರ ಸರ್ಕಾರೀ ಪದವಿ ಪೂರ್ವ ಕಾಲೇಜಿನ ಪ್ರಾಢಶಾಲಾ ವಿಭಾಗದಲ್ಲಿ ಕನ್ನಡ ಭಾಷಾ ಉಪದಾಧ್ಯಾಯರಾಗಿ ಕರ್ತವ್ಯ ನಿರ್ವಹಿಸುತ್ತಿದ್ದಾರೆ. ಸಾಹಿತ್ಯ, ಕಲೆ, ಸಂಗೀತ ಮೊದಲಾದವುಗಳಲ್ಲಿ ಸಕ್ರಿಯವಾಗಿ ತೊಡಗಿಸಿಕೊಂಡಿರುವ ಇವರು ಶಿಕ್ಷಣ ಇಲಾಖೆಯಲ್ಲಿ ರಾಜ್ಯಮಟ್ಟದ ಸಂಪನ್ನೂಲ ವ್ಯಕ್ತಿಯಾಗಿ ತಮ್ಮನ್ನು ತೊಡಗಿಸಿಕೊಂಡವರು. "ಹೊರಬೀಡು" ಇವರ ಕಥಾ ಸಂಕಲನವಾಗಿದೆ. ಇದಾಗಲೇ ಎಂಟುನೂರಕ್ಕೂ ಅಧಿಕ ಮುಕ್ತಕಗಳನ್ನು ಅರ್ಥ ಸಹಿತ ಬರೆದು ಸಾಮಾಜಿಕ ಜಾಲತಾಣಗಳಲ್ಲೂ ಪ್ರಸಿದ್ಧರಾಗಿದ್ದಾರೆ.

Latest posts by ಶ್ರೀ ಮುರಳೀಧರ ಹೆಚ್ ಆರ್ (see all)