ತಾಯಿ ಶಾರದೆಯೊಡಲು

ಎಂತು ಬರಿದಾಗುವುದು
ತಾಯಿ ಶಾರದೆಯೊಡಲು ?
ಮಡಿಲು ಕರುಣೆಯ ಕಡಲು !
ಕೆರಳೆ ತಾಯ್ ಸಿಡಿಲು !
ಧ್ಯಾನ ಮುದ್ರೆಯ ಕಳೆದು
ಅರಿವ ಕಿರಣವ ಬೀರೆ
ವೈರಾಣು ಹೈರಾಣ
ಜಾಣಮೂರ್ಖ //

ವಿದ್ಯಾಧಿದೇವತೆ ತಾಯಿ ಶಾರದೆಯ ಒಡಲು ಅರಿವಿನ ಕಡಲು. ಅದು ಬರಿದಾಗಲು ಸಾಧ್ಯವೇ ? ಬರಿದಾಗುವುದೆಂಬುದು ಕೇವಲ ಭ್ರಮೆ ಮಾತ್ರವಲ್ಲವೇ ! ಅವಳ ಮಡಿಲು ಕರುಣೆಯ ಕಡಲು. ತಾಯಿ ಕೆರಳಲು ಉಳಿವುಂಟೆ !? ಧ್ಯಾನಮುದ್ರೆಯೊಳಿರುವಳೆಂದ ಮಾತ್ರಕ್ಕೆ ಕೊರೋನದಂತಹಾ ದುಷ್ಟ ವೈರಾಣುಗಳ ಆಟ ನಡೆಯದು. ಅದು ತತ್ಕಾಲಕ್ಕಷ್ಟೆ. ದೈವಶಕ್ತಿಯ ಎದಿರು ದುಷ್ಟಶಕ್ತಿ ನಿಲ್ಲಲು ಸಾಧ್ಯವೇ !? ಓ ,ಗೆಳೆಯಾ ! ಅವಳೊಮ್ಮೆ ತನ್ನ ಧ್ಯಾನಮುದ್ರೆಯ ಕಳೆಯಲಿ. ವೈದ್ಯಜ್ಞಾನ ಸ್ಫೋಟವಾಗಿ ಇಂತಹಾ ಕೋಟಿ ಕೋಟಿ ವೈರಾಣುಗಳು ಆವಿರ್ಭವಿಸಿ ಬಂದರೂ ಹೈರಾಣೆದ್ದು ಹೋಗುತ್ತವೆ. ಭೌತಿಕವಾಗಿ ತರಗತಿಯ ಕೋಣೆಗಳು ಬರಿದಾದರೇನಂತೆ ಗುರುಗಳ ಮುಖೇನವಾಗಿ ಅರಿವಿನ ಕಿರಣಗಳು ಪಸರಿಸಿ ಇಡೀ ಸೃಷ್ಠಿಯನ್ನೇ ಪುನೀತಗೊಳಿಸುತ್ತಿವೆ. ದುಷ್ಟಶಕ್ತಿಯ ಪ್ರಾಬಲ್ಯ ಇಷ್ಟರಲ್ಲೇ ಅಂತ್ಯವಾಗುತ್ತದೆ. ತೀರ ಉದ್ದವಾದದ್ದು ಬಗ್ಗಲೇಬೇಕು. ಅಮೃತ ಸದೃಶ ವಾತಾವರಣ ಮೂಡಲೇಬೇಕು. ಇದೇ ಸತ್ಯವು. ಅಲ್ಲವೇ ಗೆಳೆಯರೆ ?

Author
Recent Posts

ಶ್ರೀ ಮುರಳೀಧರ ಹೆಚ್ ಆರ್

ಶ್ರೀ ಮುರಳೀಧರ ಹೆಚ್ ಆರ್ ಮೂಲತಃ ಚಿತ್ರದುರ್ಗ ಜಿಲ್ಲೆಯ ಹೊಸದುರ್ಗ ತಾಲ್ಲೂಕಿನ ಹೆಗ್ಗೆರೆ ಗ್ರಾಮದವರು ಪ್ರಸ್ತುತ ತಿಪಟೂರಿನ ಬಾಲಕಿಯರ ಸರ್ಕಾರೀ ಪದವಿ ಪೂರ್ವ ಕಾಲೇಜಿನ ಪ್ರಾಢಶಾಲಾ ವಿಭಾಗದಲ್ಲಿ ಕನ್ನಡ ಭಾಷಾ ಉಪದಾಧ್ಯಾಯರಾಗಿ ಕರ್ತವ್ಯ ನಿರ್ವಹಿಸುತ್ತಿದ್ದಾರೆ. ಸಾಹಿತ್ಯ, ಕಲೆ, ಸಂಗೀತ ಮೊದಲಾದವುಗಳಲ್ಲಿ ಸಕ್ರಿಯವಾಗಿ ತೊಡಗಿಸಿಕೊಂಡಿರುವ ಇವರು ಶಿಕ್ಷಣ ಇಲಾಖೆಯಲ್ಲಿ ರಾಜ್ಯಮಟ್ಟದ ಸಂಪನ್ನೂಲ ವ್ಯಕ್ತಿಯಾಗಿ ತಮ್ಮನ್ನು ತೊಡಗಿಸಿಕೊಂಡವರು. "ಹೊರಬೀಡು" ಇವರ ಕಥಾ ಸಂಕಲನವಾಗಿದೆ. ಇದಾಗಲೇ ಎಂಟುನೂರಕ್ಕೂ ಅಧಿಕ ಮುಕ್ತಕಗಳನ್ನು ಅರ್ಥ ಸಹಿತ ಬರೆದು ಸಾಮಾಜಿಕ ಜಾಲತಾಣಗಳಲ್ಲೂ ಪ್ರಸಿದ್ಧರಾಗಿದ್ದಾರೆ.

Latest posts by ಶ್ರೀ ಮುರಳೀಧರ ಹೆಚ್ ಆರ್ (see all)