ಆನೆಗಾನೆಯ ಬಲವು
ಆಡಿಗಾಡಿನ ಬಲವು
ಆನೆಯನು ಕಂಡಾಡು
ಕರುಬಲೇನಾಯ್ತು ?
ಘೀಳ್ಗಿದಿರೆ ಮೇಕಾರ ?
ಆಡ ಪಿಡಿವನೆ ಕರಿಗ ?
ನವರ ಬಲವವರಿಂಗೆ
ಜಾಣಮೂರ್ಖ //
ಈ ಸೃಷ್ಠಿಯಲ್ಲಿ ಅವರವರ ಶಕ್ತಿ ಸಾಮರ್ಥ್ಯಗಳು ಅವರವರದ್ದು. ಆನೆಯ ಶಕ್ತಿ ಆನೆಯದ್ದಾದರೆ ಆಡಿನ ಶಕ್ತಿ ಆಡಿನದ್ದು. ಆನೆಯನ್ನು ಕಂಡು ಆಡು ಅಸೂಯೆ ಪಟ್ಟರೆ ಏನೂ ಪ್ರಯೋಜನವಿಲ್ಲ. ಆದರೆ ತನ್ನ ಸಾಮರ್ಥ್ಯವನ್ನು ನೆನೆದು ಸಂತೋಷದಿಂದ ಬದುಕಬೇಕು. ಮೇಕೆಯ ಮೇಕಾರವು ಆನೆಯ ಘೀಳಿಡುವಿಕೆಗೆ ಸಾಟಿಯೇ ? ಎಂದಿಗೂ ಇಲ್ಲ. ಅಂತೆಯೇ ಆನೆಯು ಆಡಿನ ಸಮಕ್ಕೆ ಓಡಿ ಅದನ್ನು ಹಿಡಿಯಲು ಸಾಧ್ಯವೇ ? ಅದರ ಸಾಮರ್ಥ್ಯ ಅದರದ್ದು ಇದರ ಸಾಮರ್ಥ್ಯ ಇದರದ್ದು. ಅವರವರ ಶಕ್ತಿ ಸಾಮರ್ಥ್ಯಗಳು , ಕೌಶಲ್ಯಗಳು ಅವರವರದ್ದು. ಇದು ಸೃಷ್ಠಿ ವೈಚಿತ್ರ್ಯ ! ಇಲ್ಲಿ ಕರುಬುವ ಮಾತೇ ಇಲ್ಲ. ಅಲ್ಲವೇ ! ಹಾಗೆ ನೋಡಿದರೆ ಓಟದಲ್ಲಿ ಆಮೆಯು ಮೊಲವನ್ನು ಸೋಲಿಸಿದ ಕಥೆ ಯಾರಿಗೆ ಗೊತ್ತಿಲ್ಲ !? ಇಲ್ಲಿ ಯಾರೂ ಹೆಚ್ಚಲ್ಲ. ಯಾರೂ ಕಡಿಮೆಯೂ ಅಲ್ಲ. ಅಲ್ಲವೇ ಸ್ನೇಹಿತರೇ !?
ಶ್ರೀ ಮುರಳೀಧರ ಹೆಚ್ ಆರ್ ಮೂಲತಃ ಚಿತ್ರದುರ್ಗ ಜಿಲ್ಲೆಯ ಹೊಸದುರ್ಗ ತಾಲ್ಲೂಕಿನ ಹೆಗ್ಗೆರೆ ಗ್ರಾಮದವರು ಪ್ರಸ್ತುತ ತಿಪಟೂರಿನ ಬಾಲಕಿಯರ ಸರ್ಕಾರೀ ಪದವಿ ಪೂರ್ವ ಕಾಲೇಜಿನ ಪ್ರಾಢಶಾಲಾ ವಿಭಾಗದಲ್ಲಿ ಕನ್ನಡ ಭಾಷಾ ಉಪದಾಧ್ಯಾಯರಾಗಿ ಕರ್ತವ್ಯ ನಿರ್ವಹಿಸುತ್ತಿದ್ದಾರೆ. ಸಾಹಿತ್ಯ, ಕಲೆ, ಸಂಗೀತ ಮೊದಲಾದವುಗಳಲ್ಲಿ ಸಕ್ರಿಯವಾಗಿ ತೊಡಗಿಸಿಕೊಂಡಿರುವ ಇವರು ಶಿಕ್ಷಣ ಇಲಾಖೆಯಲ್ಲಿ ರಾಜ್ಯಮಟ್ಟದ ಸಂಪನ್ನೂಲ ವ್ಯಕ್ತಿಯಾಗಿ ತಮ್ಮನ್ನು ತೊಡಗಿಸಿಕೊಂಡವರು. "ಹೊರಬೀಡು" ಇವರ ಕಥಾ ಸಂಕಲನವಾಗಿದೆ. ಇದಾಗಲೇ ಎಂಟುನೂರಕ್ಕೂ ಅಧಿಕ ಮುಕ್ತಕಗಳನ್ನು ಅರ್ಥ ಸಹಿತ ಬರೆದು ಸಾಮಾಜಿಕ ಜಾಲತಾಣಗಳಲ್ಲೂ ಪ್ರಸಿದ್ಧರಾಗಿದ್ದಾರೆ.
Latest posts by ಶ್ರೀ ಮುರಳೀಧರ ಹೆಚ್ ಆರ್ (see all)
- ಭವ ಕಳೆವ ಶಿವ ಸತ್ಯ - September 6, 2021
- ಬಾಳಿನಾಹವ - September 4, 2021
- ಪಿಡಿದರಿವಿನೊಳ್ಮಾಗು - September 3, 2021
