ಇಂತಿಹುದು ಅಂತಿಹುದು
ಎಂತಿಹುದೊ ಭವಿತವ್ಯ
ವೆನುವ ಭಯಬಿಡು ಮನವೆ
ಇರಲಿ ಬಿಡು ಅಂತೆ !
ನಿಯತಿ ನಿಶ್ಚಿತವಿರಲು
ಕಲ್ಪಿತವೆ ಭೀಕರವು
ಒಣತರ್ಕ ಒಗೆ ಮೊದಲು
ಜಾಣಮೂರ್ಖ//
ಭವಿಷ್ಯವು ಹೀಗಿರಬಹುದೇ ? ಹಾಗಿರಬಹುದೇ ? ಹೇಗಿರಬಹುದೆಂಬ ಭಯದ ಕಲ್ಪನೆಯಲ್ಲೇ ನಾವಿಂದು ಬದುಕು ಸಾಗಿಸುತ್ತಿದ್ದೇವೆ. ವಿಧಿಲಿಖಿತದಂತೆ ಏನು ನಡೆಯಬೇಕೋ ಅದು ನಡೆಯುತ್ತದೆ.ಯಾರಿಂದಲೂ ತಪ್ಪಿಸಲಂತೂ ಸಾಧ್ಯವಿಲ್ಲ. ಆದರೆ ಏನು ನಡೆಯಬೇಕೋ ಅದಕ್ಕಿಂತಲೂ ನಮ್ಮ ಕಲ್ಪನೆಯೇ ಹೆಚ್ಚು ಭಯಾನಕವಾಗಿರುತ್ತದೆ. ಅದೇ ಹೆಚ್ಚು ಭಯ, ಉದ್ವೇಗಗಳಿಗೆ ಕಾರಣವಾಗುತ್ತದೆ. ಅಂತಹಾ ಒಣತರ್ಕಗಳನ್ನು ಗಾಳಿಗೆ ತೂರಿಬಿಡಯ್ಯ ಗೆಳೆಯ. ನಿನ್ನ ಕರ್ತವ್ಯವನ್ನು ಪ್ರಾಮಾಣಿಕತೆಯಿಂದ ಮಾಡು. ಅದು ನಿನ್ನ ಅಧಿಕಾರ. ಕರ್ತವ್ಯ ಮಾಡಿ ನಿಶ್ಚಿಂತನಾಗಿರು. ಫಲಾಫಲಗಳ ನಿರ್ಧಾರ ನಿನ್ನದಲ್ಲ. ಅದು ಭಗವಂತನಿಗೆ ಬಿಟ್ಟದ್ದು. ಇದನ್ನೇ ಭಗವಾನ್ ಶ್ರೀಕೃಷ್ಣನು ಗೀತೆಯಲ್ಲಿ ಹೇಳಿರುವುದು. ಇದರಿಂದ ಒಣತರ್ಕ ಬಿಟ್ಟು ಬಂಧನಗಳಿಂದ ಮುಕ್ತರಾಗಿ ಸಂತೋಷದಿಂದ ಬದುಕುವ. ಅಲ್ಲವೇ ಗೆಳೆಯರೇ !?
ಶ್ರೀ ಮುರಳೀಧರ ಹೆಚ್ ಆರ್ ಮೂಲತಃ ಚಿತ್ರದುರ್ಗ ಜಿಲ್ಲೆಯ ಹೊಸದುರ್ಗ ತಾಲ್ಲೂಕಿನ ಹೆಗ್ಗೆರೆ ಗ್ರಾಮದವರು ಪ್ರಸ್ತುತ ತಿಪಟೂರಿನ ಬಾಲಕಿಯರ ಸರ್ಕಾರೀ ಪದವಿ ಪೂರ್ವ ಕಾಲೇಜಿನ ಪ್ರಾಢಶಾಲಾ ವಿಭಾಗದಲ್ಲಿ ಕನ್ನಡ ಭಾಷಾ ಉಪದಾಧ್ಯಾಯರಾಗಿ ಕರ್ತವ್ಯ ನಿರ್ವಹಿಸುತ್ತಿದ್ದಾರೆ. ಸಾಹಿತ್ಯ, ಕಲೆ, ಸಂಗೀತ ಮೊದಲಾದವುಗಳಲ್ಲಿ ಸಕ್ರಿಯವಾಗಿ ತೊಡಗಿಸಿಕೊಂಡಿರುವ ಇವರು ಶಿಕ್ಷಣ ಇಲಾಖೆಯಲ್ಲಿ ರಾಜ್ಯಮಟ್ಟದ ಸಂಪನ್ನೂಲ ವ್ಯಕ್ತಿಯಾಗಿ ತಮ್ಮನ್ನು ತೊಡಗಿಸಿಕೊಂಡವರು. "ಹೊರಬೀಡು" ಇವರ ಕಥಾ ಸಂಕಲನವಾಗಿದೆ. ಇದಾಗಲೇ ಎಂಟುನೂರಕ್ಕೂ ಅಧಿಕ ಮುಕ್ತಕಗಳನ್ನು ಅರ್ಥ ಸಹಿತ ಬರೆದು ಸಾಮಾಜಿಕ ಜಾಲತಾಣಗಳಲ್ಲೂ ಪ್ರಸಿದ್ಧರಾಗಿದ್ದಾರೆ.
Latest posts by ಶ್ರೀ ಮುರಳೀಧರ ಹೆಚ್ ಆರ್ (see all)
- ಭವ ಕಳೆವ ಶಿವ ಸತ್ಯ - September 6, 2021
- ಬಾಳಿನಾಹವ - September 4, 2021
- ಪಿಡಿದರಿವಿನೊಳ್ಮಾಗು - September 3, 2021
