ಕಾರಣವನರಿ ಮೊದಲು

ಹೊರನಗೆಯ ನಕ್ಕೊಡೇಂ
ಒಳನಗೆಯನರಿಯದೊಡೆ ?
ತನುವು ಹಣ್ಣಾದೊಡೇಂ
ಮನವು ಹಣ್ಣಾಗದೊಡೆ ?
ಗುರಿಯನರಿಯದೆ ಬರಿದೆ
ನೋವಿಗೇನ್ ನರಜನ್ಮ !?
ಕಾರಣವನರಿ ಮೊದಲು
ಜಾಣಮೂರ್ಖ //

ಭೌತಿಕವಾದವುಗಳನ್ನು ಕೇವಲ ಚರ್ಮಚಕ್ಷುವಿನಿಂದು ನೋಡಿ ಮೇಲ್ನೋಟಕ್ಕೆ ನಗುವುದರಲ್ಲಿ ನಾವು ನಿಸ್ಸೀಮರು. ಆದರೆ ಇಷ್ಟೇ ಅಲ್ಲ ! ಒಳನಗೆಯೆಂಬುದಿದೆ. ಆದು ಆತ್ಮಚಕ್ಷುವಿನಿಂದ ಜಗತ್ತಿನ ಸೂಕ್ಷ್ಮಗಳನ್ನು ಕಂಡು ಆತ್ಮಪೂರ್ವಕವಾಗಿ ನಗುವ ಒಂದು ಅಪೂರ್ವ ಸ್ಥಿತಿ. ಈ ನಗೆಯನ್ನು ನಗುವುದು ಅಷ್ಟು ಸುಲಭ ಸಾಧ್ಯವಲ್ಲ ! ಬದುಕನ್ನು ಒಳಗಣ್ಣಿನಿಂದ ನೋಡುವ ಕಲೆ ಸಿದ್ಧಿಸಿದವರಿಗೆ ಇದು ಸಾಧ್ಯವೇ ಹೊರತು ಹಾಗೆ ನಟಿಸುವವರಿಗಲ್ಲ ! ಬರೀ ಶರೀರ ಹಣ್ಣಾದರೇನು ? ಮನಸ್ಸು ಹಣ್ಣಾಗಿ ಕಳಿತು ಪಕ್ವವಾಗದಿದ್ದರೆ ಏನು ಪ್ರಯೋಜನ !? ಈ ಸೃಷ್ಟಿಯ ಕಾರಣವನ್ನರಿಯದೆ “ಏನೂ ಇಲ್ಲ ಈ ಜೀವನದಲ್ಲಿ, ಎಲ್ಲ ಖಾಲಿ ಖಾಲಿ ಯಾಕೋ ತುಂಬಾ ಬೇಜಾರು ” ಅಂತ ಗೊಣಗುವವರಿದ್ದಾರೆ. ಸೃಷ್ಟಿಯ ಕಾರಣವನ್ನು, ಗುರಿಯನ್ನು ಅರಿಯದೇ ಅವರಿಗೆ ಬೇಜಾರಾಗುತ್ತಿರುತ್ತದೆ ಅಷ್ಟೆ ಗೆಳೆಯರೆ. ಇಲ್ಲಿ ಎಲ್ಲಕ್ಕೂ ಒಂದು ಕಾರಣವಿದೆ. ಆ ಕಾರಣವನ್ನು ಅರಿಯುವವರು ನಾವಾಗಬೇಕು.ಅಷ್ಟಲ್ಲದೇ ಬರೀ ನೋವು ಪಡುವುದಕ್ಕಾಗಿಯೇನು ಈ ನರಜನ್ಮ !? ಮೊದಲು ಈ ಬದುಕಿನ ಪರಮಗುರಿಯನ್ನು ಅರಿತು ಸಾರ್ಥಕವಾಗಿ ಬದುಕಬೇಕು. ಗಿಡ, ಮರ, ಪ್ರಾಣಿ ಪಕ್ಷಿ ಸಂಕುಲವೇ ಸಾರ್ಥಕ ಬದುಕನ್ನು ಬದುಕುತ್ತಿರುವಾಗ ಬುದ್ಧಿಜೀವಿಯೆಂದು ಸ್ವಯಂಘೋಷಿತರಾದ ನಾವು ಬುದ್ಧಿರಾಹಿತ್ಯರಾಗಿ, ಸ್ವಾರ್ಥಪರರಾಗಿ , ವ್ಯರ್ಥವಾಗಿ ಬದುಕು ಸಾಗಿಸುವುದು ವಿಪರ್ಯಾಸವಲ್ಲವೇ ಗೆಳೆಯರೇ !?

Author
Recent Posts

ಶ್ರೀ ಮುರಳೀಧರ ಹೆಚ್ ಆರ್

ಶ್ರೀ ಮುರಳೀಧರ ಹೆಚ್ ಆರ್ ಮೂಲತಃ ಚಿತ್ರದುರ್ಗ ಜಿಲ್ಲೆಯ ಹೊಸದುರ್ಗ ತಾಲ್ಲೂಕಿನ ಹೆಗ್ಗೆರೆ ಗ್ರಾಮದವರು ಪ್ರಸ್ತುತ ತಿಪಟೂರಿನ ಬಾಲಕಿಯರ ಸರ್ಕಾರೀ ಪದವಿ ಪೂರ್ವ ಕಾಲೇಜಿನ ಪ್ರಾಢಶಾಲಾ ವಿಭಾಗದಲ್ಲಿ ಕನ್ನಡ ಭಾಷಾ ಉಪದಾಧ್ಯಾಯರಾಗಿ ಕರ್ತವ್ಯ ನಿರ್ವಹಿಸುತ್ತಿದ್ದಾರೆ. ಸಾಹಿತ್ಯ, ಕಲೆ, ಸಂಗೀತ ಮೊದಲಾದವುಗಳಲ್ಲಿ ಸಕ್ರಿಯವಾಗಿ ತೊಡಗಿಸಿಕೊಂಡಿರುವ ಇವರು ಶಿಕ್ಷಣ ಇಲಾಖೆಯಲ್ಲಿ ರಾಜ್ಯಮಟ್ಟದ ಸಂಪನ್ನೂಲ ವ್ಯಕ್ತಿಯಾಗಿ ತಮ್ಮನ್ನು ತೊಡಗಿಸಿಕೊಂಡವರು. "ಹೊರಬೀಡು" ಇವರ ಕಥಾ ಸಂಕಲನವಾಗಿದೆ. ಇದಾಗಲೇ ಎಂಟುನೂರಕ್ಕೂ ಅಧಿಕ ಮುಕ್ತಕಗಳನ್ನು ಅರ್ಥ ಸಹಿತ ಬರೆದು ಸಾಮಾಜಿಕ ಜಾಲತಾಣಗಳಲ್ಲೂ ಪ್ರಸಿದ್ಧರಾಗಿದ್ದಾರೆ.

Latest posts by ಶ್ರೀ ಮುರಳೀಧರ ಹೆಚ್ ಆರ್ (see all)