ಬಾಳಬಂಡಿಗೆ ನೀನೆ
ಬಲ್ಮೆಯಾ ಚಾಲಕನು
ಅರಿವೆ ಕಡಿವಾಣವರಿ
ತಿಳುವಿನೊಳು ನಡೆಸು
ಚಣದೊಳೆಚ್ಚರ ತಪ್ಪ
ಲಲ್ಲೋಲ ಕಲ್ಲೋಲ
ವಿದುವೆ ಜಾಗೃತ ಮಂತ್ರ
ಜಾಣಮೂರ್ಖ //
ಬಾಳೊಂದು ಪಯಣ ! ಈ ಬಾಳ ಬಂಡಿಗೆ ನಾವೇ ಬಲ್ಮೆಯ ಚಾಲಕರು ! ಭಗವಂತನು ಕೊಟ್ಟ ಶ್ರೇಷ್ಠ ಜ್ಞಾನವೆಂಬುದೇ ಕಡಿವಾಣ! ಆ ಅರಿವಿನ ಬೆಳಕಿನಿಂದ ನಡೆಯಬೇಕು. ಕ್ಷಣಮಾತ್ರದ ಅಜಾಗರೂಕತೆಯು ಅಲ್ಲೋಲ ಕಲ್ಲೋಲವನ್ನೇ ಮಾಡಿಬಿಡಬಹುದು. ಎಚ್ಚರಿಕೆಯಿಂದ ಮುನ್ನಡೆಯಬೇಕು. ಯಾವುದೇ ಕಾರ್ಯದಲ್ಲಾಗಲಿ, ಯಾವುದೇ ಕ್ಷಣದಲ್ಲಾಗಲಿ ಎಚ್ಚರ ತಪ್ಪಬಾರದು. ನಮ್ಮನ್ನು ಎಚ್ಚರ ತಪ್ಪಿಸಲು ಈ ಮಾಯಾ ಪ್ರಪಂಚವು ಕಾಯುತ್ತಿರುತ್ತದೆ. ಕ್ಷಣಮಾತ್ರದ ಅಜಾಗರೂಕತೆ ಭಯಾನಕ ಅಗ್ನಿದಿವ್ಯಗಳನ್ನೇ ತಂದೊಡ್ಡಬಹುದು ! ಸ್ವಲ್ಪ ಸೂಕ್ಷ್ಮವಾಗಿ ಇಂದಿನ ಸ್ಥಿತಿಯನ್ನು ಅವಲೋಕಿಸಿ ವಿಚಾರ ಮಾಡಿದರೆ ಇದು ನಮ್ಮರಿವಿಗೆ ಬರುತ್ತದೆ. ನಮ್ಮ ಎಚ್ಚರಿಕೆಯಲ್ಲಿ ನಾವಿರಬೇಕಷ್ಟೆ. ಇದೇ ಜಾಗೃತ ಮಂತ್ರ ! ಏನಂತೀರಿ ?
ಶ್ರೀ ಮುರಳೀಧರ ಹೆಚ್ ಆರ್ ಮೂಲತಃ ಚಿತ್ರದುರ್ಗ ಜಿಲ್ಲೆಯ ಹೊಸದುರ್ಗ ತಾಲ್ಲೂಕಿನ ಹೆಗ್ಗೆರೆ ಗ್ರಾಮದವರು ಪ್ರಸ್ತುತ ತಿಪಟೂರಿನ ಬಾಲಕಿಯರ ಸರ್ಕಾರೀ ಪದವಿ ಪೂರ್ವ ಕಾಲೇಜಿನ ಪ್ರಾಢಶಾಲಾ ವಿಭಾಗದಲ್ಲಿ ಕನ್ನಡ ಭಾಷಾ ಉಪದಾಧ್ಯಾಯರಾಗಿ ಕರ್ತವ್ಯ ನಿರ್ವಹಿಸುತ್ತಿದ್ದಾರೆ. ಸಾಹಿತ್ಯ, ಕಲೆ, ಸಂಗೀತ ಮೊದಲಾದವುಗಳಲ್ಲಿ ಸಕ್ರಿಯವಾಗಿ ತೊಡಗಿಸಿಕೊಂಡಿರುವ ಇವರು ಶಿಕ್ಷಣ ಇಲಾಖೆಯಲ್ಲಿ ರಾಜ್ಯಮಟ್ಟದ ಸಂಪನ್ನೂಲ ವ್ಯಕ್ತಿಯಾಗಿ ತಮ್ಮನ್ನು ತೊಡಗಿಸಿಕೊಂಡವರು. "ಹೊರಬೀಡು" ಇವರ ಕಥಾ ಸಂಕಲನವಾಗಿದೆ. ಇದಾಗಲೇ ಎಂಟುನೂರಕ್ಕೂ ಅಧಿಕ ಮುಕ್ತಕಗಳನ್ನು ಅರ್ಥ ಸಹಿತ ಬರೆದು ಸಾಮಾಜಿಕ ಜಾಲತಾಣಗಳಲ್ಲೂ ಪ್ರಸಿದ್ಧರಾಗಿದ್ದಾರೆ.
Latest posts by ಶ್ರೀ ಮುರಳೀಧರ ಹೆಚ್ ಆರ್ (see all)
- ಭವ ಕಳೆವ ಶಿವ ಸತ್ಯ - September 6, 2021
- ಬಾಳಿನಾಹವ - September 4, 2021
- ಪಿಡಿದರಿವಿನೊಳ್ಮಾಗು - September 3, 2021
