ವಿಧಿವಿಲಾಸ

ಜಗದೊಡೆಯ ರಾಮ ತಾ
ನಿರ್ದೊಡೇನಾಯ್ತು ಪೇಳ್
ಲಕ್ಷ್ಮಣನು ರೇಖೆಯನು
ಎಳೆದೊಡೇನಾಯ್ತು ?
ಜಗದಂಬೆಯಾದೊಡೇನ್ ?
ಜಗದೊಡೆಯನಾದೊಡೇನ್ ?
ತಡೆಯಲಳವೇ ವಿಧಿಯ
ಜಾಣಮೂರ್ಖ //

ವಿಧಿಯನ್ನು ಬದಲಾಯಿಸಲು ವಿಧಾತನಿಂದಲೂ ಸಾಧ್ಯವಿಲ್ಲ. ಅಮಿತ ಪರಾಕ್ರಮಶಾಲಿಯಾದ ಶ್ರೀರಾಮನೇ ಸೀತಾಮಾತೆಯ ಜೊತೆಯಲ್ಲಿದ್ದರೂ ಸಹ , ಮಹಾ ಪರಾಕ್ರಮಿಯೂ ಆದಿಶೇಷನ ಅವತಾರವೂ ಆದ ಲಕ್ಷ್ಮಣನೇ ಲಕ್ಷ್ಮಣ ರೇಖೆಯನ್ನು ಎಳೆದರೂ ಸಹ ಸೀತಾಪಹರಣವನ್ನು ತಪ್ಪಿಸಲಾಯಿತೇನು ? ಇನ್ನು ಸೀತಾಮಾತೆ ! ಮಹಾ ಪತಿವ್ರತೆ , ಮಹಾ ಸಾಧ್ವಿ ! ಸಾಕ್ಷಾತ್ ಲಕ್ಷ್ಮೀದೇವಿಯ ಅವತಾರವೇ ಆದರೂ ಸಹ ವಿಧಿಗೆ ಮಣಿಯಲೇ ಬೇಕಾಯ್ತು . ಹೀಗೆ ಪುರಾಣದ ಯಾವುದೇ ಸಂದರ್ಭವನ್ನು ಅವಲೋಕಿಸಿದರೂ ವಿಧಿಯನ್ನು ಬದಲಿಸಿದವರು, ತಡೆದವರೂ ಯಾರೂ ಇಲ್ಲ. ವಿಧಿ ವಿಲಾಸವನ್ನು ಬಲ್ಲವರಾರು ?! ಆದರೆ ನಮ್ಮ ಬದುಕಿನ ರೀತಿ ನೀತಿಗಳಿಂದ , ನ್ಯಾಯಪರತೆಯಿಂದ , ಸತ್ಯಸಂಧತೆಯಿಂದ ಸದ್ಗತಿಯನ್ನು ಹೊಂದಬಹುದೆಂಬ ಖಚಿತಾಂಶವನ್ನು ಮಾತ್ರ ಅಲ್ಲಗೆಳೆಯಲಾಗದು. ನಮ್ಮ ಬದುಕು ವಿಧಿಯ ಮನಸ್ಸನ್ನೂ ಗೆಲ್ಲುವಷ್ಟು ಆದರ್ಶಪ್ರಾಯವೂ, ಸತ್ಯ- ಧರ್ಮಪರವೂ ಆಗಿರಬೇಕು. ಅಲ್ಲವೇ ಗೆಳೆಯರೇ ?

Author
Recent Posts

ಶ್ರೀ ಮುರಳೀಧರ ಹೆಚ್ ಆರ್

ಶ್ರೀ ಮುರಳೀಧರ ಹೆಚ್ ಆರ್ ಮೂಲತಃ ಚಿತ್ರದುರ್ಗ ಜಿಲ್ಲೆಯ ಹೊಸದುರ್ಗ ತಾಲ್ಲೂಕಿನ ಹೆಗ್ಗೆರೆ ಗ್ರಾಮದವರು ಪ್ರಸ್ತುತ ತಿಪಟೂರಿನ ಬಾಲಕಿಯರ ಸರ್ಕಾರೀ ಪದವಿ ಪೂರ್ವ ಕಾಲೇಜಿನ ಪ್ರಾಢಶಾಲಾ ವಿಭಾಗದಲ್ಲಿ ಕನ್ನಡ ಭಾಷಾ ಉಪದಾಧ್ಯಾಯರಾಗಿ ಕರ್ತವ್ಯ ನಿರ್ವಹಿಸುತ್ತಿದ್ದಾರೆ. ಸಾಹಿತ್ಯ, ಕಲೆ, ಸಂಗೀತ ಮೊದಲಾದವುಗಳಲ್ಲಿ ಸಕ್ರಿಯವಾಗಿ ತೊಡಗಿಸಿಕೊಂಡಿರುವ ಇವರು ಶಿಕ್ಷಣ ಇಲಾಖೆಯಲ್ಲಿ ರಾಜ್ಯಮಟ್ಟದ ಸಂಪನ್ನೂಲ ವ್ಯಕ್ತಿಯಾಗಿ ತಮ್ಮನ್ನು ತೊಡಗಿಸಿಕೊಂಡವರು. "ಹೊರಬೀಡು" ಇವರ ಕಥಾ ಸಂಕಲನವಾಗಿದೆ. ಇದಾಗಲೇ ಎಂಟುನೂರಕ್ಕೂ ಅಧಿಕ ಮುಕ್ತಕಗಳನ್ನು ಅರ್ಥ ಸಹಿತ ಬರೆದು ಸಾಮಾಜಿಕ ಜಾಲತಾಣಗಳಲ್ಲೂ ಪ್ರಸಿದ್ಧರಾಗಿದ್ದಾರೆ.

Latest posts by ಶ್ರೀ ಮುರಳೀಧರ ಹೆಚ್ ಆರ್ (see all)