ಸೂಕ್ತ ಸೂಳ್ನುಡಿ ಕಾಣೊ

ಮುಕ್ತಕವನೋದಲೇ
ನ್ಮುಕ್ತನಾದೆಯ ನೀನು ?
ಭಕ್ತಿಯಿಂ ಬದುಕಿನೊಡೆ
ನಾದು ನೋಡಯ್ಯ !
ಶಕ್ತನಾದೊಡೆ ನಿನ್ನ
ತಿದ್ದಿ ನಡೆ ಬಾಳಿಗಿದು
ಸೂಕ್ತ ಸೂಳ್ನುಡಿ ಕಾಣೊ
ಜಾಣಮೂರ್ಖ //

ಕೇವಲ ಮುಕ್ತಕಗಳನ್ನು ಓದಿ, ಒರೆದರೆ ಸಾಲದು. ಅದರಿಂದ ಬದುಕಿನ ಬಂಧನಗಳಿಂದ ನಾವೆಷ್ಟು ಮುಕ್ತರಾಗಿದ್ದೇವೆ ! ಮುಕ್ತರಾಗುತ್ತಿದ್ದೇವೆ ಎಂಬುದೇ ಮುಖ್ಯ. ಭಕ್ತಿಯಿಂದ ಇಲ್ಲಿ ಅಡಕವಾಗಿರುವ ಮೌಲ್ಯಗಳನ್ನು ನಮ್ಮ ಬದುಕಿನೊಂದಿಗೆ ಹೋಲಿಕೆ ಮಾಡಿಕೊಂಡು , ನಾದು ನೋಡಬೇಕು. ಮುಕ್ತಕವನ್ನೋದಿ , ಅಳವಡಿಸಿಕೊಂಡು, ಅದರಂತೆ ಮೌಲ್ಯಗಳ ಕಣಜವಾಗಿ ನಡೆದೆವಾದರೆ, ಅಲ್ಲಿಗೆ ಗುರುವಿತ್ತ ಅರಿವಿನ ಬೆಳಕಿನಿಂದ ಮೂಡಿದ ಈ ಮುಕ್ತಕಗಳ ರಚನಾ ಕಾರ್ಯ ಸಾರ್ಥಕ. ಈ ಮಾಯಾ ಪ್ರಪಂಚದಲ್ಲಿ ಇವುಗಳನ್ನು ಅಳವಡಿಸಿಕೊಂಡು ಏಗುವುದು ಒಂದು ಸವಾಲೇ ಸರಿ. ಏಗಲೇಬೇಕಲ್ಲ ! ಈ ನಿಟ್ಟಿನಲ್ಲಿ ಒಂದೊಂದು ಮುಕ್ತಕವೂ ಬದುಕಿನ ಒಂದೊಂದು ಸಂದರ್ಭಕ್ಕೆ ಸೂಕ್ತವಾದ ಸೂಳ್ನುಡಿ. ಸಹೃದಯತೆಯಿಂದ ಅರಿತು ಅಳವಡಿಸಿಕೊಂಡು ನಡೆದಾಗ ಬಾಳೇ ಬಂಗಾರವಾಗುತ್ತದೆ. ನಾನು ಬರೆದ ಮುಕ್ತಕವಿದು ಎಂಬ ಅಹಂಕಾರದ ಬಾವ ಇಲ್ಲಿಲ್ಲ ಗೆಳೆಯರೇ ! ಗುರುವಿತ್ತ ಅರಿವನ್ನು ಹಂಚಿ ಬಾಳುವ ಭಾವವಿದೆ, ತುಡಿತವಿದೆ. ಗುರುವಿತ್ತ ಅರಿವನ್ನು ಸಹೃದಯರ ಮಡಿಲಿಗೆ ನೀಡುತ್ತಿರುವ ತೃಪ್ತಿಯಿದೆ. ಸ್ವೀಕರಿಸಿ ಓದುತ್ತಿರುವ ತಮ್ಮ ಬಗ್ಗೆ ಕೃತಜ್ಞತೆಯಿದೆ.

Author
Recent Posts

ಶ್ರೀ ಮುರಳೀಧರ ಹೆಚ್ ಆರ್

ಶ್ರೀ ಮುರಳೀಧರ ಹೆಚ್ ಆರ್ ಮೂಲತಃ ಚಿತ್ರದುರ್ಗ ಜಿಲ್ಲೆಯ ಹೊಸದುರ್ಗ ತಾಲ್ಲೂಕಿನ ಹೆಗ್ಗೆರೆ ಗ್ರಾಮದವರು ಪ್ರಸ್ತುತ ತಿಪಟೂರಿನ ಬಾಲಕಿಯರ ಸರ್ಕಾರೀ ಪದವಿ ಪೂರ್ವ ಕಾಲೇಜಿನ ಪ್ರಾಢಶಾಲಾ ವಿಭಾಗದಲ್ಲಿ ಕನ್ನಡ ಭಾಷಾ ಉಪದಾಧ್ಯಾಯರಾಗಿ ಕರ್ತವ್ಯ ನಿರ್ವಹಿಸುತ್ತಿದ್ದಾರೆ. ಸಾಹಿತ್ಯ, ಕಲೆ, ಸಂಗೀತ ಮೊದಲಾದವುಗಳಲ್ಲಿ ಸಕ್ರಿಯವಾಗಿ ತೊಡಗಿಸಿಕೊಂಡಿರುವ ಇವರು ಶಿಕ್ಷಣ ಇಲಾಖೆಯಲ್ಲಿ ರಾಜ್ಯಮಟ್ಟದ ಸಂಪನ್ನೂಲ ವ್ಯಕ್ತಿಯಾಗಿ ತಮ್ಮನ್ನು ತೊಡಗಿಸಿಕೊಂಡವರು. "ಹೊರಬೀಡು" ಇವರ ಕಥಾ ಸಂಕಲನವಾಗಿದೆ. ಇದಾಗಲೇ ಎಂಟುನೂರಕ್ಕೂ ಅಧಿಕ ಮುಕ್ತಕಗಳನ್ನು ಅರ್ಥ ಸಹಿತ ಬರೆದು ಸಾಮಾಜಿಕ ಜಾಲತಾಣಗಳಲ್ಲೂ ಪ್ರಸಿದ್ಧರಾಗಿದ್ದಾರೆ.

Latest posts by ಶ್ರೀ ಮುರಳೀಧರ ಹೆಚ್ ಆರ್ (see all)