ಒಮ್ಮನ ವ್ರತಿ

ಋಜುಮಾರ್ಗದಲಿ ಹರಿ
ಶ್ಚಂದ್ರ ಮುಕುತಿಯ ಪಡೆದ
ಪರಿಕಿಸಿದ ಕೌಶಿಕನು
ಚರಿತಾರ್ಥನಾದ !
ಗೈವುದೇನಿರಲಿ ಬಿಡು
ಒಮ್ಮನ ವ್ರತಿಯಾಗು
ಬಿಡುಗೊಂದಲವ ಮರುಳೆ
ಜಾಣಮೂರ್ಖ //

ಹರಿಶ್ಚಂದ್ರ ಮತ್ತು ವಿಶ್ವಾಮಿತ್ರರು ಯಾರಿಗೆ ಗೊತ್ತಿಲ್ಲ ! ಒಬ್ಬ ಪರೀಕ್ಷೆಗೆ ಒಳಗಾದವನು , ಮತ್ತೊಬ್ಬ ಪರೀಕ್ಷಿಸಿದವನು. ಇಬ್ಬರೂ ಚರಿತಾರ್ಥರಾದರು. ಹರಿಶ್ಚಂದ್ರನಂತಹಾ ಸತ್ಯವ್ರತಿಯನ್ನು ಅಷ್ಟಕಷ್ಟಗಳಿಗೆ ಈಡು ಮಾಡಿ, ಸಾಣೆ ಹಿಡಿದು , ಉಜ್ಜಿ ಹರಿಶ್ಚಂದ್ರನ ಸತ್ಯವನ್ನು ಜಗತ್ತಿಗೆ ತಿಳಿಯುವಂತೆ ಮಾಡಿದವನು ಕೌಶಿಕನು ತಾನೆ ?! ಗಮನಿಸಿ ಗೆಳೆಯರೇ ಸತ್ಯ ಬಿಡೆನೆಂಬ ಉದ್ದೇಶ ಹರಿಶ್ಚಂದ್ರ ರಾಯನದಾದರೆ , ಕೊನೆಯವರೆಗೂ ಕಟ್ಟುನಿಟ್ಟಾಗಿ ಪರೀಕ್ಷಿಸಿ ನೋಡಬೇಕೆಂಬುದು ಕೌಶಕರ ಗುರಿ. ಸತ್ಯಕ್ಕೇ ಜಯ ಸಿಕ್ಕಿತು. ಪರೀಕ್ಷಿಸಿದ ವಿಶ್ವಾಮಿತ್ರರೂ ಚರಿತಾರ್ಥರಾದರು. ಗೆಳೆಯರೇ, ನಾವೂ ಸಹ ಹಾಗೆಯೇ ಇರಬಹುದು. ಒಂದೇ ಮನಸ್ಸಿನ ವ್ರತಿಯಾಗಬೇಕಷ್ಟೆ. ಹಿಡಿದ ಕಾರ್ಯವನ್ನು ವ್ರತದಂತೆಮಾಡು ಸಾಕು. ಉದ್ದೇಶ ಒಳ್ಳೆಯದಿರಲಿ. ಆಗುವುದೂ ಸಹ ಒಳ್ಳೆಯದೇ ಆಗುತ್ತದೆ. ಜಗತ್ತಿನ ಜನರ ಸ್ತುತಿ ನಿಂದೆಗಳಿಗೆ ಕಿವಿಗೊಡದೇ ಸಾಗಯ್ಯ. ಬದುಕು ಎರಡು ದೋಣಿಯ ಮೇಲಿನ ಪಯಣವಾಗುವುದು ಬೇಡ. ಮನದ ಗೊಂದಲವನ್ನು ಬಿಟ್ಟು , ಒಮ್ಮನದ ವ್ರತಿಯಂತೆ ಕಾರ್ಯವೆಸಗು. ಯಶಸ್ಸು ನಿನಗೂ ಲಭಿಸುತ್ತದೆ. ಹೌದಲ್ಲವೇ ?

Author
Recent Posts

ಶ್ರೀ ಮುರಳೀಧರ ಹೆಚ್ ಆರ್

ಶ್ರೀ ಮುರಳೀಧರ ಹೆಚ್ ಆರ್ ಮೂಲತಃ ಚಿತ್ರದುರ್ಗ ಜಿಲ್ಲೆಯ ಹೊಸದುರ್ಗ ತಾಲ್ಲೂಕಿನ ಹೆಗ್ಗೆರೆ ಗ್ರಾಮದವರು ಪ್ರಸ್ತುತ ತಿಪಟೂರಿನ ಬಾಲಕಿಯರ ಸರ್ಕಾರೀ ಪದವಿ ಪೂರ್ವ ಕಾಲೇಜಿನ ಪ್ರಾಢಶಾಲಾ ವಿಭಾಗದಲ್ಲಿ ಕನ್ನಡ ಭಾಷಾ ಉಪದಾಧ್ಯಾಯರಾಗಿ ಕರ್ತವ್ಯ ನಿರ್ವಹಿಸುತ್ತಿದ್ದಾರೆ. ಸಾಹಿತ್ಯ, ಕಲೆ, ಸಂಗೀತ ಮೊದಲಾದವುಗಳಲ್ಲಿ ಸಕ್ರಿಯವಾಗಿ ತೊಡಗಿಸಿಕೊಂಡಿರುವ ಇವರು ಶಿಕ್ಷಣ ಇಲಾಖೆಯಲ್ಲಿ ರಾಜ್ಯಮಟ್ಟದ ಸಂಪನ್ನೂಲ ವ್ಯಕ್ತಿಯಾಗಿ ತಮ್ಮನ್ನು ತೊಡಗಿಸಿಕೊಂಡವರು. "ಹೊರಬೀಡು" ಇವರ ಕಥಾ ಸಂಕಲನವಾಗಿದೆ. ಇದಾಗಲೇ ಎಂಟುನೂರಕ್ಕೂ ಅಧಿಕ ಮುಕ್ತಕಗಳನ್ನು ಅರ್ಥ ಸಹಿತ ಬರೆದು ಸಾಮಾಜಿಕ ಜಾಲತಾಣಗಳಲ್ಲೂ ಪ್ರಸಿದ್ಧರಾಗಿದ್ದಾರೆ.

Latest posts by ಶ್ರೀ ಮುರಳೀಧರ ಹೆಚ್ ಆರ್ (see all)