ವರ್ಜ್ಯಮೆಂದಿಗು ವರ್ಜ್ಯ

ನಾನೆನುವ ಭಾವದೊಳ
ಗಂಧನಾಗೇಕಳುವೆ !?
ನಿನ್ನದೇನಿಹುದಿಲ್ಲಿ
ಮನದಹಮ ಕಳೆಯೊ !
ವರ್ಜ್ಯಮೇನಾದೊಡಂ
ದುಃಖಮೀವುದುಮಲ್ತೆ !
ವರ್ಜ್ಯಮೆಂದಿಗು ವರ್ಜ್ಯ
ಜಾಣಮೂರ್ಖ //

ನಾವು ಏನೇ ಮಾಡಿದರೂ ನಮ್ಮ ಅಹಂಕಾರವನ್ನು ಮಾತ್ರ ಬಿಡಲಾಗುವುದಿಲ್ಲ. ಮನದ ಮೂಲೆಯೊಂದರಲ್ಲಿ ಅದು ಪ್ರತಿಷ್ಠಾಪಿತವಾಗಿಬಿಟ್ಟಿರುತ್ತದೆ. ಅದು ನಮ್ಮನ್ನು ಕುರುಡರನ್ನಾಗಿಸಿಬಿಡುತ್ತದೆ. ಇಂತಹಾ ಅಹಂಕಾರವನ್ನು ಕಿತ್ತೆಸೆಯಬೇಕಲ್ಲದೇ ಆಶ್ರಯ ನೀಡಬಾರದು. ಬದುಕಿನಲ್ಲಿ ವರ್ಜ್ಯವಾದುದು ಎಂದಿದ್ದರೂ ವರ್ಜ್ಯವೇ. ಬೆಂಕಿ ಬೆಂಕಿಯೇ ! ಎಂದಾದರೊಮ್ಮೆ ಸುಡದೇ ಬಿಡದು. ಮುಳ್ಳು ಮುಳ್ಳೆ ! ವಿಷವೆಂದಿಗೂ ವಿಷವೇ ! ಇವು ಎಂದಿಗೂ ಸಂತಸವನ್ನು ಕೊಡಲಾರವು. ಬದುಕಿನ ನಾನಾ ತೊಡಕುಗಳಿಗೆ ಕಾರಣವಾಗುತ್ತವೆ. ಆದ್ದರಿಂದ ಈ ಅಹಂಕಾರವನ್ನು ವರ್ಜಿಸಿದರೆ ಒಳ್ಳೆಯದು. ನಿರಹಂಕಾರಿಯಾದವರನ್ನು ಕಂಡು ಜಗತ್ತು ತಡೆಯಲಾರದೇ ಕೆಣಕುವುದುಂಟು. ಸುಮ್ಮನಿದ್ದು ಬಿಡಿ ಗೆಳೆಯರೇ ! ನಿರ್ಲಕ್ಷಿಸಿ ಬಿಡಿ. ಎಷ್ಟೆಂದು ಕೆಣಕಿಯಾರು. ಅವರೂ ಸುಮ್ಮನಾಗುತ್ತಾರಷ್ಟೆ. ಮನದ ಹೂದೋಟವನ್ನು ನಮ್ಮ ಕಯ್ಯಾರೆ ನಾವೇ ಏಕೆ ಹಾಳ್ಗಯ್ಯಬೇಕು ? ಅಲ್ಲವೇ ಗೆಳೆಯರೇ ?

Author
Recent Posts

ಶ್ರೀ ಮುರಳೀಧರ ಹೆಚ್ ಆರ್

ಶ್ರೀ ಮುರಳೀಧರ ಹೆಚ್ ಆರ್ ಮೂಲತಃ ಚಿತ್ರದುರ್ಗ ಜಿಲ್ಲೆಯ ಹೊಸದುರ್ಗ ತಾಲ್ಲೂಕಿನ ಹೆಗ್ಗೆರೆ ಗ್ರಾಮದವರು ಪ್ರಸ್ತುತ ತಿಪಟೂರಿನ ಬಾಲಕಿಯರ ಸರ್ಕಾರೀ ಪದವಿ ಪೂರ್ವ ಕಾಲೇಜಿನ ಪ್ರಾಢಶಾಲಾ ವಿಭಾಗದಲ್ಲಿ ಕನ್ನಡ ಭಾಷಾ ಉಪದಾಧ್ಯಾಯರಾಗಿ ಕರ್ತವ್ಯ ನಿರ್ವಹಿಸುತ್ತಿದ್ದಾರೆ. ಸಾಹಿತ್ಯ, ಕಲೆ, ಸಂಗೀತ ಮೊದಲಾದವುಗಳಲ್ಲಿ ಸಕ್ರಿಯವಾಗಿ ತೊಡಗಿಸಿಕೊಂಡಿರುವ ಇವರು ಶಿಕ್ಷಣ ಇಲಾಖೆಯಲ್ಲಿ ರಾಜ್ಯಮಟ್ಟದ ಸಂಪನ್ನೂಲ ವ್ಯಕ್ತಿಯಾಗಿ ತಮ್ಮನ್ನು ತೊಡಗಿಸಿಕೊಂಡವರು. "ಹೊರಬೀಡು" ಇವರ ಕಥಾ ಸಂಕಲನವಾಗಿದೆ. ಇದಾಗಲೇ ಎಂಟುನೂರಕ್ಕೂ ಅಧಿಕ ಮುಕ್ತಕಗಳನ್ನು ಅರ್ಥ ಸಹಿತ ಬರೆದು ಸಾಮಾಜಿಕ ಜಾಲತಾಣಗಳಲ್ಲೂ ಪ್ರಸಿದ್ಧರಾಗಿದ್ದಾರೆ.

Latest posts by ಶ್ರೀ ಮುರಳೀಧರ ಹೆಚ್ ಆರ್ (see all)