ಹಾವು ಏಣಿಯ ಆಟ

ಏರಿದವನಿಳಿಯುವನು
ಇಳಿದವನು ಏರುವನು
ಹಾವು ಏಣಿಯ ಆಟ
ವೀ ಬಾಳ ತಿರುಳು !
ದಾಳ ವಿಧಿಯಾಗಿರಲು
ಬೀಳ್ವ ಗರ ಕರ್ಮವೈ
ಇದನರಿತು ಬಾಳ್ ತೆರಳು
ಜಾಣಮೂರ್ಖ//

ಮೇಲೇರಿದವನು ಕೆಳಗಿಳಿಯಲೇಬೇಕು. ಕೆಳಗಿಳಿದವನು ಮೇಲೇರಲೇಬೇಕು. ಇದು ವಿಧಿ ನಿಯಮ. ಈ ಬದುಕು ಒಂದು ಹಾವು ಏಣಿಯ ಆಟವಿದ್ದಂತೆ. ಇದರ ತಿರುಳಿಷ್ಟೆ. ವಿಧಿಯೇ ದಾಳ. ಬೀಳ್ವಂತಹ ಗರ ನಮ್ಮ ಪೂರ್ವಾರ್ಜಿತ ಕರ್ಮಗಳು. ಸಂಚಿತ ಕರ್ಮಕ್ಕನುಸಾರವಾಗಿ ಮೇಲೇರುವುದೋ ಅಥವಾ ಕೆಳಗಿಳಿಯುವುದೋ ನಡೆಯುತ್ತಿರುತ್ತದೆ . ಇದರ ಒಳಮರ್ಮವನ್ನರಿತು ನಡೆಯುತ್ತಿರಬೇಕಷ್ಟೆ. ಬದುಕಿನ ಜೊತೆಗೆ ಸಾಗುತ್ತಿರಬೇಕು. ಉಬ್ಬರವಿಳಿತಗಳು , ಏಳು ಬೀಳುಗಳು ಇದ್ದವುಗಳೇ. ದುಷ್ಕೃತಗಳನ್ನಾಚರಿಸದೆ ಸುಕೃತಿಗಳನ್ನೆಸಗುತ್ತಾ ಸಾಗಿದವರು ಈ ಹಾವು ಏಣಿ ಆಟದಲ್ಲಿ ಯಶಸ್ಸನ್ನು ಗಳಿಸುತ್ತಾರೆ. ಈ ಯಶಸ್ಸೇ ಮುಕ್ತಿ ! ಮೋಕ್ಷ ! ಈ ಸತ್ಯವನ್ನು ಅರಿಯದ ಇಂದಿನ ಪೀಳಿಗೆಯ ಕೆಲವರು ಮೌಲ್ಯಾದರ್ಶಗಳ ಬಗ್ಗೆ ಲಘುವಾಗಿ ಮಾತನಾಡುವುದನ್ನು ನೋಡುತ್ತಿದ್ದೇವೆ. ಇದು ಸರ್ವಥಾ ಒಳ್ಳೆಯದಲ್ಲ. ” ಮನುಷ್ಯರ ಸುಕೃತ ದುಷ್ಕೃತಂಗಳಂ ದೈವಗಳರಿಗುಂ ಎಂಬ ಮಾತಿದೆ ಪಂಚತಂತ್ರದಲ್ಲಿ . ಯಾವುದನ್ನೂ ಲಘುವಾಗಿ ಪರಿಗಣಿಸದೇ ಬದುಕಿನಲ್ಲಿ ಎಚ್ಚರಿಕೆಯಿಂದ ಹೆಜ್ಜೆಯಿಡಬೇಕು. ಏನಂತೀರಿ ?

Author
Recent Posts

ಶ್ರೀ ಮುರಳೀಧರ ಹೆಚ್ ಆರ್

ಶ್ರೀ ಮುರಳೀಧರ ಹೆಚ್ ಆರ್ ಮೂಲತಃ ಚಿತ್ರದುರ್ಗ ಜಿಲ್ಲೆಯ ಹೊಸದುರ್ಗ ತಾಲ್ಲೂಕಿನ ಹೆಗ್ಗೆರೆ ಗ್ರಾಮದವರು ಪ್ರಸ್ತುತ ತಿಪಟೂರಿನ ಬಾಲಕಿಯರ ಸರ್ಕಾರೀ ಪದವಿ ಪೂರ್ವ ಕಾಲೇಜಿನ ಪ್ರಾಢಶಾಲಾ ವಿಭಾಗದಲ್ಲಿ ಕನ್ನಡ ಭಾಷಾ ಉಪದಾಧ್ಯಾಯರಾಗಿ ಕರ್ತವ್ಯ ನಿರ್ವಹಿಸುತ್ತಿದ್ದಾರೆ. ಸಾಹಿತ್ಯ, ಕಲೆ, ಸಂಗೀತ ಮೊದಲಾದವುಗಳಲ್ಲಿ ಸಕ್ರಿಯವಾಗಿ ತೊಡಗಿಸಿಕೊಂಡಿರುವ ಇವರು ಶಿಕ್ಷಣ ಇಲಾಖೆಯಲ್ಲಿ ರಾಜ್ಯಮಟ್ಟದ ಸಂಪನ್ನೂಲ ವ್ಯಕ್ತಿಯಾಗಿ ತಮ್ಮನ್ನು ತೊಡಗಿಸಿಕೊಂಡವರು. "ಹೊರಬೀಡು" ಇವರ ಕಥಾ ಸಂಕಲನವಾಗಿದೆ. ಇದಾಗಲೇ ಎಂಟುನೂರಕ್ಕೂ ಅಧಿಕ ಮುಕ್ತಕಗಳನ್ನು ಅರ್ಥ ಸಹಿತ ಬರೆದು ಸಾಮಾಜಿಕ ಜಾಲತಾಣಗಳಲ್ಲೂ ಪ್ರಸಿದ್ಧರಾಗಿದ್ದಾರೆ.

Latest posts by ಶ್ರೀ ಮುರಳೀಧರ ಹೆಚ್ ಆರ್ (see all)