ಜೋಗುಳ

ಅಮ್ಮನೊಲವಿನ ಹಾಡಿ
ಗೆಲ್ಲಿಹುದು ಛಂದಗತಿ
ಸುಮ್ಮಗೊರಗುವ ಕಂದ
ನಾನಂದದಿಂದ !
ಬಣ್ಣಬೆಡಗಿರದ ನುಡಿ
ಗುರುವಿನೊಳ್ನುಡಿ ಕಾಣೊ
ನೊಂದಮನಕಾನಂದ
ಜಾಣಮೂರ್ಖ//

ಅಮ್ಮ ತನ್ನ ಪ್ರೀತಿಯ ಕಂದನಿಗಾಗಿ ಹಾಡುವ ಜೋಗುಳದ ಹಾಡಿಗೆ ಛಂದ , ಲಯ , ಪ್ರಾಸಗಳ ಲೆಕ್ಕಾಚಾರ ಹಾಕಿ ಹಾಡುವಳೇನು ? ಅಲ್ಲಿ ಪ್ರೇಮವೇ ಮುಖ್ಯ. ಮಗುವೂ ಸಹ ಜೋಗುಳವನ್ನು ಆಸ್ವಾದಿಸುತ್ತಾ ಆನಂದದಿಂದ ನಿದ್ರಿಸುತ್ತದೆ. ಅಲ್ಲಿ ತಾಯಿಗೆ ಒಂದು ರೀತಿಯ ಆನಂದವಾದರೆ ಕಂದನ ಆನಂದ ಮತ್ತೊಂದು ಬಗೆಯದು. ಎಂತಹಾ ದೈವೀಕ ಪ್ರೇಮವಲ್ಲಿ ಮೈದೋರುತ್ತದೆ !? ಅಂತೆಯೇ ಗುರುವಿನ ಹಿತ ಮಿತ ಮೃದು ಮಧುರವಾದ ಮಾತೂ ಕೂಡ. ಅಲ್ಲಿ ಬಣ್ಣ ಬೆಡಗಿರದು. ವೈಭವದ , ಕ್ಲಿಷ್ಟಕರವಾದ ಪದಪುಂಜಗಳಿರವು. ಕಿರಿದರಲ್ಲಿ ಹಿರಿದನ್ನು ಹಿಡಿದಿಟ್ಟು ಜ್ಞಾನದ ಆನಂದವನ್ನು ನೀಡುತ್ತಾನೆ ಗುರು. ಆ ಮಾತುಗಳು ಅಮೃತಸದೃಶವಾದವುಗಳಾಗಿದ್ದು ನೊಂದ ಮನಸ್ಸಿಗೆ ಸಾಂತ್ವನವನ್ನೂ ಆನಂದವನ್ನೂ ನಿಡುತ್ತವೆ. ತಾಯ ಜೋಗುಳ ಅದೆಷ್ಟು ಆನಂದವನ್ನು ನೀಡುವುದೋ ಅಂತೆಯೇ ಗುರುವಿನ ಸಾನಿಧ್ಯ, ನುಡಿಗಳೂ ಸಹ ಮನಸ್ಸಿಗೆ ನೆಮ್ಮದಿ ಶಾಂತಿಯನ್ನು ತರುತ್ತವೆ. ಅಲ್ಲವೇ ಗೆಳೆಯರೇ !?

Author
Recent Posts

ಶ್ರೀ ಮುರಳೀಧರ ಹೆಚ್ ಆರ್

ಶ್ರೀ ಮುರಳೀಧರ ಹೆಚ್ ಆರ್ ಮೂಲತಃ ಚಿತ್ರದುರ್ಗ ಜಿಲ್ಲೆಯ ಹೊಸದುರ್ಗ ತಾಲ್ಲೂಕಿನ ಹೆಗ್ಗೆರೆ ಗ್ರಾಮದವರು ಪ್ರಸ್ತುತ ತಿಪಟೂರಿನ ಬಾಲಕಿಯರ ಸರ್ಕಾರೀ ಪದವಿ ಪೂರ್ವ ಕಾಲೇಜಿನ ಪ್ರಾಢಶಾಲಾ ವಿಭಾಗದಲ್ಲಿ ಕನ್ನಡ ಭಾಷಾ ಉಪದಾಧ್ಯಾಯರಾಗಿ ಕರ್ತವ್ಯ ನಿರ್ವಹಿಸುತ್ತಿದ್ದಾರೆ. ಸಾಹಿತ್ಯ, ಕಲೆ, ಸಂಗೀತ ಮೊದಲಾದವುಗಳಲ್ಲಿ ಸಕ್ರಿಯವಾಗಿ ತೊಡಗಿಸಿಕೊಂಡಿರುವ ಇವರು ಶಿಕ್ಷಣ ಇಲಾಖೆಯಲ್ಲಿ ರಾಜ್ಯಮಟ್ಟದ ಸಂಪನ್ನೂಲ ವ್ಯಕ್ತಿಯಾಗಿ ತಮ್ಮನ್ನು ತೊಡಗಿಸಿಕೊಂಡವರು. "ಹೊರಬೀಡು" ಇವರ ಕಥಾ ಸಂಕಲನವಾಗಿದೆ. ಇದಾಗಲೇ ಎಂಟುನೂರಕ್ಕೂ ಅಧಿಕ ಮುಕ್ತಕಗಳನ್ನು ಅರ್ಥ ಸಹಿತ ಬರೆದು ಸಾಮಾಜಿಕ ಜಾಲತಾಣಗಳಲ್ಲೂ ಪ್ರಸಿದ್ಧರಾಗಿದ್ದಾರೆ.

Latest posts by ಶ್ರೀ ಮುರಳೀಧರ ಹೆಚ್ ಆರ್ (see all)