ಲಕ್ಷಕೊಟ್ಟೇನು ಫಲ
ಲಕ್ಷ್ಯ ನೀಡದ ಮೇಲೆ !
ಜಂಭ ಡಂಭದ ಲಕ್ಷ
ಒಪ್ಪುವನೆ ದೇವ!
ಅರ್ತಿಯಿಂ ಮರಳೆರೆದ
ಅಳಿಲ ಜೀವವೆ ಧನ್ಯ
ರಾಮನೊಲವಿಗೆ ಹೇತು
ಜಾಣಮೂರ್ಖ //
ಭಗವಂತನಿಗೆ ಬೇಕಾಗಿರೋದು ನಾವು ಕೊಡುವ ಹಣವಲ್ಲ. ಅದನ್ನು ನಿನಗೆ ಕೊಟ್ಟವನು ಯಾರು ? ಯೋಚಿಸಯ್ಯ ಗೆಳೆಯ ! ಹಾಗಾದರೆ ದೇವನಿಗೆ ಏನು ಬೇಕು ? ಅವನೇನು ಬಯಸುತ್ತಾನೆ ನಮ್ಮಿಂದ ? ಎಂದರೆ ನಿರ್ಮಲವಾದ ಭಕ್ತಿ ಪ್ರೇಮವನ್ನಷ್ಟೆ. ಲಕ್ಷ ನಮಗಷ್ಟೆ. ಅವನಿಗೆ ಬೇಕಿರೋದು ನಮ್ಮ ಲಕ್ಷ್ಯ ಮಾತ್ರ. ಕಡಲಿಗೆ ಸೇತುವೆಯನ್ನು ಕಟ್ಟುವಾಗ ಭಕ್ತಿ ಪ್ರೀತಿಗಳಿಂದ ಮರಳೆರೆದ ಅಳಿಲಿನ ನಿಷ್ಕಲ್ಮಶ, ನಿರ್ಮಲ ಭಕ್ತಿಪೂರ್ವಕ ಸೇವೆ ಶ್ರೀರಾಮನ ಪ್ರೇಮಕ್ಕೆ ಪಾತ್ರವಾಗಲು ಕಾರಣವಾಗಲಿಲ್ಲವೇ !? ಹಾಗೆ ನಿಷ್ಕಲ್ಮಶವಾದ, ನಿರಪೇಕ್ಷಣೀಯವಾದ ಸೇವೆ , ಭಕ್ತಿ, ದೈವೀಪ್ರೇಮ ಇತ್ಯಾದಿ ಮೌಲ್ಯಗಳು ನಮ್ಮನ್ನು ಎತ್ತರಕ್ಕೆ ಕರೆದೊಯ್ದುಬಿಡುತ್ತವೆ. ಓ, ಗೆಳೆಯ ಇಲ್ಲಿಯ ವರೆಗಿನ ಬದುಕನ್ನು ಬಿಡು. ಇನ್ನಾದರೂ ಚಂದವಾಗಿ ಬದುಕಿ ಬದುಕನ್ನು ಜೀವ ದೇವರ ಸುಂದರ ಸಮ್ಮಿಲನವಾಗಿಸೋಣವೇ ?!
ಶ್ರೀ ಮುರಳೀಧರ ಹೆಚ್ ಆರ್ ಮೂಲತಃ ಚಿತ್ರದುರ್ಗ ಜಿಲ್ಲೆಯ ಹೊಸದುರ್ಗ ತಾಲ್ಲೂಕಿನ ಹೆಗ್ಗೆರೆ ಗ್ರಾಮದವರು ಪ್ರಸ್ತುತ ತಿಪಟೂರಿನ ಬಾಲಕಿಯರ ಸರ್ಕಾರೀ ಪದವಿ ಪೂರ್ವ ಕಾಲೇಜಿನ ಪ್ರಾಢಶಾಲಾ ವಿಭಾಗದಲ್ಲಿ ಕನ್ನಡ ಭಾಷಾ ಉಪದಾಧ್ಯಾಯರಾಗಿ ಕರ್ತವ್ಯ ನಿರ್ವಹಿಸುತ್ತಿದ್ದಾರೆ. ಸಾಹಿತ್ಯ, ಕಲೆ, ಸಂಗೀತ ಮೊದಲಾದವುಗಳಲ್ಲಿ ಸಕ್ರಿಯವಾಗಿ ತೊಡಗಿಸಿಕೊಂಡಿರುವ ಇವರು ಶಿಕ್ಷಣ ಇಲಾಖೆಯಲ್ಲಿ ರಾಜ್ಯಮಟ್ಟದ ಸಂಪನ್ನೂಲ ವ್ಯಕ್ತಿಯಾಗಿ ತಮ್ಮನ್ನು ತೊಡಗಿಸಿಕೊಂಡವರು. "ಹೊರಬೀಡು" ಇವರ ಕಥಾ ಸಂಕಲನವಾಗಿದೆ. ಇದಾಗಲೇ ಎಂಟುನೂರಕ್ಕೂ ಅಧಿಕ ಮುಕ್ತಕಗಳನ್ನು ಅರ್ಥ ಸಹಿತ ಬರೆದು ಸಾಮಾಜಿಕ ಜಾಲತಾಣಗಳಲ್ಲೂ ಪ್ರಸಿದ್ಧರಾಗಿದ್ದಾರೆ.
Latest posts by ಶ್ರೀ ಮುರಳೀಧರ ಹೆಚ್ ಆರ್ (see all)
- ಭವ ಕಳೆವ ಶಿವ ಸತ್ಯ - September 6, 2021
- ಬಾಳಿನಾಹವ - September 4, 2021
- ಪಿಡಿದರಿವಿನೊಳ್ಮಾಗು - September 3, 2021
